ವೆಲ್ಲಿಂಗ್ಟನ್, ನ್ಯೂಜಿಲೆಂಡ್: ವನವಾಟುವಿನ ಪೆಸಿಫಿಕ್ ದ್ವೀಪಸಮೂಹದಲ್ಲಿ ಭಾನುವಾರ ರಿಕ್ಟರ್ ಮಾಪಕದಲ್ಲಿ 7.0 ತೀವ್ರತೆಯ ಭೂಕಂಪ ಸಂಭವಿಸಿದ್ದು, ಸುನಾಮಿಯ ಅಪಾಯವಿದೆ ಎಂದು ಅಮೆರಿಕದ ಭೂಸರ್ವೇಕ್ಷಣಾ ಇಲಾಖೆ ಎಚ್ಚರಿಕೆ ನೀಡಿದೆ.
ಭೂಕಂಪದ ಕೇಂದ್ರ ಬಿಂದು ಓಲ್ರಿ ಬಂದರಿನಿಂದ 23 ಕಿಲೋಮೀಟರ್ ದೂರದಲ್ಲಿತ್ತು ಹಾಗೂ 27 ಕಿ.ಮೀ. ಆಳದಲ್ಲಿ ಇತ್ತು. ಸುನಾಮಿ ಎದುರಾದರೆ 300 ಕಿ.ಮೀ. ಇರುವ ಕರಾವಳಿಗೆ ಅಪಾಯ ಇದೆ ಎಂದು ತಿಳಿಸಲಾಗಿದೆ. ಸದ್ಯ ಯಾವುದೇ ಸಾವು, ನೋವಿನ ವರದಿಯಾಗಿಲ್ಲ.
ವನವಾಟುವಿನಲ್ಲಿ ಸುಮಾರು 2.80 ಲಕ್ಷ ಜನ ವಾಸಿಸುತ್ತಿದ್ದು, ಭೂಕಂಪ ಹಾಗೂ ಜ್ವಾಲಾಮುಖಿಗಳು ಈ ಭಾಗದಲ್ಲಿ ಸಮಾನ್ಯವಾಗಿವೆ.