ಗುಬ್ಬಿಗೂಡಂಥದ್ದೊಂದು ಅಂಗೈ ಅಗಲದ
ಗುಡಿಸಲು ಕಟ್ಟಿಕೊಂಡು ಕೋಗಿಲೆಯಂತೆ
ಸದಾ ಇಂಪಾದ ರಾಗ ಗುಣುಗುತ್ತೆ
ಕಾಗೆಯ ಗೂಡಲ್ಲಿಟ್ಟ ಮೊಟ್ಟೆಗಳು
ಕೈಕಾಲು ಆಚೆ ತೂರುವಾಗ ಗುಳುಮ್ಮನೆ
ಹಾವೊಂದು ಗುಟುಕು ನುಂಗಿದೆ
ಗಾಳಿಗೆ ಸವಾಲೆಸೆದು ಬಂದ ಹದ್ದೊಂದು
ದೇಹದ ತುಂಬೆಲ್ಲಾ ಪರಚಿ ಹರಿದು
ಹೆಡೆಗೆ ಕುಕ್ಕಿದರೆ ಹರಿದ ರಕ್ತದ ಸುತ್ತಾ
ಜಿಗಣೆಗಳು ಮುತ್ತಿ ಅಸಂಖ್ಯ ಸೊಳ್ಳೆ
ನೊಣಗಳು ಮನೆ ಮಾಡಿ
ಡ್ರ್ಯಾಗನ್ ನ ತತ್ತಿಗಳಿಡುತ್ತವೆ
ತಿಪ್ಪೆ ಕೆದರುವ ಕೋಳಿ ಎರೆಹುಳವನೊಂದೊಯ್ದು
ನದಿಯ ಮೀನಿನೊಡಲಿಗೆ ದಾಟಿಸಿದೆ
ಚೂಪಾದ ಕೊಕ್ಕು ತೂರಿಸಿ ಹಿಡಿದು
ಕಿಂಗ್ ಫಿಷರ್ ಹಾರಲೆತ್ನಿಸುವಾಗ
ಏಡಿ ಕಾಲು ಹಿಡಿದೆಳೆದು ಮೀನ ಮತ್ತದೇ
ನೀರಿಗೆ ಜಾರಿಸಿಕೊಳ್ಳುವುದು
ಬೇಟೆಯ ಅಟ್ಟಿಸಿಕೊಂಡು ಬರುತ್ತಿದೆ ಚಿರತೆ
ಓಟಕ್ಕೆ ನಿಂತ ಕುದುರೆಗೆ ತಾನೆ ಬೇಟೆ ಅಂತ
ತಿಳಿಯುವುದೇ ಇಲ್ಲ ಓಡುತ್ತಿದೆ
ಮದಗಜದ ಜೊತೆ ಮುದಿ ಸಿಂಹ ಸೆಣಸಾಡಿ
ಸೋಲೂ ಒಪ್ಪದೆ ಗೆಲ್ಲಲೂ ಆಗದೆ
ನರಿ ಬುದ್ಧಿ ಆವಾಹಿಸಿಕೊಂಡಿದೆ
ಕದ್ದು ಹಾಲು ಕುಡಿಯಲು ಬಂದ ಬೆಕ್ಕು
ಸದ್ದು ಮಾಡಿ ಇಲಿ ಹಿಡಿದು ಆಚೆ ಬಂದಿದೆ
ಮುಂಗುಸಿ ಗತಿ ಇಲ್ಲದ ಮನೆಯಲ್ಲಿ
ಹಾವಿನದೇ ದರಬಾರು ಕಾದಾರಿದ
ಕೆನೆಹಾಲು ವಿಷಯುಕ್ತಗೊಂಡು
ಅದನ್ನು ಬಟ್ಟಲಿಗೆ ಸುರಿವಾಗ ಗೋಡೆಯ
ಹಲ್ಲಿ ಲೊಚಗುಟ್ಟುತ್ತದೆ
ಕೊನೆಗೆ ಅಜಾನು ಗರಿಬಿಚ್ಚಿದ ನವಿಲೊಂದು
ಎಲ್ಲವನ್ನೂ ಇಲ್ಲವಾಗಿಸಿ ಕ್ರಾಂತಿ ಸತ್ತ
ಮನುಷ್ಯರೊಂದಿಗೆ ವೈರತ್ವ ಕಾರುತ್ತಲೇ
ತಾನೂ ಇಲ್ಲವಾಗುತ್ತದೆ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.