ಕವಿತೆ: ಕಳೆದುದು ಸಿಕ್ಕಿತು

ಕಿರೀಟದಂತಹದ್ದೇನೋ ತೊಡಿಸಿದರು
ಶಾಲು , ಮಣಿಹಾರ, ಹಣ್ಣಿನ ಬುಟ್ಟಿ,
ಹೊರಲಾರದಷ್ಟು ದೊಡ್ಡ ಫಲಕ,
ಕಟ್ಟು ಹಾಕಿದ ಪ್ರಶಸ್ತಿ ಪತ್ರ

ಪ್ರಶಂಸೆ, ಗುಣಗಾನ, ಚಪ್ಪಾಳೆ
ಬೀಗಿ ಕುಳಿತಿದ್ದೆ ನಾನು...
ತನಗೆ ಸಂಬಂಧಿಸಿದ್ದೇ ಅಲ್ಲ ಎಂಬಂತೆ
ಕವಿತೆ ತನ್ನ ಪಾಡಿಗೆ ತಾನು!

ಕಟ್ಟಕಡೆಗೆ ಧನ್ಯವಾದ ಹೇಳಿ ಸಭೆ ಚದುರಿತು
ಉಳಿದವರಿಬ್ಬರೇ... ಮುಂದೇನು?
ತುಟಿಯಂಚಿನಲ್ಲೇ ಹಗೆಯಿಲ್ಲದ 
ನಗೆಯದು ನಕ್ಕಿತು!
ಉಕ್ಕಿದ್ದು ಝರ್ರೆಂದು ತಗ್ಗಿತು ಬಗ್ಗಿತು
ಹೌದು.... ಕಳೆದುದು ಸಿಕ್ಕಿತು !