ಮಾನವ ಹಕ್ಕು ಉಲ್ಲಂಘನೆ: ಅಮೆರಿಕ ಹೇಳಿಕೆಗೆ ಭಾರತ ತಿರುಗೇಟು

ಸರ್ಕಾರದ ಕೆಲವು ಅಧಿಕಾರಿಗಳು, ಪೊಲೀಸರು ಮತ್ತು ಜೈಲು ಅಧಿಕಾರಿಗಳು ನಡೆಸುತ್ತಿರುವ ಮಾನವ ಹಕ್ಕು ಉಲ್ಲಂಘನೆಗಳು ಸೇರಿದಂತೆ, ಭಾರತದಲ್ಲಿ ಈಚೆಗೆ ನಡೆಯುತ್ತಿರುವ ‘ಕಳವಳಕಾರಿ ಬೆಳವಣಿಗೆ’ಗಳ ಬಗ್ಗೆ ಅಮೆರಿಕ ನಿಗಾ ಇರಿಸಿದೆ ಎಂದು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಆ್ಯಂಟನಿ ಬ್ಲಿಂಕನ್‌ ಹೇಳಿದ್ದರು.ಭಾರತ ಮತ್ತು ಅಮೆರಿಕದ ವಿದೇಶಾಂಗ ಹಾಗೂ ರಕ್ಷಣಾ ಸಚಿವರ ನಡುವಣ 2+2 ಮಾತುಕತೆಯ ನಂತರದ ಜಂಟಿ ಮಾಧ್ಯಮಗೋಷ್ಠಿಯಲ್ಲಿ ಈ ವಿಚಾರವನ್ನು ಅವರು ಪ್ರಸ್ತಾಪಿಸಿದ್ದರು.

ಇದಕ್ಕೆ ಪ್ರತಿಕ್ರಿಯೆಯ ರೀತಿಯಲ್ಲಿ ಮಾತನಾಡಿದ ಜೈಶಂಕರ್‌, ಮಾನವ ಹಕ್ಕುಗಳ ವಿಷಯವು 2+2 ಮಾತುಕತೆಯ ವಿಷಯ ಆಗಿರಲಿಲ್ಲ ಎಂದು ಗುರುವಾರ ಹೇಳಿದ್ದಾರೆ.

‘ಅಮೆರಿಕವೂ ಸೇರಿ ಇತರೆಡೆಯ ಮಾನವ ಹಕ್ಕು ಪರಿಸ್ಥಿತಿಯ ಬಗ್ಗೆ ನಮಗೂ ನಿಲುವುಗಳು ಇವೆ ಎಂದು ಹೇಳಲು ಬಯಸುತ್ತೇನೆ. ಈ ದೇಶದಲ್ಲಿ (ಅಮೆರಿಕ), ಅದರಲ್ಲಿಯೂ ವಿಶೇಷವಾಗಿ ನಮ್ಮ ಸಮುದಾಯಕ್ಕೆ ಸಂಬಂಧಿಸಿ ಮಾನವ ಹಕ್ಕುಗಳ ವಿಚಾರಗಳು ಬಂದಾಗ ಅದನ್ನು ಖಂಡಿತ ಪ್ರಸ್ತಾಪಿಸುತ್ತೇವೆ. ನಿನ್ನೆಯೂ (ಬುಧವಾರ) ಒಂದು ಪ್ರಕರಣ ವರದಿಯಾಗಿದೆ’ ಎಂದು ಜೈಶಂಕರ್‌ ಹೇಳಿದ್ದಾರೆ.

‘2+2 ಮಾತುಕತೆಯು ಮುಖ್ಯವಾಗಿ ರಾಜಕೀಯ ಮತ್ತು ಸೇನಾ ವ್ಯವಹಾರಗಳಿಗೆ ಸಂಬಂಧಿಸಿದ್ದಾಗಿತ್ತು. ಮಾನವ ಹಕ್ಕುಗಳ ವಿಚಾರವು ಸಭೆಯಲ್ಲಿ ಚರ್ಚೆಯೇ ಆಗಿಲ್ಲ’ ಎಂದು ಜೈಶಂಕರ್‌ ತಿಳಿಸಿದ್ದಾರೆ.ಮಾಧ್ಯಮ ಪ್ರತಿನಿಧಿಗಳ ಪ್ರಶ್ನೆಯೊಂದಕ್ಕೆ ಉತ್ತರಿಸುತ್ತಾ ಜೈಶಂಕರ್‌ ಹೀಗೆ ಹೇಳಿದ್ದಾರೆ.

‘ಈ ಹಿಂದಿನ ಸಭೆಗಳಲ್ಲಿ ಮಾನವ ಹಕ್ಕುಗಳ ವಿಚಾರ ಪ್ರಸ್ತಾಪ ಆಗಿತ್ತು. ಬ್ಲಿಂಕನ್‌ ಅವರು ಭಾರತಕ್ಕೆ ಬಂದಿದ್ದಾಗ ವಿಷಯ ಚರ್ಚೆ ಆಗಿತ್ತು. ಈ ಹಿಂದೆ ನಡೆದ ಮಾಧ್ಯಮಗೋಷ್ಠಿಯನ್ನು ನೆನಪಿಸಿಕೊಂಡರೆ, ಆಗ ಏನು ಚರ್ಚೆ ಆಗಿತ್ತು ಮತ್ತು ನಾನು ಏನು ಹೇಳಬೇಕಿತ್ತೋ ಅದನ್ನು ಹೇಳಿದ್ದೆ ಎಂಬುದು ತಿಳಿಯುತ್ತದೆ’ ಎಂದೂ ಅವರು ತಿಳಿಸಿದ್ದಾರೆ.