ಗುರುವಾರ , ಜೂನ್ 24, 2021
25 °C

ಅಂತೂ-ಇಂತೂ ಒಪ್ಪಿಗೆ ಸಿಕ್ಕಿತು.....!

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಗದಗ: ಸರಿ ಸುಮಾರು ಆರೇಳು ವರ್ಷದ ಸತತ ಹೋರಾಟಕ್ಕೆ ಈಗ ಸ್ವಲ್ಪ ಜಯ ಸಿಕ್ಕಂತೆ ಆಗಿದೆ. ಅದು ಗದಗ-ವಾಡಿ, ಗದಗ-ಹಾವೇರಿ ಹೊಸ ರೈಲು ಮಾರ್ಗದ ವಿಚಾರದಲ್ಲಿ.



ಕೇಂದ್ರ ಸರ್ಕಾರ ಬುಧವಾರ ಮಂಡಿಸಿದ ರೈಲ್ವೆ ಮುಂಗಡ ಪತ್ರದಲ್ಲಿ ಈ ಎರಡು ಹೊಸ ಮಾರ್ಗಗಳಿಗೆ ಅನುಮತಿಯನ್ನು ನೀಡಿ, ಯೋಜನಾ ಅನುಷ್ಠಾನಕ್ಕಾಗಿ ಅರ್ಥಿಕ ಇಲಾಖೆಗೆ ಪ್ರಸ್ತಾವನೆಯನ್ನು ಕಳುಹಿಸಿರುವು ದರಿಂದ ಇಂದಲ್ಲ ನಾಳೆ ಅಂತೂ ಈ ಮಾರ್ಗಗಳಲ್ಲಿ ರೈಲು ಓಡಾಡುತ್ತದೆ ಎನ್ನುವ ಆಶಾವಾದವನ್ನು ರೈಲ್ವೆ ಹೋರಾಟಗಾರರು ತಾಳಿದ್ದಾರೆ.



ಮುಂಬೈ ಕರ್ನಾಟಕ ಹಾಗೂ ಹೈ-ಕ ನಡುವೆ ಕೊಂಡಿಯಾಗಿರುವುದು ಗದಗ. ಇಲ್ಲಿಂದ ವಾಡಿಗೆ ರೈಲು ಮಾರ್ಗ ರಚನೆಯಾದರೆ ದಕ್ಷಿಣ ಕರ್ನಾಟದ ಜನರೂ ಕೂಡಾ ನೇರವಾಗಿ ದೆಹಲಿಗೆ ಪ್ರಯಾಣಿಸಬಹುದಾಗಿದೆ. ಅಲ್ಲದೆ ಹುಬ್ಬಳ್ಳಿ-ಗುಲ್ಬರ್ಗಾಕ್ಕೂ ನೇರ ಸಂಪರ್ಕವಾಗುತ್ತದೆ.



ಈ ಹೊಸ ಮಾರ್ಗವನ್ನು 2008-09ರ ಬಜೆಟ್‌ನಲ್ಲಿ ಘೋಷಣೆ ಮಾಡಲಾಗಿತ್ತು. ಸುಮಾರು 1395 ಕೋಟಿ ರೂಪಾಯಿ ವೆಚ್ಚದ 252.50 ಕಿಲೋಮೀಟರ್ ದೂರದ ಮಾರ್ಗ ಇದಾಗಿದೆ. ಈ ಮಾರ್ಗ ಹೋಗುವ ದಾರಿಯಲ್ಲಿ ಸಿಮೆಂಟ್ ಕಾರ್ಖಾಗಳಿವೆ. ಪ್ರಸ್ತುತ ಹುಬ್ಬಳ್ಳಿ ಕಡೆಗೆ ಸಿಮೆಂಟ್ ವ್ಯಾಗನ್‌ಗಳು ಬರಬೇಕಾದರೆ ಆಂಧ್ರ ಪ್ರದೇಶದ ಗುಂತಕಲ್ ಜಂಕ್ಷನ್ ಬಳಸಬೇಕು.



ಆದರೆ ಈ ಮಾರ್ಗ ಪ್ರಾರಂಭ ವಾದರೇ ವ್ಯಾಗನ್‌ಗಳು ಗದುಗಿ ನಿಂದಲೇ ಹೋಗಬಹುದು. ಇದ ರಿಂದ ವಾರ್ಷಿಕ ಸುಮಾರು 300ರಿಂದ 400 ಕೋಟಿ ಆದಾಯ ರೈಲ್ವೆ ಇಲಾಖೆಗೆ ದೊರೆಯುತ್ತದೆ ಎಂದು ನೈರುತ್ಯ ರೈಲ್ವೆ ಬಳಕೆದಾರರ ಸಮಿತಿ ಸದಸ್ಯ ಆದಪ್ಪಗೌಡರು ಅಭಿಪ್ರಾಯ ಪಡುತ್ತಾರೆ.



ಇನ್ನೂ ಹಾವೇರಿ-ಗದಗ ಮಾರ್ಗ

ವಾಸ್ತವದಲ್ಲಿ ಇದು ಹಾವೇರಿ ಜಿಲ್ಲೆಯ ಯಲುವಿಗಿಗೆ ಸಂಪರ್ಕ ಕಲ್ಪಿಸುತ್ತದೆ. 299 ಕೋಟಿ ವೆಚ್ಚದ 53 ಕಿಲೋ ಮೀಟರ್ ದೂರದ ಈ ಮಾರ್ಗವು ಪ್ರಾರಂಭವಾದರೇ ಬೆಂಗಳೂರು- ಮೈಸೂರು ಕಡೆಗೆ ಹೋಗುವ ಪ್ರಯಾಣಿಕರಿಗೆ ಬೈಪಾಸ್ ದಾರಿ ಸಿಕ್ಕಂತೆ ಆಗುತ್ತದೆ.



ಈ ಮಾರ್ಗಕ್ಕೆ 2006ರಿಂದಲೇ ಹೋರಾಟ ಪ್ರಾರಂಭವಾಗಿತ್ತು. ಸ್ಥಳೀಯ ರಾಜಕೀಯ ನಾಯಕರು, ರೈಲ್ವೆ ಹೋರಾಟಗಾರರು ಹಲವಾರು ಬಾರಿ ಮನವಿಯನ್ನು ಸಲ್ಲಿಸಿದ್ದರು. ಆದರೆ ರೈಲ್ವೆ ಇಲಾಖೆ ಈ ಮಾರ್ಗ ಅಷ್ಟೊಂದು ಲಾಭದಾಯಕವಾಗಿಲ್ಲ ಎನ್ನುವ ಉತ್ತರನ್ನು ಕೊಟ್ಟಿತ್ತು. ಬಳಿಕ ಸಮರ್ಥವಾದ ಮನವರಿಕೆಯಾದ ಬಳಿಕ ಮಾರ್ಗಕ್ಕೆ ಹಸಿರುನಿಶಾನೆ ಸಿಕ್ಕಿದೆ.



ಸಿಹಿ-ಕಹಿ

ರೈಲ್ವೆ ಬಜೆಟ್ ಗದಗ ಭಾಗಕ್ಕೆ ಸಿಹಿ-ಕಹಿ ಅನುಭವ ನೀಡಿದೆ. ಹುಬ್ಬಳ್ಳಿ-ದೆಹಲಿ, ಹುಬ್ಬಳ್ಳಿ-ಮುಂಬೈ ಮಾರ್ಗದಲ್ಲಿ ರೈಲು ಆರಂಭಿಸಬೇಕು ಎಂದು ಕೇಳಿಕೊಳ್ಳಲಾಗುತ್ತು.ಆದರೆ ಅದು ಘೋಷಣೆಯಾಗಿಲ್ಲ. ಸೊಲ್ಲಾ ಪುರ- ಗದಗ ಮಾರ್ಗ ದ್ವಿಪಥ ಸಮೀಕ್ಷೆ ಸ್ವಾಗತರ್ಹ. 



 ರೈಲ್ವೆ ಹಾಗೂ ಪ್ರಯಾಣಿಕರಿಗೆ ಮೂಲಭೂತ ಸೌಲಭ್ಯ ನೀಡಲು ಹಣ ಕ್ರೂಢೀಕರಿಸುವ ಸಲುವಾಗಿ ಪ್ರಯಾಣದರವನ್ನು ಹೆಚ್ಚು ಮಾಡಿರುವುದು ಸರಿಯಾಗಿದೆ ಎಂದು ಇಲ್ಲಿನ ವಾಣಿಜ್ಯೋದ್ಯಮ ಸಂಸ್ಥೆ ಪದಾಧಿಕಾರಿಗಳು ಅಭಿಪ್ರಾಯ ಪಟ್ಟಿದ್ದಾರೆ.

 

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.