ಕವನ | ಜಾತ್ರೆ ಪೇಟೆಯ ಚಿತ್ರಗಳು

ನನಗವರ ಪರಿಚಯ ಸಿಕ್ಕಿದ್ದು ನಿಜ
ತಳ್ಳಾಟದಲಿ ಮಾತಾಡಲೆಂದು
 ಸಾಗಿದರೆ ಮುಖ ತಿರುಗಿಸಿದರು

ಗೂಡೆರಾಶಿ ಹಾಕಿದವನೊಬ್ಬ
ಬೆಳಗಿಂದ
ಸರಕು ತೀರಿಯೇ ಹೋಗಿದೆ
ಎಂದು ಬೊಬ್ಬೆ ಹೊಡೆಯುತ್ತಿದ್ದ
ಹತ್ತಿರ ಹೋಗಿ ನೋಡಿದರೆ
ಎಲ್ಲವೂ ಇದ್ದಂತೆಯೇ ಇದೆ!

ಮುಖವಾಡಗಳ ಕೊಳ್ಳುವವರು
ಅದೆಷ್ಟು ಮಂದಿ
ಎಲ್ಲರಿಗೂ ರಕ್ಕಸನೋ ಭೂತವೋ
ತಪ್ಪಿದರೆ
 ಪಿಶಾಚಿಯೋ ಆಗುವ ಚಪಲ

ಹಳೆದೆಲ್ಲ ಮರೆತು ಹೊಸದಾಗಿ ಇರಬೇಕು ಎಂದು
ಕೈ ಕೈ ಹಿಡಿಯುತ್ತ ಸಾಗುತ್ತಿದ್ದಾರೆ
ದಂಪತಿಗಳು
ದಾರಿ ಸಾಗಿದಂತೆ ಕೈ ಬದಲಾದದ್ದು ತಿಳಿಯುವುದೇ ಇಲ್ಲ.

ತಾಯಿ ಒಬ್ಬಳು
ಎರಡು ಕೈಗಳಲ್ಲೂ ಬೆಳಕು ಮಾರುತ್ತಿದ್ದಾಳೆ
ಎದೆಗವಚಿಕೊಂಡ ಜೋಳಿಗೆಯಲ್ಲಿ
ಗುಟುಕು ಹಾಲಿಗೆ ಬಾಯಿ ಬಿಡುತ್ತಿದೆ ಮಗು
 ಸಿಗದೆ ಕಂಗಾಲು

ಪೇಟೆಯ ತುದಿ ತುದಿಗೆ
ಮಬ್ಬು
ಅಲ್ಲಿ ಅರೆ ಬಿರಿದ
ಮೊಗ್ಗುಗಳಿಗೆ ಪನ್ನೀರು ಚುಮುಕಿಸುತ
ಅತ್ತರನು ಹೊಡೆಯುತ್ತ
ಬಲವಂತವಾಗಿ ಅರಳಿಸಿ
ಎಲ್ಲರಿಗೂ ಸುಗಂಧ ಹರಡಿಸುವ ಸವಾಲು
ಆ ಹೂವುಗಳ
ಕೊಳ್ಳಲು ಎಷ್ಟೊಂದು ಮಂದಿ!

ಜಗದ ಸಿಂಗಾರ ನೋಡಿರಯ್ಯಾ
ಎಲ್ಲೆಲ್ಲೂ ಮಳೆಬಿಲ್ಲ ರಂಗ ಕಾಣಿರಯ್ಯಾ
ಎಂದು ಕುರುಡರೆಲ್ಲ ಒಟ್ಟಾಗಿ
ಹಾಡಿ ನಲಿಯುತ್ತಿದ್ದಾರೆ

ಅಡಿಗಡಿಗೆ ಚೆಂಡೆ ಮದ್ದಳೆ
ಸಕಲ ಅಪಸ್ವರಗಳ ಮೇಳ
ನಡುವೆ ತೇರಿನಲ್ಲಿ ದೇವರು

ಎಲ್ಲ ಕಂಡೂ ಕಾಣದಂತೆ
ಓಕುಳಿಗೆ ಕಾಯುತ್ತ
ಅವ ಶಾಂತ ಅಚಲ.