ಗುರುವಾರ, 28 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಅಬುಧಾಬಿ ದಾಳಿ: ಮೃತ ಭಾರತೀಯರ ಗುರುತು ಪತ್ತೆ, ಗಾಯಗೊಂಡವರಲ್ಲೂ ಇಬ್ಬರು ಭಾರತೀಯರು

Last Updated 18 ಜನವರಿ 2022, 13:32 IST
ಅಕ್ಷರ ಗಾತ್ರ

ದುಬೈ: ಅಬುಧಾಬಿಯಲ್ಲಿ ಸೋಮವಾರ ಶಂಕಿತ ಡ್ರೋನ್‌ ದಾಳಿಯಿಂದ ಸ್ಫೋಟ ಸಂಭವಿಸಿ ಮೃತಪಟ್ಟ ಇಬ್ಬರು ಭಾರತೀಯರ ಗುರುತು ಪತ್ತೆಯಾಗಿದ್ದು, ಗಾಯಗೊಂಡ ಆರು ಮಂದಿಯಲ್ಲಿ ಇಬ್ಬರು ಭಾರತೀಯರು ಎಂಬುದು ತಿಳಿದುಬಂದಿದೆ.

ಗಾಯಗೊಂಡ ಈ ಇಬ್ಬರು ಭಾರತೀಯರನ್ನು ಚಿಕಿತ್ಸೆ ನೀಡಿ ಸೋಮವಾರ ರಾತ್ರಿಯೇ ಮನೆಗೆ ಕಳುಹಿಸಿಕೊಡಲಾಗಿದೆ ಎಂದು ಭಾರತೀಯ ರಾಯಭಾರ ಕಚೇರಿ ತಿಳಿಸಿದೆ.

‘ಮೃತಪಟ್ಟಿರುವ ಇಬ್ಬರು ಭಾರತೀಯರ ಗುರುತನ್ನು ಪತ್ತೆಹಚ್ಚಲಾಗಿದೆ. ಅವರ ಕುಟುಂಬದವರೊಂದಿಗೆ ನಿಕಟ ಸಂಪರ್ಕದಲ್ಲಿದ್ದೇವೆ. ಮೃತದೇಹವನ್ನು ಭಾರತಕ್ಕೆ ತರುವ ನಿಟ್ಟಿನಲ್ಲಿ ಯುಎಇ ಅಧಿಕಾರಿಗಳು ಹಾಗೂ ಎಡಿಎನ್ಒಸಿ ತೈಲ ಕಂಪನಿ ಜತೆಗೆ ಸಂಪರ್ಕದಲ್ಲಿದ್ದೇವೆ’ ಎಂದು ಭಾರತೀಯ ರಾಯಭಾರ ಕಚೇರಿ ಟ್ವೀಟ್‌ ಮಾಡಿದೆ. ಆದರೆ ಮೃತರ ಹೆಸರು, ಅವರ ಊರನ್ನು ಇನ್ನೂ ಬಹಿರಂಗಪಡಿಸಿಲ್ಲ.

ಅಗತ್ಯದ ನೆರವು: ‘ಮೃತಪಟ್ಟ ಭಾರತೀಯರ ಕುಟುಂಬಗಳಿಗೆ ಸಾಧ್ಯವಿರುವ ಎಲ್ಲಾ ನೆರವನ್ನೂ ನೀಡಲಾಗುವುದು’ ಎಂದು ಯುಎಇಯಲ್ಲಿರುವ ಭಾರತದ ರಾಯಭಾರಿ ಸಂಜಯ್‌ ಸುಧೀರ್ ಅವರು ‘ದಿ ನ್ಯಾಷನಲ್‌’ ಪತ್ರಿಕೆಗೆ ತಿಳಿಸಿದ್ದಾರೆ.

ದಾಳಿ ಬಳಿಕದ ಉಪಗ್ರಹ ಚಿತ್ರ ಬಿಡುಗಡೆ:ಶಂಕಿತ ಹೂತಿ ಬಂಡುಕೋರರು ದಾಳಿ ನಡೆಸಿದ ನಂತರದ ಉಪಗ್ರಹ ಚಿತ್ರವನ್ನು ಪ್ಲಾನೆಟ್‌ ಲ್ಯಾಬ್ಸ್‌ ಪಿಬಿಸಿ ತೆಗೆದಿದ್ದು, ಎಪಿ ಸುದ್ದಿಸಂಸ್ಥೆ ಅದನ್ನು ಪಡೆದುಕೊಂಡು ಪ್ರಕಟಿಸಿದೆ. ಅಬುಧಾಬಿ ಹೊರವಲಯದ ಮುಸಾಫಾದಲ್ಲಿರುವ ಅಬುಧಾಬಿ ನ್ಯಾಷನಲ್‌ ಆಯಿಲ್ ಕಂಪನಿಯ ತೈಲ ಸಂಗ್ರಹಾಗಾರದ ಬಳಿ ದಟ್ಟ ಹೊಗೆ ಮೇಲೇಳುತ್ತಿರುವುದು ಈ ಚಿತ್ರದಲ್ಲಿ ದಾಖಲಾಗಿದೆ.

ದಾಳಿಯಿಂದ ಎಂತಹ ಹಾನಿ ಆಗಿದೆ ಎಂಬ ಬಗ್ಗೆ ಕಂಪನಿಯ ಇದುವರೆಗೆ ಯಾವುದೇ ಹೇಳಿಕೆ ಬಿಡುಗಡೆ ಮಾಡಿಲ್ಲ.

ಈ ಮಧ್ಯೆ, ಹೂತಿ ಬಂಡುಕೋರರ ವಿರುದ್ಧ ಪ್ರತೀಕಾರ ಕ್ರಮಗಳು ಸೋಮವಾರ ರಾತ್ರಿಯಿಂದಲೇ ಆರಂಭವಾಗಿದ್ದು, ಯೆಮನ್‌ನ ರಾಜಧಾನಿ ಸಾನಾದಲ್ಲಿ ಬಂಡುಕೋರರ ನೆಲೆಗಳನ್ನೇ ಗುರಿಯಾಗಿ ಇಟ್ಟುಕೊಂಡು ಬಾಂಬ್ ದಾಳಿ ನಡೆದಿದೆ. ಈ ದಾಳಿಗಳಲ್ಲಿ ಕನಿಷ್ಠ 12 ಮಂದಿ ಮೃತಪಟ್ಟಿದ್ದಾರೆ ಎಂದು ಬಂಡುಕೋರರು ಹೇಳಿದ್ದಾರೆ. ಈ ದಾಳಿಯ ವಿಡಿಯೊ ದೃಶ್ಯಗಳನ್ನು ಸಹ ಬಿಡುಗಡೆ ಮಾಡಲಾಗಿದೆ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT