ಅತ್ಯಾಚಾರ ಒಪ್ಪಿಕೊಂಡ ಅಸಾರಾಮ್‌ ಪುತ್ರ
ಅಕ್ಷರ ಗಾತ್ರ :ಆ |ಆ |ಆ
ಸೂರತ್‌ (ಪಿಟಿಐ): ವಿವಾದಾತ್ಮಕ ಸ್ವಘೋಷಿತ ದೇವಮಾನವ ಅಸಾರಾಮ್‌ ಬಾಪು ಪುತ್ರ ನಾರಾಯಣ್‌ ಸಾಯಿ ಮಹಿಳೆಯೊಬ್ಬರು ಮಾಡಿರುವ ಅತ್ಯಾಚಾರ ಆರೋಪವನ್ನು ಹೆಚ್ಚು ಕಡಿಮೆ ಒಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
‘ನಮ್ಮ ತೀವ್ರ ವಿಚಾರಣೆ ಸಂದರ್ಭದಲ್ಲಿ, ಸೂರತ್‌ ಮೂಲದ ಇಬ್ಬರು ಸಹೋದರಿಯರಲ್ಲಿ ಒಬ್ಬರು ಮಾಡಿರುವ ಅತ್ಯಾಚಾರ ಆರೋಪವನ್ನು ಸಾಯಿ ಬಹುತೇಕ ಒಪ್ಪಿಕೊಂಡಿದ್ದಾನೆ’ ಎಂದು ಸೂರತ್‌ ಪೊಲೀಸ್‌ ಆಯುಕ್ತರಾದ ರಾಕೇಶ್‌ ಅಸ್ಥಾನಾ ಅವರು ಹೇಳಿದ್ದಾರೆ.
ಎಂಟು ಮಂದಿ ಶಿಷ್ಯೆಯರ ಜತೆಯೂ ದೈಹಿಕ ಸಂಪರ್ಕ ಹೊಂದಿರುವುದಾಗಿ ವಿಚಾರಣೆಯಲ್ಲಿ ಸಾಯಿ ತಿಳಿಸಿದ್ದಾನೆ. ಒಬ್ಬ ಶಿಷ್ಯೆಯಲ್ಲಿ ಈತನಿಗೆ ಒಂದು ಮಗು ಜನಿಸಿದೆ ಎಂಬುದೂ ಈಗ ಬಹಿರಂಗವಾಗಿದೆ. ದೂರುದಾರರ ಸಮ್ಮುಖದಲ್ಲಿ ಸಾಯಿಯನ್ನು ತೀವ್ರ ವಿಚಾರಣೆಗೆ ಒಳಪಡಿಸಲಾಗಿತ್ತು.
58 ದಿನಗಳ ಬಂಧನದಿಂದ ಹೇಗೆ ಆತ ತಪ್ಪಿಸಿಕೊಂಡ ಮತ್ತು ತಲೆಮರೆಸಿಕೊಳ್ಳಲು ಯಾರು ನೆರವು ನೀಡಿದರು ಎಂಬ ಬಗ್ಗೆಯೂ ಸಾಯಿಯನ್ನು ಪ್ರಶ್ನಿಸಲಾಗಿದೆ.
ಸೂರತ್‌ ಮೂಲದ ಇಬ್ಬರು ಸಹೋದರಿಯರು ಸಾಯಿ ಮತ್ತು ಆತನ ತಂದೆ ಅಸಾರಾಮ್‌ ವಿರುದ್ಧ ಅತ್ಯಾಚಾರ, ಲೈಂಗಿಕ ಹಲ್ಲೆ, ಕೂಡಿ ಹಾಕುವಿಕೆ ಮುಂತಾದ ಆರೋಪಗಳನ್ನು ಮಾಡಿದ್ದಾರೆ.
ಅಸಾರಾಮ್‌ ಬಾಪು ಜೋಧ್‌ಪುರದ ತನ್ನ ಆಶ್ರಮದಲ್ಲಿ ಅಪ್ರಾಪ್ತ ಹುಡುಗಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದಲ್ಲಿ ಸೆಪ್ಟೆಂಬರ್‌ನಲ್ಲಿ ಬಂಧನಕ್ಕೆ ಒಳಗಾಗಿದ್ದು ಪ್ರಸ್ತುತ ಜೋಧ್‌ಪುರ ಜೈಲಿನಲ್ಲಿದ್ದಾನೆ.
