ಬಸವಾಪಟ್ಟಣ: ಸಿಡಿ ಉತ್ಸವಕ್ಕೆ ಬಂದ ಜನಸಾಗರ

ಬಸವಾಪಟ್ಟಣ: ಇಲ್ಲಿನ ಪುರಾಣ ಪ್ರಸಿದ್ಧ ದುರ್ಗಾದೇವಿ ಜಾತ್ರೆಯ ಸಿಡಿ ಉತ್ಸವ ಸಹಸ್ರಾರು ಜನರ ಸಮ್ಮುಖದಲ್ಲಿ ಶುಕ್ರವಾರ ವಿಜೃಂಭಣೆಯಿಂದ ನೆರವೇರಿತು.ಸುತ್ತಲಿನ ಗ್ರಾಮಗಳಿಂದ ಉತ್ಸವ ಮೂರ್ತಿಗಳನ್ನು ಪಲ್ಲಕ್ಕಿಗಳಲ್ಲಿ ಕರೆ ತಂದು ಗಂಗಾಪೂಜೆ ನೆರವೇರಿಸಲಾಯಿತು. ನಂತರ ದುರ್ಗಾದೇವಿಯ ಮೂರ್ತಿಯನ್ನು ಸಿಡಿ ಉತ್ಸವದ ಅಂಗಳದ ಕಟ್ಟೆಯಲ್ಲಿ ಪ್ರತಿಷ್ಠಾಪಿಸಲಾಯಿತು.ಸಾಂಪ್ರದಾಯಿಕ ಪೂಜೆ ಸಲ್ಲಿಸಿದ ನಂತರ ಸಿಡಿ ಉತ್ಸವಕ್ಕೆ ಚಾಲನೆ ನೀಡಲಾಯಿತು. ದುರ್ಗಾದೇವಿ ಕಳಶ, ದಂಡ ಒಳಗೊಂಡ 30 ಅಡಿ ಉದ್ದ ಹಾಗೂ ಎರಡು ಅಡಿ ಸುತ್ತಳತೆಯ ಭಾರಿ ಗಾತ್ರದ ಸಿಡಿ ಕಂಬವನ್ನು ತಿರುಗುತ್ತಿದ್ದಂತೆ ಸಹಸ್ರಾರು ಭಕ್ತರು ‘ಉಧೋ’ ಎಂದು ಘೋಷಣೆ ಕೂಗಿದರು.