ಅಟ್ಲಾಂಟಾದಿಂದ ಭಾರತಕ್ಕೆ ವಿಮಾನಯಾನ ಸೇವೆಗೆ ಮನವಿ

ವಾಷಿಂಗ್ಟನ್‌: ಅಮೆರಿಕದ ಅಟ್ಲಾಂಟಾದಿಂದ ಭಾರತಕ್ಕೆ ವಾಯಯಾನ ಸೇವೆ ಆರಂಭಿಸುವಂತೆ ಅಮೆರಿಕದಲ್ಲಿರುವ ಭಾರತೀಯರು ಏರ್‌ ಇಂಡಿಯಾಗೆ ಮನವಿ ಮಾಡಿದ್ದಾರೆ.

ಸದ್ಯ, ನ್ಯೂಯಾರ್ಕ್‌, ವಾಷಿಂಗ್ಟನ್‌ ಡಿಸಿ, ಷಿಕಾಗೊ, ಲಾಸ್‌ ಏಂಜಲ್ಸ್‌ ಹಾಗೂ ಸ್ಯಾನ್‌ ಫ್ರಾನ್ಸಿಸ್ಕೊದಿಂದ ಭಾರತಕ್ಕೆ ಏರ್‌ ಇಂಡಿಯಾ ವಿಮಾನಗಳು ಸಂಚರಿಸುತ್ತಿವೆ. ಅಟ್ಲಾಂಟಾದಿಂದಲೂ ಈ ಸೇವೆ ಆರಂಭಿಸಿದರೆ ಅನುಕೂಲವಾಗುತ್ತದೆ ಎಂದು ಅನಿವಾಸಿ ಭಾರತೀಯರು ಕೋರಿದ್ದಾರೆ. 

ಇತ್ತೀಚೆಗೆ ಅಮೆರಿಕಕ್ಕೆ ಭೇಟಿ ನೀಡಿದ್ದ ಭಾರತದ ವಿದೇಶಾಂಗ ವ್ಯವಹಾರಗಳ ರಾಜ್ಯ ಸಚಿವ ವಿ.ಕೆ. ಸಿಂಗ್‌ ಅವರಿಗೆ ಈ ಕುರಿತು ಮನವಿ ಸಲ್ಲಿಸಲಾಗಿದೆ. ‘ಅಟ್ಲಾಂಟದಿಂದ ಭಾರತಕ್ಕೆ ನೇರ ವಿಮಾನಯಾನ ಸೇವೆ ಆರಂಭಿಸಬೇಕು ಎಂಬ ನಮ್ಮ ಮನವಿಗೆ ಸಚಿವರು ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ’ ಎಂದು ಭಾರತೀಯ ಅಮೆರಿಕನ್‌  ಫೆಡರೇಷನ್‌ನ ಜಾರ್ಜಿಯಾ ಘಟಕದ ಅಧ್ಯಕ್ಷ ಡಾ. ವಾಸುದೇವ ಪಾಟೀಲ ಹೇಳಿದ್ದಾರೆ.