ಶಿಲ್ಪವನಕ್ಕೆ 18 ಸಾವಿರ ಪ್ರವಾಸಿಗರು ಭೇಟಿ

ವಯಸ್ಕರಿಗೆ ₹ 35 , ಮಕ್ಕಳಿಗೆ ₹ 25 ಪ್ರವೇಶದರ ನಿಗದಿ ಮಾಡಲಾಗಿದೆ. ಸುಮಾರು ₹ 3 ಕೋಟಿ ವೆಚ್ಚದಲ್ಲಿ ನಿರ್ಮಿಸಿದ ಈ ಉದ್ಯಾನದ ನಿರ್ವ
ಹಣೆಗೆ ಹಣ ಇದರಿಂದಲೇ ಹೊಂದಾಣಿಕೆ ಆಗಬೇಕು ಎಂಬುದು ಜಿಲ್ಲಾಡಳಿತ ಮತ್ತು ಪ್ರವಾಸೋದ್ಯಮ ಇಲಾಖೆಯ ಗುರಿಯಾಗಿದೆ. ಪ್ರವೇಶ ದರದಿಂದ ಸಿಗುವ ಲಾಭದಲ್ಲಿ ಶೇ 50ರಷ್ಟು ರವೀಂದ್ರನಾಥ ಟ್ಯಾಗೋರ್ ಕಡಲತೀರ ಸಂರಕ್ಷಣೆ ಮತ್ತು ಅಭಿವೃದ್ಧಿ ಸಮಿತಿಗೆ ದೊರೆಯಲಿದ್ದು, ಸಿಬ್ಬಂದಿ ವೇತನವನ್ನೂ ಹಣದಲ್ಲೇ ನಿಭಾಯಿಸಲಾಗುತ್ತದೆ. ಆರು ಎಕರೆ ಪ್ರದೇಶದಲ್ಲಿ ವಿನ್ಯಾಸ ಮಾಡಲಾಗಿರುವ ಉದ್ಯಾನದಲ್ಲಿ ಜಿಲ್ಲೆಯ ಬುಡಕಟ್ಟು ಸಂಸ್ಕೃತಿ, ಯಕ್ಷಗಾನ, ಮೀನುಗಾರರ ಜೀವನ ಕಟ್ಟಿಕೊಡುವ ರೀತಿಯ ಪ್ರತಿಮೆಗಳನ್ನು ಕಲಾವಿದರ ತಂಡ ನಿರ್ಮಿಸಿದೆ. ವಿವಿಧ ಸಮುದಾಯದವರ ನೈಜ ಎತ್ತರದ ಪ್ರತಿಮೆಗಳು ಹಾಗೂ ಅವರ ಜೀವನ ಶೈಲಿ ಬಿಂಬಿಸುವ ರೀತಿಯಲ್ಲಿ ಗುಡಿಸಲುಗಳು, ಅವರ ಸಾಕುಪ್ರಾಣಿಗಳ ಪ್ರತಿಕೃತಿಗಳು ಪ್ರವಾಸಿಗರನ್ನು ಆಕರ್ಷಿಸುತ್ತಿವೆ.

‘ಪ್ರಜಾವಾಣಿ’ ಜತೆ ಮಾತನಾಡಿದ ಕಲಾವಿದ ಮೋಹನ್ಸೋನಾ, ‘ಮುಂದಿನ ದಿನಗಳಲ್ಲಿ ಇಲ್ಲಿನ ಗುಡಿಸಲುಗಳ ಅಂದವನ್ನು ಮತ್ತಷ್ಟು ಹೆಚ್ಚಿಸಲಾಗುತ್ತದೆ. ಆಯಾ ಸಮುದಾಯಗಳು ಬಳಸುವ ಪರಿಕರಗಳು, ಅವರ ಉಡುಪು ಗುಡಿಸಲುಗಳಲ್ಲಿ ಇಟ್ಟು ವಸ್ತು ಸಂಗ್ರಹಾಲಯವನ್ನಾಗಿ ಅಭಿವೃದ್ಧಿ ಮಾಡಲಾಗುತ್ತದೆ. ಈ ಮೂಲಕ ಜಿಲ್ಲೆಯ ಸಂಸ್ಕೃತಿಯ ರಕ್ಷಣೆ ಹಾಗೂ ಪರಿಚಯಕ್ಕೆ ಯತ್ನಿಸಲಾಗುತ್ತದೆ’ ಎಂದರು. ಪ್ರತಿ ಭಾನುವಾರ ಸಂಜೆ 5ರಿಂದ 7ರವರೆಗೆ
ಶಿಲ್ಪವನದಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತಿದೆ. ಜಿಲ್ಲೆಯ ಬುಡಕಟ್ಟು, ಜಾನಪದ ಕಲಾ ತಂಡಗಳನ್ನು ಆಹ್ವಾನಿಸಿ ಅವರಿಂದ ಸಾಂಸ್ಕೃತಿಕ ಪರಿಚಯ ಮಾಡಿಸಲಾಗುತ್ತಿದೆ. ಕಲಾವಿದರಿಗೆ ಗೌರವಧನವನ್ನೂ ನೀಡಲಾಗುತ್ತಿದೆ.

ಎರಡು ದ್ವಾರಕ್ಕೆ ಬೇಡಿಕೆ

ಶಿಲ್ಪವನದ ಪ್ರವೇಶದ್ವಾರವು ನಗರದಿಂದ ಸ್ವಲ್ಪ ದೂರದಲ್ಲಿದೆ. ಆದ್ದರಿಂದ ಆಂಜನೇಯನ ವಿಗ್ರಹ ಇರುವ ಕಡಲತೀರದ ಭಾಗದಲ್ಲಿ ಮತ್ತೊಂದು ಪ್ರವೇಶದ್ವಾರ ತೆರೆಯಬೇಕು. ಇದರಿಂದ ಹೋಟೆಲ್‌ ಬಳಿ ವಾಹನ ನಿಲ್ಲಿಸಿ ನಡೆದುಕೊಂಡು ಬರುವವರಿಗೆ ಅನುಕೂಲವಾಗುತ್ತದೆ. ಈ ಮೂಲಕ ಮತ್ತಷ್ಟು ಪ್ರವಾಸಿಗರನ್ನು ಸೆಳೆಯಬಹುದು ಎನ್ನುವ ಅಭಿಪ್ರಾಯ ಸ್ಥಳೀಯ ನಿವಾಸಿ ಮಯಾಂಕ್ ಅವರದ್ದು.

**

ಕೆಲ ಯೋಜನೆ ಆರಂಭದ ಬಳಿಕ ಉಳಿಯುತ್ತವೆಯೋ ಇಲ್ಲವೋ ಎಂಬ ಅನುಮಾನ ಮೂಡುತ್ತದೆ. ಆದರೆ, ಶಿಲ್ಪವನವನ್ನು ಪ್ರೀತಿಸಿದ್ದು, ನಮ್ಮ ಶ್ರಮ ಸಾರ್ಥಕ ಎಂಬ ಭಾವನೆ ಮೂಡಿದೆ – ಮೋಹನ್ ಸೋನಾ, ಕಲಾವಿದ.

**