ಗುರುವಾರ , ಸೆಪ್ಟೆಂಬರ್ 24, 2020
21 °C

ಆರ್ಥಿಕ ಬಲ ತಂದುಕೊಟ್ಟ ಟಗರು ಸಾಕಾಣಿಕೆ

ವಿ.ಎಂ. ನಾಗಭೂಷಣ Updated:

ಅಕ್ಷರ ಗಾತ್ರ : | |

Prajavani

ಸಂಡೂರು: ಕೃಷಿ ಆಧಾರಿತ ಟಗರು ಸಾಕಾಣಿಕೆ ಉದ್ಯಮ ತಾಲ್ಲೂಕಿನ ಭುಜಂಗನಗರ ಗ್ರಾಮದ ರೈತ ಬಿ.ಜಿ. ಯರಿಸ್ವಾಮಿಯವರಿಗೆ ಆರ್ಥಿಕ ಬಲ ತಂದುಕೊಟ್ಟಿದೆ.

ಮುದ್ರಾ ಯೋಜನೆ ಅಡಿಯಲ್ಲಿ ₹6.50 ಲಕ್ಷ ಸಬ್ಸಿಡಿ ಸಹಿತ ಸಾಲದೊಂದಿಗೆ ತಮ್ಮ ಹೊಲದಲ್ಲಿ ಟಗರು ಸಾಕಾಣಿಕೆ ಆರಂಭಿಸಿರುವ ಅವರು, ಎರಡು ವರ್ಷಗಳಿಂದ ಈ ಉದ್ಯಮವನ್ನು ಯಶಸ್ವಿಯಾಗಿ ನಡೆಸಿಕೊಂಡು ಹೋಗುತ್ತಿದ್ದಾರೆ.

‘ಮೊದಲ ವರ್ಷ 150 ಟಗರುಗಳನ್ನು ತಂದು ಸಾಕಿದೆ. ಆಗ ಮೇವಿನ ಕೊರತೆ ಉಂಟಾಗಿ ಹೆಚ್ಚಿನ ಲಾಭ ದೊರೆಯಲಿಲ್ಲ. ಈಗ ಪ್ರತಿಬಾರಿ 50 ಕೆಂದಗುರಿ ತಳಿಯ ಟಗರಿನ ಮರಿಗಳನ್ನು ತಲಾ ₹3,800 ರಿಂದ ₹4,200ಕ್ಕೆ ಒಂದರಂತೆ ಕೊಪ್ಪಳ ಜಿಲ್ಲೆಯ ಕುಂಕುಮಪಾಳ್ಯದಿಂದ ತಂದು ಶೆಡ್‍ನಲ್ಲಿ ಸಾಕಾಣಿಕೆ ಮಾಡುತ್ತಿರುವೆ. ಆರು ತಿಂಗಳು ಸಾಕಾಣಿಕೆ ಮಾಡಿ ತಲಾ ₹8 ರಿಂದ ₹8.50 ಸಾವಿರಕ್ಕೆ ಒಂದರಂತೆ ಮಾರಾಟ ಮಾಡುತ್ತಿರುವೆ’ ಎಂದರು.

ಟಗರಿಗೆ ಬೇಕಾದ ಮೇವು ಅವರ ಅಡಿಕೆ ತೋಟದಲ್ಲಿಯೇ ಬೆಳೆಯುತ್ತಾರೆ. ಮೇವು ಕತ್ತರಿಸುವ ಯಂತ್ರವನ್ನು ಕೃಷಿ ಇಲಾಖೆಯಲ್ಲಿ ಸಬ್ಸಿಡಿಯಲ್ಲಿ ಖರೀದಿಸಿದ್ದಾರೆ. ಒಣ ರಾಗಿ, ಹುಲ್ಲು, ಶೇಂಗಾ ಮತ್ತು ಕಡ್ಲಿ ಹೊಟ್ಟು, ಸಜ್ಜೆ, ಮೆಕ್ಕೆಜೋಳದ ಹಿಂಡಿ ಸಹ ಕೊಡುತ್ತಾರೆ. ದಿನಕ್ಕೆ ನಾಲ್ಕು ಸಲ ಆಹಾರ ಕೊಡುತ್ತಾರೆ.

ಟಗರುಗಳಿಂದ ವರ್ಷಕ್ಕೆ 4 ರಿಂದ 5 ಟ್ರ್ಯಾಕ್ಟರ್ ಗೊಬ್ಬರ ಬರುತ್ತದೆ. ಅದನ್ನು ಅವರ ಹೊಲಕ್ಕೆ ಉಪಯೋಗಿಸಿಕೊಳ್ಳುತ್ತಾರೆ. ಅವರ ಕೆಲಸಕ್ಕೆ ಪತ್ನಿ ಸುಧಾ ಕೂಡ ನೆರವಾಗುತ್ತಿದ್ದಾರೆ. ಟಗರುಗಳನ್ನು ಉತ್ತಮವಾಗಿ ಪೋಷಣೆ ಮಾಡುತ್ತಿರುವುದರಿಂದ ಜನ ಅವರ ಬಳಿಯೇ ಬಂದು ಖರೀದಿಸುತ್ತಿದ್ದಾರೆ.

ಒಂದುವರೆ ಎಕರೆಯಲ್ಲಿ ಟಗರು ಸಾಕುತ್ತಿರುವ ಯರಿಸ್ವಾಮಿಯವರು, ಅದರ ಮಗ್ಗುಲಲ್ಲಿ ಜವಾರಿ ಕೋಳಿ ಸಾಕಾಣಿಕೆ ಮಾಡುವ ಯೋಜನೆ ಹಾಕಿಕೊಂಡಿದ್ದಾರೆ. ಈಗಾಗಲೇ ಶೆಡ್‌ ನಿರ್ಮಿಸಿದ್ದಾರೆ. 

 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು