ನಿಜದ ‘ಸಾಹೇಬ’ ಶರದ್ ಪವಾರ್

ರಾಜಕೀಯ, ಕ್ರಿಕೆಟ್, ಕುಸ್ತಿ– ಯಾವುದೇ ಆಗಿದ್ದರೂ ಇವರನ್ನು ಸೋಲಿಸಲಾಗದು. ನಿಜಾರ್ಥದಲ್ಲಿ ಇವರು ‘ರಾಜಕೀಯದ ಚಾಣಕ್ಯ’ನೇ ಸರಿ. ‘ಸಾಹೇಬ’ ಎಂದೇ ಖ್ಯಾತರಾಗಿರುವ ಪವಾರ್ ಮಹಾರಾಷ್ಟ್ರದಲ್ಲಿ 4 ಬಾರಿ ಮುಖ್ಯಮಂತ್ರಿ ಹುದ್ದೆ ನಿಭಾಯಿಸಿದ ಅನುಭವಿ. ತಮ್ಮ ಸುದೀರ್ಘ ರಾಜಕೀಯ ಜೀವನದಲ್ಲಿ ಲೋಕಸಭೆ ಪ್ರತಿಪಕ್ಷದ ನಾಯಕರಾಗಿ, ಕೇಂದ್ರದ ರಕ್ಷಣಾ ಸಚಿವರಾಗಿ ಕೆಲಸ ಮಾಡಿದ್ದಾರೆ. 2014 ಮತ್ತು 2019ರ ಚುನಾವಣಾ ಸೋಲಿನ ಬಳಿಕ ಪಕ್ಷಕ್ಕೆ ತಳಮಟ್ಟದಲ್ಲಿ ಬಲ ತುಂಬುವ ಕೆಲಸವನ್ನು ಅವರು ಸವಾಲಾಗಿ ಸ್ವೀಕರಿಸಿದ್ದರು.

ಮಹಾರಾಷ್ಟ್ರ ಸಹಕಾರ ಬ್ಯಾಂಕ್ ಹಗರಣದಲ್ಲಿ ಪವಾರ್ ವಿರುದ್ಧ ಜಾರಿ ನಿರ್ದೇಶನಾಲಯ (ಇ.ಡಿ) ಎಫ್‌ಐಆರ್ ದಾಖಲಿಸಿತ್ತು. ‘ಇ.ಡಿ ಕಚೇರಿಗೆ ಹೋಗಿ ವಿಚಾರಣೆ ಎದುರಿಸುತ್ತೇನೆ’ ಎಂದು ಪವಾರ್ ಘೋಷಿಸುತ್ತಿದ್ದಂತೆಯೇ ಎದುರಾದ ವಿಧಾನಸಭಾ ಚುನಾವಣೆಯಲ್ಲಿ ಅನುಕಂಪದ ಅಲೆ ಸಹಜವಾಗಿಯೇ ಕೆಲಸ ಮಾಡಿತು. ಅನಾರೋಗ್ಯದ ನಡುವೆಯೇ ನಿತ್ಯ ಮೂರ್ನಾಲ್ಕು ರ‍‍್ಯಾಲಿಗಳಲ್ಲಿ ಭಾಗವಹಿಸಿ ಪಕ್ಷದ ಆರೋಗ್ಯ ಸುಧಾರಿಸಿದರು.

ಫಡವೀಸ್ ಜತೆ ‘ಜಂಗಿಕುಸ್ತಿ’:‘ಬಿಜೆಪಿಗೆ ಸವಾಲು ಒಡ್ಡಬಲ್ಲ ಕುಸ್ತಿಪಟುಗಳು ಎದುರಾಳಿ ಪಾಳಯದಲ್ಲಿ ಇಲ್ಲ. ನಮ್ಮ ಕುಸ್ತಿಪಟುಗಳು ಎಲ್ಲಡೆಯೂ ಇದ್ದಾರೆ’ ಎಂದು ಫಡಣವೀಸ್ ವಾಗ್ದಾಳಿ ನಡೆಸಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ಪವಾರ್, ‘ನಾನು ಮಹಾರಾಷ್ಟ್ರದ ಕುಸ್ತಿ ಸಂಘಟನೆಗೇ ಅಧ್ಯಕ್ಷ. ನಿಮ್ಮಲ್ಲಿ ಕುಸ್ತಿಯೇ ಗೊತ್ತಿಲ್ಲದ ಕುಸ್ತಿಪಟುಗಳಿದ್ದಾರೆ’ ಎಂದು ಮೂದಲಿಸಿದ್ದರು. ಇದಕ್ಕೆ ಉತ್ತರಿಸುವ ಗೋಜಿಗೆ ಫಡಣವೀಸ್ ಹೋಗಿರಲಿಲ್ಲ.

ಸಂಬಂಧಿಗೇ ಪಾಠ:ಬಿಜೆಪಿ–ಸೇನಾ ಮೈತ್ರಿ ಮುರಿದುಬಿದ್ದ ಮೇಲೆ ಅವರು ಬಿಜೆಪಿ ವಿರೋಧಿ ಅಭಿಯಾನ ಶುರು ಮಾಡಿದರು. ಸಂಬಂಧಿ ಅಜಿತ್ ಪವಾರ್, ಬಿಜೆಪಿ ಪಾಳೆಯ ಸೇರಿ ಬಿಕ್ಕಟ್ಟು ಸೃಷ್ಟಿಸಿದರೂ ಧೃತಿಗೆಡದ ಪವಾರ್, ತಮ್ಮ ರಾಜಕೀಯ ಅನುಭವ ಬಳಸಿಕೊಂಡು, ಅಜಿತ್ ಅವರನ್ನು ಏಕಾಂಗಿಯಾಗಿಸುವ ಯತ್ನದಲ್ಲಿ ಸಫಲರಾದರು. ಕಾಂಗ್ರೆಸ್–ಸೇನಾ ಮುಖಂಡರು ಭರವಸೆ ಕಳೆದುಕೊಂಡಾಗ, ‘ನಮ್ಮದೇ ಸರ್ಕಾರ ಬರುತ್ತದೆ, ಚಿಂತಿಸಬೇಡಿ’ ಎಂದು ಧೈರ್ಯ ತುಂಬಿದ್ದು ಇವರೇ. ಕೊನೆಗೂ ಮಹಾರಾಷ್ಟ್ರ ರಾಜಕೀಯದಲ್ಲಿ ಬದಲಾವಣೆ ಆಗಿದೆ. ಈ ಮೂಲಕ ಇಡೀ ಎನ್‌ಸಿಪಿ ಪರಿವಾರ ಹಾಗೂ ತಮ್ಮ ಕುಟುಂಬಕ್ಕೆ ಸ್ಪಷ್ಟ ಸಂದೇಶ ರವಾನಿಸಿರುವ ಪವಾರ್, ತಾವು ‘ಸಾಹೇಬ’ ಎಂದು ಮತ್ತೊಮ್ಮೆ ನಿರೂಪಿಸಿದ್ದಾರೆ.