ಕವನ: ಗಾಂಧಿ ಇರುವರು ನಿಮ್ಮೊಳಗೆ ನೀವು ಬಯಸದಿದ್ದರೂ....

ಉಪವಾಸ ಆಗ್ರಹ ಸಂವಾದ
ಧರಣಿ ಮೆರವಣಿಗೆ ಬರವಣಿಗೆ
ಎಲ್ಲಾ ಹೂಬಾಣಗಳೇ....
ಒಲಿಸುವುದು ಸಹಿಸುವುದು
ಭರಿಸುವುದು ರೂಢಿಯಾಗಿದೆ
ಬೇರೆ ರೀತಿಯಲ್ಲಿ ನೀನು ಸೆಣೆಸಲಾರೆ

ಔಷಧೀಯ ಗುಣವಿದೆ ಬೇವು 
ಬೆಲ್ಲ, ಹಾಲು, ನೀರು, ನೆಲಗಡಲೆಗೆ 
ದುಡಿಯದೆ ಉಣ್ಣಲಾರೆ
ಗುರಿ ಇರದ ದಾರಿ ನಡೆಯಲಾರೆ...

ಸುಳ್ಳಾಡುವ ನಾಲಿಗೆ ಆಗಾಗ್ಗೆ ತಡವರಿಸುವುದು
ಕತ್ತಿ ಬೀಸಲು ರಕ್ತ ಚೆಲ್ಲಲು ಮನ ಹೇಸುವುದು, ತಬ್ಬಿದವನನ್ನು
ದಬ್ಬಲು ಹಿಂಜರಿಯುವುದು ಮಣ್ಣಿನ ಗುಣ ಕದಲಿಸಲಾರೆ

ಒಡೆದರೂ ಸಾವಿರದ ಮೂರುತಿ
ಕೆಡಗಿದರೂ ಚಿಮ್ಮುವ ಜೀವಶಕ್ತಿ!