ಸಿಹಿತಿಂಡಿ ಪ್ರವೀಣೆ ಸುಪ್ರೀತಾ...

7

ಸಿಹಿತಿಂಡಿ ಪ್ರವೀಣೆ ಸುಪ್ರೀತಾ...

Published:
Updated:
Deccan Herald

ನಾನು ಸಿಹಿತಿಂಡಿ ಪ್ರಿಯೆ. ಹಾಗಾಗಿ ಎಲ್ಲಾ ಬಗೆಯ ಸಿಹಿಗಳನ್ನು ಚೆನ್ನಾಗಿ ಮಾಡುತ್ತೇನೆ. ಕ್ಯಾರೆಟ್‌ ಹಲ್ವಾ, ಬೇಸನ್‌ ಲಡ್ಡು, ಬೇರೆಬೇರೆ ಬಗೆಯ ಕೇಕ್‌ಗಳನ್ನು ಮಾಡುತ್ತೇನೆ. ಸಿಹಿತಿಂಡಿಗಳನ್ನು ಮಾಡುವುದು ಸುಲಭ. ಇದಕ್ಕೆ ಒಂದು ವೇಳೆ ಸ್ವಲ್ಪ ಸಕ್ಕರೆ ಜಾಸ್ತಿ ಹಾಕಿದರೂ ಅದು ಸ್ವಲ್ಪ ಸಿಹಿ ಜಾಸ್ತಿ ಆಗಬಹುದಷ್ಟೇ, ತಿನ್ನಬಹುದು. ಆದರೆ ಉಳಿದ ಅಡುಗೆಗಳು ಹಾಗಲ್ಲ, ಉಪ್ಪು, ಖಾರ, ಹುಳಿ, ಮಸಾಲೆ ಸ್ವಲ್ಪ ಹೆಚ್ಚು ಕಡಿಮೆಯಾದರೂ ಅಡುಗೆ ಹಾಳಾಗುತ್ತದೆ.

ನನಗೆ ಅಮ್ಮನ ಹಾಗೇ ರುಚಿರುಚಿಯಾಗಿ ಅಡುಗೆ ಮಾಡಲು ಬರುವುದಿಲ್ಲ. ಮನೆಯಲ್ಲಿ ಒಬ್ಬಳೇ ಇದ್ದಾಗ ಅಡುಗೆ ಮಾಡಿಕೊಳ್ಳುತ್ತಿದ್ದೆ. ಈಗ ಪಿಜಿಯಲ್ಲಿ ಇರುವುದರಿಂದ ಚಿತ್ರೀಕರಣದಿಂದ ಬಿಡುವು ಸಿಕ್ಕಾಗ ಒಮ್ಮೊಮ್ಮೆ ಅಡುಗೆ ಮಾಡುವುದುಂಟು. ಅನ್ನ–ಸಾರು, ಅನ್ನ–ಟೊಮೆಟೊ ಗೊಜ್ಜು, ಪುಳಿಯೋಗರೆ, ಬಿಸಿಬೇಳೆಬಾತ್, ಪಲಾವ್‌ ಇಂತಹ ಕೆಲ ಸರಳ ಅಡುಗೆಗಳು ಗೊತ್ತಿದೆ. ಸಣ್ಣವಳಿದ್ದಾಗ ನಾನು ಟಿವಿ, ಅಡುಗೆ ಪುಸ್ತಕ ನೋಡಿ ಹೊಸ ಅಡುಗೆ ಪ್ರಯೋಗ ಮಾಡುತ್ತಿದ್ದೆ. ಆದರೆ ಆಗೆಲ್ಲಾ ಬೈಸಿಕೊಳ್ತಾ ಇದ್ದೆ. ಏನೋ ಮಾಡೋಕೆ ಹೋಗಿ ಏನೋ ಆಗಿಬಿಡುತ್ತಿತ್ತು. 

ನಾನು ಅಡುಗೆ ಮಾಡಲು ಹೋಗಿ ಮಾಡಿಕೊಂಡ ಎಡವಟ್ಟು ಒಂದೆರಡಲ್ಲ. ಅಮ್ಮ ಉದ್ಯೋಗಿ. ಕೆಲಸಕ್ಕೆ ಹೋಗಿದ್ದರು. ಹಾಗಾಗಿ ಅವತ್ತು ನಾನೇ ಅಡುಗೆ ಮಾಡಿಕೊಳ್ಳಬೇಕಿತ್ತು. ನಮ್ಮ ಮನೆಯಲ್ಲಿ ಕುಕ್ಕರ್‌ ಒಳಗೆ ಬಟ್ಟಲಲ್ಲಿ ಅನ್ನ ಬೇಯಿಸುವುದು. ನಾನು ಅಮ್ಮನ ಅನುಕರಿಸುವ ಹಾಗೇ ಬಟ್ಟಲಲ್ಲಿ ಅಕ್ಕಿ, ನೀರು ಹಾಕಿ ಕುಕ್ಕರ್‌ ಒಳಗೆ ಇಟ್ಟೆ. ಆದರೆ ಕುಕ್ಕರ್‌ಗೂ ನೀರು ಹಾಕಬೇಕು ಎಂದು ಗೊತ್ತಿರಲಿಲ್ಲ. ಮುಚ್ಚಳ ಮುಚ್ಚಿದೆ. ವಿಶಲ್‌ ಹಾಕಿರಲಿಲ್ಲ. ಗ್ಯಾಸ್‌ ಆನ್‌ ಮಾಡಿ ಬಂದೆ.

ಎಷ್ಟು ಹೊತ್ತಾದ್ರೂ ವಿಶಲ್‌ ಕೂಗಲೇ ಇಲ್ಲ. ಅಮ್ಮ ಬಂದು ನೋಡಿದಾಗಲೇ ಗೊತ್ತಾಗಿದ್ದು, ಅವರು ಗ್ಯಾಸ್‌ ಆಫ್‌ ಮಾಡಿ ಹೋಗಿದ್ದರು ಎಂದು. ಒಂದು ವೇಳೆ ಆನ್‌ ಆಗಿರುತ್ತಿದ್ದರೆ ಏನಾದರೂ ಅನಾಹುತ ಆಗುತ್ತಿತ್ತೋ ಏನೋ!

ಅಡುಗೆ ಎಂದಾಗ ಇತ್ತೀಚೆಗೆ ನಡೆದ ಪಲಾವ್‌ ಎಡವಟ್ಟು ನೆನಪಿಗೆ ಬರುತ್ತದೆ. ಶೂಟಿಂಗ್‌ ಇರಲಿಲ್ಲ. ಹಾಗೇ ಪಿಜಿಯಲ್ಲಿ ಇದ್ದಾಗ ಪಲಾವ್‌ ಮಾಡುವ ಎಂದು ತಯಾರಿ ಮಾಡಿಕೊಂಡೆ. ಅಕ್ಕಿ ಕಡಿಮೆ ಇತ್ತು. ಬೇಳೆ ಹಾಕಿದೆ. ಲವಂಗ, ಚಕ್ಕೆ, ಉಳಿದ ಮಸಾಲ ಪದಾರ್ಥ ಹಾಕಿದೆ. ಪಲಾವ್‌ ಮಸಾಲ ಎಂದು ಬಿಸಿಬೇಳೆಬಾತ್‌ ಮಸಾಲ ಪುಡಿ ಹಾಕಿದೆ. ಕೊನೆಗೆ ತಿನ್ನುವಾಗ ಅದು ಪಲಾವಾ? ಬಿಸಿಬೇಳೆಬಾತಾ? ಅನ್ನ– ಸಾರಾ? ಒಂದೂ ಗೊತ್ತಾಗಲಿಲ್ಲ. ರುಚಿನೂ ಕೆಟ್ಟದ್ದಾಗಿತ್ತು. 

ನನಗೆ ಬೇಸನ್‌ ಲಾಡು ಅಂದ್ರೆ ತುಂಬ ಇಷ್ಟ. ಆಗಾಗ ಮಾಡಿಕೊಂಡು ತಿನ್ನುತ್ತೇನೆ. ನಾನು ಮೊದಲ ಬಾರಿ ಲಾಡು ಮಾಡಿದಾಗ ಅದಕ್ಕೆ ತುಪ್ಪ ಜಾಸ್ತಿ ಆಗಿದ್ದರಿಂದ ಕೇಸರಿ ಬಾತ್‌ ಆಗಿತ್ತು. ಈಗಲೂ ಅಷ್ಟೇ, ಅದರಲ್ಲಿ ಏನಾದರೂ ಹೆಚ್ಚು ಕಡಿಮೆಯಾಗಿ ಉಂಡೆ ಕಟ್ಟಲು ಆಗುವುದೇ ಇಲ್ಲ. ಹಾಗೇ ಚಮಚದಲ್ಲಿ ತಿನ್ನುತ್ತೇನೆ. ರಜೆ ಇದ್ದಾಗ ಮೈಸೂರಿನ ನಮ್ಮ ಮನೆಗೆ ಹೋಗುತ್ತೇನೆ. ಅಲ್ಲಿ ಸಂಬಂಧಿಕರು ಇದ್ದಾಗ ನನ್ನ ಸಿಹಿತಿಂಡಿ ಪ್ರಯೋಗ ಇದ್ದೇ ಇರುತ್ತದೆ.

ನನಗೆ ಮನೆಯೂಟ, ಹೋಟೆಲ್‌ ಊಟ ಎರಡೂ ಇಷ್ಟ. ಫಿಜ್ಜಾ ಇಷ್ಟ. ಹೋಟೆಲ್‌ಗೆ ಹೋದಾಗ ಮುಘಲೈ ಬಿರಿಯಾನಿ ತಿನ್ನುತ್ತೇನೆ.

**

ಬೇಸನ್‌ ಲಾಡು

ಬೇಕಾಗುವ ಸಾಮಗ್ರಿಗಳು: ಕಡ್ಲೆಹಿಟ್ಟು- 2 ಕಪ್, ಸಕ್ಕರೆ- 1 ಕಪ್, ತುಪ್ಪ - 3/4 ಕಪ್, ಏಲಕ್ಕಿಪುಡಿ, ಒಣದ್ರಾಕ್ಷಿ - 15, ಗೋಡಂಬಿ, ಪಿಸ್ತಾ.

ತಯಾರಿಸುವ ವಿಧಾನ: ಒಂದು ದಪ್ಪ ತಳದ ಬಾಣಲೆಯಲ್ಲಿ ಕಡ್ಲೆಹಿಟ್ಟಿಗೆ ತುಪ್ಪ ಸೇರಿಸಿ ಸಣ್ಣ ಉರಿಯಲ್ಲಿ ಚೆನ್ನಾಗಿ ಪರಿಮಳ ಬರುವಂತೆ ಹುರಿಯಿರಿ. ದ್ರಾಕ್ಷಿ, ಗೋಡಂಬಿ, ಪಿಸ್ತಾ  ಚೂರುಗಳನ್ನು ತುಪ್ಪದಲ್ಲಿ ಹುರಿದುಕೊಳ್ಳಿ. ಸಕ್ಕರೆಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿ ಮಾಡಿಕೊಳ್ಳಿ.

ಹುರಿದ ಹಿಟ್ಟನ್ನು ಸ್ವಲ್ಪ ಸಮಯ ತಣಿಯಲು ಬಿಡಿ. ಹಿಟ್ಟು ಉಗುರುಬೆಚ್ಚಗೆ ಇರುವಾಗ ಇದಕ್ಕೆ ಸಕ್ಕರೆ ಪುಡಿ, ಏಲಕ್ಕಿಪುಡಿ, ಹುರಿದುಕೊಂಡ ಒಣಹಣ್ಣುಗಳನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ ಒಂದೇ ಅಳತೆಯ ಉಂಡೆಗಳನ್ನು ಮಾಡಿ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !