ಆಲಿಕಲ್ಲು ಮಳೆ: ಫಲಾನುಭವಿಗಳಿಗೆ ಪರಿಹಾರ ವಿತರಣೆ

ಯಾದಗಿರಿ: ತಾಲ್ಲೂಕಿನಲ್ಲಿ ಈಚೆಗೆ ಸುರಿದ ಆಲಿಕಲ್ಲು ಮಳೆ ಮತ್ತು ಬಿರುಗಾಳಿಯಿಂದ ಹಾನಿಗೊಳಗಾದ ಮನೆಗಳ ಫಲಾನುಭವಿಗಳಿಗೆ ಸಹಾ­ಯಕ ಆಯುಕ್ತ ಬಿ.ಪಿ.ವಿಜಯ್ ನೇತೃ­ತ್ವದಲ್ಲಿ ಸೋಮವಾರ ಪ್ರಕೃತಿ ವಿಕೋಪ ಪರಿಹಾರ ನಿಧಿಯಡಿ ಪರಿ­ಹಾರ ಧನದ ಚೆಕ್‌ ಅನ್ನು ವಿತರಿಸಲಾಯಿತು.



ಜಿಲ್ಲಾ ಉಸ್ತುವಾರಿ ಸಚಿವ ಬಾಬು­ರಾವ್ ಚಿಂಚನಸೂರ, ಜಿಲ್ಲಾಧಿಕಾರಿ ಎಫ್.ಆರ್.ಜಮಾದಾರ್ ನಿರ್ದೇಶ­ನದಂತೆ ಸಹಾಯಕ ಆಯುಕ್ತ ಬಿ.ಪಿ. ವಿಜಯ್ ಮತ್ತು ತಹಶೀಲ್ದಾರ್‌ ಗುರು ಪಾಟೀಲ ನೇತೃತ್ವದಲ್ಲಿ ಗ್ರಾಮ ಲೆಕ್ಕಾಧಿಕಾರಿಗಳು, ಗ್ರಾಮ ನಿರೀಕ್ಷಕರ ತಂಡಗಳನ್ನು ರಚಿಸಿ, ಈ ತಂಡದ ಮೂಲಕ ಅರ್ಹ ಫಲಾನುಭವಿಗಳಿಗೆ ಪರಿಹಾರ ಧನ ವಿತರಿಸಲಾಯಿತು.



ತಾಲ್ಲೂಕಿನ ಕೊಂಕಲ್ ವಲಯ, ಗುರುಮಠಕಲ್ ವಲಯ, ಬಳಿಚಕ್ರ ವಲಯ, ಯಾದಗಿರಿ ವಲಯಗಳಲ್ಲಿ ಹಾನಿಗೊಳಗಾದ ಫಲಾನುಭವಿಗಳಿಗೆ ಪರಿಹಾರ ಧನ ಚೆಕ್ ವಿತರಿಸ­ಲಾಯಿತು. ಪ್ರಕೃತಿ ವಿಕೋಪ ಪರಿಹಾರ ನಿಧಿಯಡಿ ಸಂಪೂರ್ಣ ಮನೆ ಹಾನಿಗೆ ಪರಿಹಾರ, ತೀವ್ರ ಮನೆ ಹಾನಿಯಡಿ ಪಕ್ಕಾ ಮನೆಗಳಿಗೆ ₨12,600-, ಕಚ್ಚಾ ಮನೆಗಳಿಗೆ ₨3,800, ಭಾಗಶಃ ಮನೆ ಹಾನಿಗೆ ₨ 1,900,- ಪಕ್ಕಾ ಮನೆ ಹಾನಿಯಾದಲ್ಲಿ ₨ 3,800-, ಕಚ್ಚಾ ಮನೆ ಹಾನಿಗೆ ₨2,300 ಸೇರಿದಂತೆ ವಿವಿಧ ರೀತಿಯಲ್ಲಿ ಹಾನಿಗೆ ಒಳಗಾದ ಸುಮಾರು 405 ಮನೆಗಳ ಹಾನಿಗೆ ಸಂಬಂಧಪಟ್ಟಂತೆ ಫಲಾನುಭವಿಗಳಿಗೆ ಪರಿಹಾರ ಧನದ ಚೆಕ್ ವಿತರಿಸಲಾಯಿತು.



ಕೊಂಕಲ್ ವಲಯದಲ್ಲಿ ಸುಮಾರು 108, ಗುರುಮಠಕಲ್ ವಲಯದಲ್ಲಿ 35, ಬಳಿಚಕ್ರ ವಲಯದಲ್ಲಿ 252, ಯಾದಗಿರಿ ವಲಯದಲ್ಲಿ 8, ಸೈದಾ­ಪುರ ಹಾಗೂ ಹತ್ತಿಕುಣಿ ವಲಯ­ಗಳಲ್ಲಿ ತಲಾ 1 ಮನೆಗಳು ಭಾಗಶಃ ಹಾನಿಯಾಗಿವೆ. ಮಳೆಯಿಂದ ಗುರು­ಮಠಕಲ್ ವಲಯದಲ್ಲಿ 1 ಜಾನು­ವಾರು ಮೃತಪಟ್ಟಿರುವ ಬಗ್ಗೆ ವರದಿ­ಯಾಗಿದೆ. ಗಾಯಗೊಂಡ ಜನರು, ಬೆಳೆ ಹಾನಿ, ತೋಟಗಾರಿಕೆ ಬೆಳೆಗಳ ಹಾನಿಗೆ ಸಂಬಂಧಿಸಿದಂತೆ ವರದಿ ನೀಡುವಂತೆ ಆಯಾ ಇಲಾಖೆಯ  ಅಧಿಕಾರಿಗಳಿಗೆ ಸೂಚಿಸಲಾಗಿದೆ.



ಮುನ್ನೆಚ್ಚರಿಕೆ ಕ್ರಮವಾಗಿ ವಿದ್ಯುತ್ ಸಂಪರ್ಕ ಕಡಿತಗೊಳಿಸಲಾಗಿದೆ. ತೀವ್ರ ಬಾಧಿತ ಪ್ರದೇಶಗಳಿಗೆ ಕುಡಿಯುವ ನೀರಿನ ಪರ್ಯಾಯ ವ್ಯವಸ್ಥೆ ಕೈಗೊ­ಳ್ಳಲು ಜಿಲ್ಲಾಧಿಕಾರಿ ಸೂಚಿಸಿದ್ದಾರೆ.



ಬೆಳೆ ಹಾನಿಗೆ ಸಂಬಂಧಿಸಿದಂತೆ ತಕ್ಷಣ ಸಮೀಕ್ಷೆ ನಡೆಸಿ ವರದಿ ಸಲ್ಲಿಸಲು ಸೂಚಿಸಿದ್ದು, ಇದಕ್ಕೆ ತಪ್ಪಿದಲ್ಲಿ ಕೃಷಿ ಇಲಾಖೆ ಅಧಿಕಾರಿಗಳನ್ನೇ ಹೊಣೆಗಾರ­ರನ್ನಾಗಿ ಮಾಡಲಾಗುತ್ತದೆ ಎಂದು ಹೇಳಿದ್ದಾರೆ.



ಕೊಂಕಲ್, ಪರಮೇಶಪಲ್ಲಿ, ದೇವ­ನ­­ಹಳ್ಳಿ, ಚಿನ್ನಾಕಾರ, ಬಳಿಚಕ್ರಗಳಲ್ಲಿ ಪರಿಹಾರ ಧನ ಚೆಕ್ ವಿತರಿಸಿದ ಸಹಾಯಕ ಆಯುಕ್ತ ಬಿ.ಪಿ.ವಿಜಯ್, ಪ್ರಕೃತಿ ವಿಕೋಪ ಪರಿಹಾರ ನಿಧಿಯಡಿ ಅರ್ಹ ಫಲಾನುಭವಿಗಳಿಗೆ ಆದ್ಯತೆ ಮೇಲೆ ಪರಿಹಾರ ವಿತರಣೆಗೆ ಸಂಬಂಧ­ಪಟ್ಟವರು ಕ್ರಮ ಕೈಗೊಳ್ಳಬೇಕು. ತಹಶೀಲ್ದಾರರು ಪರಿಹಾರ ವಿತರಣೆ ಬಗ್ಗೆ ನಿರಂತರ ಪರಿಶೀಲನೆ ನಡೆಸಬೇಕು. ಪರಿಹಾರ ವಿತರಣೆಯಲ್ಲಿ ತಾರತಮ್ಯ ಆಗದಂತೆ ಗಮನ ವಹಿಸಿ, ಫಲಾನು­ಭವಿಗಳಿಗೆ ತಕ್ಷಣ ಪರಿಹಾರ ವಿತರಿಸುವಂತೆ ಸೂಚನೆ ನೀಡಿದ್ದಾರೆ.