ಇಂಗ್ಲಿಷ್‌ ವ್ಯಾಮೋಹ: ಮಾತೃ ಭಾಷೆಗೆ ಕುತ್ತು

ದೊಡ್ಡಬಳ್ಳಾಪುರ:  ‘ಇಂಗ್ಲಿಷ್ ವ್ಯಾಮೋ­ಹ­ದಿಂದಾಗಿ ಕನ್ನಡ ಭಾಷೆಯ ಅಸ್ತಿ­ತ್ವಕ್ಕೆ ಧಕ್ಕೆ ಬರುತ್ತಿದ್ದು, ಮಾತೃಭಾಷೆ ಉಳಿಸಲು ಪೂರಕವಾದ ಕಾರ್ಯಕ್ರಮಗಳನ್ನು ಹಮ್ಮಿ­ಕೊಳ್ಳ­ಬೇಕು’ ಎಂದು 16ನೇ ಬೆಂಗಳೂರು ಗ್ರಾಮಾಂತರ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನ ಅಧ್ಯಕ್ಷ ಡಾ.ಎ.ಓ.­ಆವಲ­ಮೂರ್ತಿ ಹೇಳಿದರು.



ಸೋಮವಾರ ನಗರದ ದತ್ತಾತ್ರೇಯ ಕಲ್ಯಾಣ ಮಂದಿರದಲ್ಲಿ ಆರಂಭವಾದ ಎರಡು ದಿನಗಳ 16ನೇ ಬೆಂಗಳೂರು ಗ್ರಾಮಾಂತರ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.



‘ಕನ್ನಡವನ್ನು ಉಳಿಸಲು ಹಲವು ಕಾರ್ಯ­ಕ್ರಮಗಳು, ಹೋರಾಟಗಳು ನಡೆಯುತ್ತಲೇ ಇವೆ. ಆದರೆ ಕನ್ನಡಿಗರ ಉದಾರತೆಯಿಂದಾಗಿ ಭಾಷೆ ಸೊರಗು­ತ್ತಿದೆ. ಮಾತೃ ಭಾಷೆ ಉಳಿವಿಗೆ ಗಂಭೀರ ಕ್ರಮಗಳು ಅಗತ್ಯ’ ಎಂದು ಅವರು ತಿಳಿಸಿದರು.



‘ಇಂಗ್ಲೀಷ್‌ ಭಾಷೆಯಿಂದಲೇ ಅಭಿ­ವೃದ್ಧಿ ಸಾಧ್ಯ ಎಂದು ಪೋಷಕರು ನೆಚ್ಚಿ­ಕೊಂಡ­ಂತಿದೆ. ಇಂಗ್ಲೀಷ್‌ ಮಾತನಾಡು­ವುದು ಬುದ್ಧಿವಂತಿಕೆಯ ಪ್ರತೀಕವಲ್ಲ. ಮಕ್ಕ­ಳಿಗೆ ಬದುಕಿನ ಯಶಸ್ಸಿಗೆ ಅಗತ್ಯ­ವಾದ ಸಕಾರಾತ್ಮಕ ಗುಣ ಮತ್ತು ಸ್ವಸ್ಥ ಸಮಾಜ ನಿರ್ಮಾಣಕ್ಕೆ ಅವಶ್ಯಕವಾದ ಸದ್ಗುಣ­ಗಳನ್ನು ಒಳಗೊಂಡ ಶಿಕ್ಷಣ­ವನ್ನು ನೀಡಬೇಕು. ಆದರೆ ಇಂದಿನ ಶಿಕ್ಷಣದಿಂದ ಇದು ಸಾಧ್ಯವಾಗುತ್ತಿಲ್ಲ’ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದರು.



‘ಇಂದಿನ ಶೈಕ್ಷಣಿಕ ವ್ಯವಸ್ಥೆ­ಯಲ್ಲಿ­ ಏಕರೂಪತೆ ಇಲ್ಲ. ಅನೇಕ ಖಾಸಗಿ ಶಾಲೆಗಳಲ್ಲಿ ಸರ್ಕಾರ ನಿಗದಿ­ಗೊಳಿಸಿ­ರುವ ಪಠ್ಯ ಪುಸ್ತಕಗಳ ಜೊತೆಗೆ ಎಳೆಂಟು ಬೇರೆ ಪುಸ್ತಕಗಳನ್ನು ಮಕ್ಕಳು ಓದ­­ಬೇಕು. ಮಕ್ಕಳ ಸಾಮರ್ಥ್ಯಕ್ಕೆ ತಕ್ಕಂತೆ ಕಲಿಕಾ ಪದ್ಧತಿಯೂ ಇರಬೇಕು. ಪುಸ್ತ-­­ಕ­ಗಳ ಸಂಖ್ಯೆ ಮತ್ತು ಚೀಲದ ಗಾತ್ರ­ವನ್ನು ಹೆಚ್ಚಿಸುವುದು ಸರಿಯಲ್ಲ’ ಎಂದು ಅವರು ತಿಳಿಸಿದರು.



‘ಸರ್ಕಾರಿ ಶಾಲೆಗಳನ್ನು ಉಳಿಸುವ ಮೂಲಕ ಕನ್ನಡ ಭಾಷೆಯನ್ನು ಉಳಿ­ಸುವ ಪ್ರಯತ್ನವಾಗಬೇಕು. ಶಾಲೆ ಉಳಿ­ಸ­­ಬೇಕಾದರೆ ಅಲ್ಲಿ ಮೂಲ ಸೌಕರ್ಯ ಮತ್ತು ದಕ್ಷ ಶಿಕ್ಷಕರ ಅವಶ್ಯಕತೆಯಿದೆ. ಎಷ್ಟೋ ಶಾಲೆಗಳಲ್ಲಿ ಶೌಚಾಲಯ ಮತ್ತು ಕುಡಿಯುವ ನೀರಿಲ್ಲ. ಸರ್ಕಾರಿ ಶಾಲೆಗೆ ಬರುವ ಅನುದಾನ ಎಲ್ಲಿ ಹೋಗು­ತ್ತದೆ ಎಂಬುದನ್ನು ಪರಿಶೀಲಿ­ಸ­ಬೇಕು. ಎಷ್ಟೋ ಶಾಲೆಗಳಲ್ಲಿ ಕೆಲವು ಶಿಕ್ಷ­­ಕರು ಶಾಲೆಗೆ ಬರುವುದಿಲ್ಲ. ಅಂಥ­ವರ ವಿರುದ್ಧ ಕ್ರಮ ಕೈಗೊಳ್ಳಬೇಕು’ ಎಂದರು.



ನೀರಿನ ಸಮಸ್ಯೆ: ಎಲ್ಲಾ ಕಡೆ ಇಂದು ನೀರಿನ ಸಮಸ್ಯೆ ಕಾಡುತ್ತಿದೆ. ನೀರಿನ ಸಮಸ್ಯೆ ಪರಿಹಾರವಾಗಲು ಜನರ ಸಹ­ಕಾರ ಅಗತ್ಯ. ನೀರನ್ನು ಮಿತವಾಗಿ ಬಳಸ­ಬೇಕು. ಜೊತೆಗೆ ಅಂತರ್ಜಲ­ವೃದ್ಧಿಗೆ  ಸಾರ್ವಜನಿಕರು ಮುಂದಾಗ­ಬೇಕು. ಇಲ್ಲವಾದರೆ ಯಾರೇ ಅಧಿ­­ಕಾರಕ್ಕೆ ಬಂದರೂ ನೀರಿನ ಸಮಸ್ಯೆ ಬಗೆ­ಹರಿಯುವುದಿಲ್ಲ ಎಂದು ತಿಳಿಸಿದರು.



ಜಿಲ್ಲಾ ಹೋರಾಟಕ್ಕೆ ಬೆಂಬಲ: ದೊಡ್ಡ­ಬಳ್ಳಾ­ಪುರ­ವನ್ನು ಜಿಲ್ಲಾ ಕೇಂದ್ರವನ್ನಾಗಿ ಮಾಡಲು ಎಲ್ಲಾ ಅರ್ಹತೆಗಳನ್ನು ಪಡೆ­ದಿದೆ. ಭೌಗೋಳಿಕವಾಗಿ ಯಾವ ತಾಲ್ಲೂ­ಕನ್ನು ಜಿಲ್ಲಾಕೇಂದ್ರವನ್ನಾಗಿ ಮಾಡಿ­ದರೆ ಬಹುಜನರಿಗೆ ಅನುಕೂಲ­ವಾಗುತ್ತದೆ ಎಂಬುದನ್ನು ಗಮನಿಸ­ಬೇಕು. ಈ ಕುರಿತು ಸಂಬಂಧಪಟ್ಟವರು ವಸ್ತು­ನಿಷ್ಠವಾಗಿ ಸಮಾಲೋಚನೆ ನಡೆಸಬೇಕು ಎಂದರು.



ನೇಯ್ಗೆ:  ನೇಯ್ಗೆ ಉದ್ಯಮದ ಉಳಿವಿಗೆ ಜನರ ಸಹಕಾರ ಅಗತ್ಯ. ಬೇಡಿಕೆಯಿಂದ ಮಾತ್ರವೇ ಪೂರೈಕೆ ಹೆಚ್ಚಲು ಸಾಧ್ಯ. ಶಾಲಾ ಸಮವಸ್ತ್ರವನ್ನು ಮಗ್ಗಗಳಲ್ಲಿ ತಯಾ­ರಿಸಲು ಸಾಧ್ಯ. ಎಲ್ಲಾ ಶಾಲೆ­ಗಳಲ್ಲಿ ಮಗ್ಗಗಳಿಂದ ನೇಯ್ಗೆ ಬಟ್ಟೆ­ಯನ್ನೇ ಉಪಯೋಗಿಸುವಂತಾದರೆ ಅದೊಂದು ಕ್ರಾಂತಿಯೇ ಆಗುತ್ತದೆ’ ಎಂದು ತಿಳಿಸಿದರು.



ಸಮ್ಮೇಳನವನ್ನು ಉದ್ಘಾಟಿಸಿ ಮಾತ­ನಾಡಿದ 80ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳದ ಅಧ್ಯಕ್ಷ ಸಾಹಿತಿ ಡಾ.ನಾ.ಡಿಸೋಜ, ‘ಜನರ ಗೊಂದಲ, ತಳಮಳಗಳಿಂದ ಹೊರಬರುವ ಸಾಹಿತ್ಯ ರಚನೆಯಾಗಬೇಕು. ವೈಜ್ಞಾನಿಕ ಸಾಹಿತ್ಯ ರಚನೆ ಬೆಳೆಯಬೇಕು. ಕೇವಲ ಕಥೆ, ಕವನಗಳನ್ನು ಬರೆದವರಷ್ಟೇ ಸಾಹಿತಿ­ಗಳು ಎನ್ನುವ ಮನೋಭಾವನೆ ದೂರ­ವಾಗ­ಬೇಕು. ನಮ್ಮ ಬರವಣಿಗೆಗಳು ಜನ ಸಾಮಾ­ನ್ಯರ ಕಷ್ಟಗಳಿಗೆ ಸ್ಪಂದಿಸು­ವಂತಿರಬೇಕು’ ಎಂದು ಹೇಳಿದರು.



‘ಬಯಲು ಸೀಮೆಗೆ ನೀರು ತರುವ ಗಡಿಬಿಡಿಯಲ್ಲಿ ಪರಿಸರಕ್ಕೆ ಹಾನಿ­ಯಾಗ­ದಂತೆ ಎಚ್ಚರವಹಿಸಬೇಕು. ಇಲ್ಲವಾದರೆ ಉತ್ತರಖಂಡದಲ್ಲಿ ಆದಂತಹ ಜಲ­ಪ್ರಳಯ ಇಲ್ಲಿಯೂ ಸಂಭವಿಸದೆ ಇರು­ವುದಿಲ್ಲ’ ಎಂದು ಎಚ್ಚರಿಸಿದರು.



16ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಸ್ಮರಣ ಸಂಚಿಕೆಯನ್ನು ರಾಜ್ಯ ರೇಷ್ಮೆ ಮಾರಾಟ ಮಂಡಳಿ ಮಾಜಿ ಅಧ್ಯಕ್ಷ ಕೆ.ಎಂ.ಹನುಮಂತ­ರಾಯಪ್ಪ ಬಿಡುಗಡೆ ಮಾಡಿದರು. ಪುಸ್ತಕ ಮಳಿಗೆಗಳನ್ನು ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಡಿ.ಶ್ರೀಕಾಂತ ಉದ್ಘಾಟಿಸಿದರು.



ತಾಲ್ಲೂಕು ಕಚೇರಿಯಿಂದ ಆರಂಭ­ವಾದ ಸಮ್ಮೇಳನಾಧ್ಯಕ್ಷರ ಮೆರವಣಿಗೆ­ಯನ್ನು ನಗರ ಸಭೆ ಪೌರಾಯುಕ್ತ ಡಾ.ಬಿಳಿ­ಕೆಂಚಪ್ಪ ಉದ್ಘಾಟಿಸಿದರು. ದೊಡ್ಡಬಳ್ಳಾಪುರ ಉಪವಿಭಾಗಾ­ಧಿಕಾರಿ ಸಿ.ಮಂಜುನಾಥ್ ರಾಷ್ಟ್ರಧ್ವಜಾ­ರೋಹಣ ಮಾಡುವ ಮೂಲಕ ಜಿಲ್ಲಾ ಸಮ್ಮೇಳನಕ್ಕೆ ಅಧಿಕೃತ ಚಾಲನೆ ನೀಡಿದರು. ತಹಶೀಲ್ದಾರ್ ಕೆ.ಬಿ.ಸಿದ್ದ­ಲಿಂಗಯ್ಯ ಕನ್ನಡ ಧ್ವಜಾರೋಹಣ ಮಾಡಿದರು. ಸಾಹಿತ್ಯ ಪರಿಷತ್ ಧ್ವಜಾ­ರೋಹಣವನ್ನು ಜಿಲ್ಲಾ ಕಸಾಪ ಅಧ್ಯಕ್ಷ ಹುಲಿಕಲ್‌ ನಟರಾಜ್ ನೆರವೇರಿಸಿದರು.  



ಈ ಸಂದರ್ಭದಲ್ಲಿ ರಾಜ್ಯ ಸರ್ಕಾರಿ ನೌಕರರ ಸಂಘದ ಜಿಲ್ಲಾ ಘಟಕದ ಅಧ್ಯಕ್ಷ ಶಿವರಾಜ್, ಹೊಸಕೋಟೆ ತಾಲ್ಲೂಕು ಕಸಾಪ ಅಧ್ಯಕ್ಷ ಶ್ರೀಕಾಂತ, ಕಸಾಪ ತಾಲ್ಲೂಕು ಗೌರವಾಧ್ಯಕ್ಷ ಕೆ.ಆರ್.ರವಿಕಿರಣ್, ಜಿಲ್ಲಾ ಕಸಾಪ ಮಾಜಿ ಅಧ್ಯಕ್ಷ ಚಿ.ಮಾ.ಸುಧಾಕರ್, ನಾಗಪ್ರಿಯ, ರಾಜ್ಯ ಸರ್ಕಾರಿ ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ತಾಲ್ಲೂಕು ಅಧ್ಯಕ್ಷ ಬಿ.ಎಸ್.ಸಿದ್ದಗಂಗಯ್ಯ ಮತ್ತಿ­ತರರು ಭಾಗವಹಿಸಿದ್ದರು.