ಬ್ಯಾಂಕಾಕ್‌: ಥಾಯ್ಲೆಂಡ್‌ನ ಬೀದಿಗಳಲ್ಲಿ ನಾಯಿಯನ್ನು ಬೆನ್ನಿಗೆ ಕಟ್ಟಿಕೊಂಡು ಕಸ ಗುಡಿಸುತ್ತಿರುವ ಮಹಿಳೆಯೊಬ್ಬರ ಚಿತ್ರ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಜನರ ಮೆಚ್ಚುಗೆ ಗಳಿಸಿದೆ.
ಈ ನಾಯಿಯ ಹೆಸರು ಮಜ್ದಾ. ಇದರ ತೂಕ 10 ಕೆ.ಜಿ. ಇದರ ಒಡತಿತಿತಿರಾತ್ ಕಿಯೋವಾ-ರಾಮ್ ಅವರ ನಾಯಿ ಪ್ರೀತಿಗೆ ಮೆಚ್ಚುಗೆಯ ಸುರಿಮಳೆ ಹರಿದಿದೆ.
‘ನನಗೊಂದು ನಾಯಿ ಮರಿ ನೀಡುವಂತೆ ಗೆಳೆಯನ ಬಳಿ ಕೇಳಿದ್ದೆ. ಕೆಲಸಕ್ಕೆ ಹೋಗುವಾಗ ತೆಗೆದುಕೊಂಡು ಹೋಗುವುದಾದರೆ ಮಾತ್ರವೇ ಕೊಡಿಸುತ್ತೇನೆ ಎಂದು ಗೆಳೆಯ ಷರತ್ತು ಹಾಕಿದ್ದ. ನಾನು ಒಪ್ಪಿಕೊಂಡೆ. ಒಂದು ವರ್ಷದಿಂದ ನಾಯಿಯನ್ನು ಹೊತ್ತುಕೊಂಡೇ ಕಸ ಗುಡಿಸುತ್ತಿದ್ದೇನೆ’ ಎಂದು ಮಹಿಳೆ ತಿಳಿಸಿದ್ದಾರೆ.
ಕೆಲಸದ ಸ್ಥಳಕ್ಕೆ ನಾಯಿಯನ್ನು ತರುವ ಟ್ರೆಂಡ್‌ ಥಾಯ್ಲೆಂಡ್‌ನಲ್ಲಿ ಇತ್ತೀಚಿನ ದಿನಗಳಲ್ಲಿ ಜನಪ್ರಿಯತೆ ಗಳಿಸುತ್ತಿದೆ. ಅನಿಯಮಿತ ಕೆಲಸದ ಸಮಯವನ್ನು ಹೊಂದಿರುವ ಸಂಸ್ಥೆಗಳಲ್ಲಿ ಇದು ಹೆಚ್ಚು ಪ್ರಚಲಿತದಲ್ಲಿದೆ. ನಾಯಿ–ಸ್ನೇಹ ನೀತಿ ನೌಕರರ ಒತ್ತಡ ನಿವಾರಣೆಯ ಮಾರ್ಗ ಎಂಬ ನಂಬಿಕೆ ಅಲ್ಲಿಯ ಜನರಲ್ಲಿದೆ.
