ಶಾಸಕರ ಧರಣಿ ಫೋಟೊ ವಿರೂಪಗೊಳಿಸಿದ ಕಿಡಿಗೇಡಿಗಳು

ಅಧಿವೇಶನದಲ್ಲಿ ಖಾಸಗಿ ಮಸೂದೆ ಮಂಡಿಸಲು ಅವಕಾಶ ನೀಡದಿರುವುದನ್ನು ಖಂಡಿಸಿ ಶಾಸಕರು ಧರಣಿ ನಡೆಸಿದ್ದರು. ಅವರು ಹಿಡಿದಿದ್ದ ಫಲಕಗಳಲ್ಲಿ ತಮ್ಮ ಬೇಡಿಕೆಗಳನ್ನು ಬರೆಸಿದ್ದರು. ಆದರೆ ಕೆಲವರು ಆ ಫಲಕಗಳಲ್ಲಿದ್ದ ಬರಹವನ್ನು ವಿರೂಪಗೊಳಿಸಿ, ಗಡಿವಿವಾದ ಬಗೆಹರಿಸಬೇಕು ಎಂಬ ಸಾಲು ಹಾಗೂ ಎಂಇಎಸ್ ಘೋಷಣೆಯನ್ನು (ಬೆಳಗಾವಿ ಮಹಾರಾಷ್ಟ್ರಕ್ಕೆ ಸೇರಬೇಕು ಎನ್ನುವುದು) ಬರೆದು ಸಾಮಾಜಿಕ ಮಾಧ್ಯಮದಲ್ಲಿ ಹಾಕಿದ್ದಾರೆ. ಈ ಶಾಸಕರು ಗಡಿವಿವಾದ ಇತ್ಯರ್ಥಕ್ಕಾಗಿ ಧರಣಿ ಕುಳಿತಿದ್ದಾರೆಂದು ಬಿಂಬಿಸುವ ಯತ್ನವನ್ನು ಮಾಡಲಾಗಿದೆ.

‘ಇದು ಎಂಇಎಸ್‌ ಕಿಡಗೇಡಿಗಳ ಕೃತ್ಯವೇ ಹೌದು. ಇದು ಅವರ ಹಳೆಯ ಚಟವನ್ನು ತೋರಿಸಿದೆ. ಇಂಥ ಕುತಂತ್ರವು ಅವರಿಗೆ ತಾತ್ಕಾಲಿಕವಾಗಿ ಖುಷಿ ಕೊಡಬಹುದೇ ಹೊರತು ಮತ್ತೇನನ್ನೂ ನೀಡದು. ಅಭಯ ಪಾಟೀಲ ಎಂಇಎಸ್ ನಾಯಕರ ವಿರುದ್ಧ ತೊಡೆತಟ್ಟಿ ನಿಂತವರು. ಅವರ ವಿರುದ್ಧದ ಕುತಂತ್ರವನ್ನು ಖಂಡಿಸುತ್ತೇನೆ. ಮತದಾರರು ಪಾಠ ಕಲಿಸಿದ್ದರೂ ಎಂಇಎಸ್‌ನವರು ಬುದ್ಧಿ ಕಲಿತಿಲ್ಲ’ ಎಂದು ಜಿಲ್ಲಾ ಕನ್ನಡ ಸಂಘಟನೆಗಳ ಕ್ರಿಯಾ ಸಮಿತಿ ಅಧ್ಯಕ್ಷ ಅಶೋಕ ಚಂದರಗಿ ತಿಳಿಸಿದರು.

ಅವರು ತಮ್ಮ ಫೇಸ್‌ಬುಕ್‌ ಪುಟದಲ್ಲೂ ಈ ಕುರಿತು ಬರೆದಿದ್ದಾರೆ. ಅಸಲಿ ಫೋಟೊ ಹಾಕಿದ್ದಾರೆ.