ಅಮೆರಿಕದ ಹಿರಿಯ ನಾಯಕರ ಜತೆ ಅಜಿತ್ ಡೊಭಾಲ್‌ ಮಹತ್ವದ ಸಭೆ

ವಾಷಿಂಗ್ಟನ್‌: ಭಾರತದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ಡೊಭಾಲ್‌ ಅವರು ‘ನಿರ್ಣಾಯಕ ಮತ್ತು ಹೊಸ ತಂತ್ರಜ್ಞಾನ’ (ಐಸಿಇಟಿ) ಕುರಿತು ಅಮೆರಿಕದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಜೇಕ್‌ ಸುಲ್ಲಿವನ್‌ ಸೇರಿದಂತೆ ಅಮೆರಿಕದ ಹಿರಿಯ ನಾಯಕರ ಜತೆ ಮಹತ್ವದ ಮಾತುಕತೆ ನಡೆಸಲಿದ್ದಾರೆ.

ಭಾರತ– ಅಮೆರಿಕದ ನಡುವೆ ಪರಮಾಣು ಒಪ್ಪಂದದ ಬಳಿಕ ಉಭಯ ದೇಶಗಳ ನಡುವಿನ ಸಂಬಂಧದಲ್ಲಿ ಈಗ ನಡೆಯುವ ಮಾತುಕತೆಗಳು ‘ಮಹತ್ವದ ಮೈಲಿಗಲ್ಲು’ ಆಗಬಹುದು ಎಂದು ಅಧಿಕಾರಿಗಳು, ಶಿಕ್ಷಣ ತಜ್ಞರು ಮತ್ತು ಉದ್ಯಮಿಗಳು ವಿಶ್ಲೇಷಿಸಿದ್ದಾರೆ.

ಈ ಮಹತ್ವದ ಮಾತುಕತೆ ಸಲುವಾಗಿ ಡೊಭಾಲ್ ಅವರು ಸೋಮವಾರ ಅಮೆರಿಕಕ್ಕೆ ಭೇಟಿ ನೀಡಿದ್ದಾರೆ.

ಮಹತ್ವಾಕಾಂಕ್ಷೆಯ ಐಸಿಇಟಿ ಸಭೆಯಲ್ಲಿ ನಡೆಯುವ ಚರ್ಚೆಗಳ ಕುರಿತು ಎರಡೂ ದೇಶಗಳ ಅಧಿಕಾರಿಗಳು ಮಾಹಿತಿ ಬಿಟ್ಟುಕೊಟ್ಟಿಲ್ಲ. ಉಭಯ ದೇಶಗಳ ಸಭೆಯು ಜ.31ರಂದು ಶ್ವೇತಭವನದಲ್ಲಿ ನಡೆಯಲಿದ್ದು, ಸಭೆಯ ಮುಕ್ತಾಯದ ಬಳಿಕ ವಿವರಗಳನ್ನು ತಿಳಿಸುವ ಸಾಧ್ಯತೆ ಇದೆ.

ಟೋಕಿಯೊದಲ್ಲಿ 2022ರ ಮೇ ತಿಂಗಳಿನಲ್ಲಿ ಅಮೆರಿಕ ಅಧ್ಯಕ್ಷ ಜೋ ಬೈಡನ್‌ ಅವರನ್ನು ಪ್ರಧಾನಿ ನರೇಂದ್ರ ಮೋದಿ ಭೇಟಿಯಾಗಿದ್ದರು. ಬಳಿಕ ಬಿಡುಗಡೆಯಾಗಿದ್ದ ಜಂಟಿ ಹೇಳಿಕೆಯಲ್ಲಿ ಐಸಿಇಟಿ ಬಗ್ಗೆ ಮೊದಲ ಬಾರಿಗೆ ಉಲ್ಲೇಖಿಸಲಾಗಿತ್ತು.

ಐವರು ಹಿರಿಯ ಅಧಿಕಾರಿಗಳ ತಂಡದೊಂದಿಗೆ ಡೊಭಾಲ್‌ ಅವರು ಅಮೆರಿಕಕ್ಕೆ ಬಂದಿದ್ದಾರೆ. ಇಸ್ರೊ ಅಧ್ಯಕ್ಷ ಎಸ್‌. ಸೋಮನಾಥ್‌, ಪ್ರಧಾನ ಮಂತ್ರಿಯವರ ಪ್ರಧಾನ ವೈಜ್ಞಾನಿಕ ಸಲಹೆಗಾರ ಅಜಯ್‌ ಕುಮಾರ್‌ ಸೂದ್‌, ರಕ್ಷಣಾ ಸಚಿವಾಲಯದ ವೈಜ್ಞಾನಿಕ ಸಲಹೆಗಾರ ಜಿ. ಸತೀಶ್‌ ರೆಡ್ಡಿ, ದೂರ ಸಂಪರ್ಕ ಇಲಾಖೆಯ ಕಾರ್ಯದರ್ಶಿ ಕೆ. ರಾಜಾರಾಂ, ಡಿಆರ್‌ಡಿಒ ಮಹಾ ನಿರ್ದೇಶಕ ಸಮೀರ್‌ ವಿ. ಕಾಮತ್‌ ಅವರು ತಂಡದಲ್ಲಿದ್ದಾರೆ.