<p><strong>ಇರುವೆ ಮತ್ತು ಆನೆ</strong></p>.<p>ಇರುವೆ ಮರಿಗೆ ರಾತ್ರಿ ಎಂಥೆಂಥದೋ ಕನಸು. ಬೆಳಿಗ್ಗೆ ಎದ್ದ ತಕ್ಷಣ ಅಮ್ಮನ ಹತ್ತಿರ ಹೋಗಿ `ಅಮ್ಮಾ, ಅಮ್ಮಾ, ರಾತ್ರಿ ನನ್ನ ಕನಸಲ್ಲಿ ಒಂದು ಆನೆ ಬಂದಿತ್ತು. ಎಷ್ಟು ದೊಡ್ಡಿತ್ತು ಅಂದ್ರೆ - ಒಂದು ಪರ್ವತದ ಹಾಗಿತ್ತು! ಅಮ್ಮಾ, ನಂಗೆ ಆನೆ ನೋಡ್ಬೇಕೂಂತ ತುಂಬ ಆಸೆ ಆಗ್ತಿದೆ...<br /> <br /> ತೋರಿಸ್ತೀಯಾ, ಪ್ಲೀಸ್' ಅಂತ ಮುದ್ದುಮುದ್ದಾಗಿ ಕೇಳಿತು. `ಆಯ್ತು ಮರೀ, ಮೊದಲು ಹಲ್ಲುಜ್ಜಿ ಮುಖ ತೊಳೆದು, ಹಾಲು ಕುಡಿದು ರೆಡಿಯಾಗು... ಆಮೇಲೆ ಆನೆ ನೋಡೋಕೆ ಹೋಗೋಣ' ಎಂದಿತು ಅಮ್ಮ ಇರುವೆ'. ಮರಿ ಛಕ ಛಕಾ ಹಲ್ಲುಜ್ಜಿ, ಮುಖ ತೊಳೆದು, ಹಾಲು ಕುಡಿದು, ಹೊಸಾ ಬಟ್ಟೆ ಹಾಕ್ಕೊಂಡು - `ಅಮ್ಮಾ ನಾನು ರೆಡಿ; ನಿಂದೇ ತಡ!' ಎಂದು ಅವಸರಿಸಿತು. ಅಮ್ಮ ಇರುವೆ ಮರೀನ ಎತ್ತಿಕೊಂಡು, ಸರ್ಕಸ್ ಕಂಪೆನೀಲಿದ್ದ ಆನೆ ತೋರ್ಸೋದಕ್ಕೆ ಕರೆದುಕೊಂಡು ಹೋಯಿತು. ಆನೆ ನೋಡಿದ್ದೇ ಇರುವೆ ಮರಿ ಹಿ ಹ್ಹಿ ಹೀ... ಅಂತ ಜೋರಾಗಿ ನಗಲಿಕ್ಕೇ ಶುರು ಮಾಡಿತು. ಆನೆಗೋ ಕೆಂಡದಂಥ ಸಿಟ್ಟು! `ಯಾಕೆ ಹಾಗೆ ನನ್ನೋಡಿ ನಗ್ತೀಯಾ? ಹಲ್ಲುದ್ರಿಸ್ತೀನಿ ನೋಡು' ಅಂತ ಘೀಳಿಟ್ಟಿತು.<br /> <br /> `ಅಯ್ಯೋ.. ನೀನೆಂಥಾ ಆನೆ! ನನ್ನ ಕನಸಲ್ಲಿ ಬಂದಿದ್ದ ಆನೆ ನಿಂಗಿಂತ ನೂರು ಪಟ್ಟು ದೊಡ್ಡ ಇತ್ತು, ಗೊತ್ತಾ? ನೀನು ಬರೀ ಪಿಳ್ಳಾರಿ... ಥು! ನಡಿ, ಹೋಗೋಣಾಮ್ಮ... ಈ ಆನೆ ನಂಗಿಷ್ಟ ಆಗಲ್ಲ' ಎನ್ನುತ್ತಾ ಇರುವೇ ಮರಿ ಅಮ್ಮನ ಮಡಿಲಲ್ಲಿ ಕುಳಿತುಕೊಂಡು ಹೊರಟೇ ಹೋಯಿತು.<br /> <br /> <strong>ಮೂಗಿನ ಕೋಪ</strong><br /> ಕೆಂಪು ಕೆಂಪಾಗಿತ್ತು ಮೂಗು, ಯಾಕೆ ಗೊತ್ತೇ? ಗೋಡೆ ಮೇಲಿದ್ದ ಕನ್ನಡಿ ಅದನ್ನು ನೋಡಿ `ಕಿಸಿಕಿಸಿ' ನಕ್ಕಿತ್ತು. ಮೂಗಿಗೆ ಅವಮಾನ ತಡ್ಕೊಳ್ಳೋಕೇ ಆಗಲಿಲ್ಲ, ಆದರೆ ಏನು ಮಾಡೋದು? ಕನ್ನಡಿಗೆ ಬುದ್ಧಿ ಕಲಿಸೋರು ಯಾರು? ಯೋಚನೆ ಮಾಡೀ ಮಾಡೀ, ಮೂಗು ತನ್ನ ಕೆಳಗಿದ್ದ ಮೀಸೆಯನ್ನು ಕೇಳಿತು. `ಮೀಸೆಯಣ್ಣಾ, ನೋಡು ನಿಂಗಿರೋಕೆ ನನ್ನ ಕೆಳಗೇ ಜಾಗ ಕೊಟ್ಟಿದ್ದೀನಿ, ಅಲ್ವಾ? ಈಗ ನೀನು ನಂಗೊಂದು ಸಹಾಯ ಮಾಡ್ಬೇಕು... ಆ ದರಿದ್ರ ಕನ್ನಡೀಗೆ ಬುದ್ಧಿ ಕಲಿಸು... ಪ್ಲೀಸ್' ಎಂದು ಗೋಗರೀತು. ಮೀಸೆಗೊ ಮೂಗಿಗೆ ಸಹಾಯ ಮಾಡುವ ಮನಸ್ಸೇನೋ ಇತ್ತು. ಕನ್ನಡೀನ ನೋಡುತ್ತಾ ಒಂದು ಕ್ಷಣ ಥರ ಥರ ಅಲುಗಿ ತನ್ನ ಕೋಪ ಹೊರಹಾಕಿತು. ಆದರೆ ಕನ್ನಡಿ ಹೆದರಲೇ ಇಲ್ಲ.<br /> <br /> ಮೂಗು ಹಲ್ಲನ್ನು ಬೇಡಿಕೊಂಡಿತು. ಹಲ್ಲು ಸಿಟ್ಟಿನಿಂದ ಕನ್ನಡಿ ನೋಡುತ್ತಾ ಕರಕರ, ಕಟಕಟ ಅಂತ ಸದ್ದು ಮಾಡಿ ತೆಪ್ಪಗಾಯಿತು. ನಾಲಗೆಗೂ ಕನ್ನಡಿ ವಿರುದ್ಧ ಏನೂ ಮಾಡಲು ಸಾಧ್ಯವಾಗಲಿಲ್ಲ. ಆ ಕಡೆ ಈ ಕಡೆ ಹೊರಳಾಡಿ ಸುಮ್ಮನಾಯಿತು. ಕೊನೆಗೆ ಮೂಗು ಕೈಯನ್ನು - `ಅಣ್ಣಯ್ಯ, ನೀನಾದ್ರೂ ಕನ್ನಡಿಗೆ ಬುದ್ಧಿ ಕಲಿಸ್ತೀಯಾ?' ಅಂತ ಅಂಗಲಾಚಿತು. ಮೂಗಿನ ಮಾತು ಮುಗಿದಿದ್ದೇ ತಡ, ಕೈ `ರಪ್' ಅಂತ ಕನ್ನಡಿಗೆ ಹೊಡೀತು. ಕನ್ನಡಿ ಫಳ್ ಅಂತ ಚೂರು ಚೂರಾಯ್ತು. ಕೈಯಿಂದ ದಳದಳಾ ಅಂತ ರಕ್ತ ಸುರೀತು. ಕಣ್ಣಲ್ಲಿ ಫಳಕ್ಕನೇ ನೀರು ಬಂತು.<br /> <br /> ನೆಲದ ಮೇಲೆ ಚೆಲಾಪಿಲ್ಲಿಯಾಗಿ ಬಿದ್ದಿದ್ದ ಕನ್ನಡಿಯ ಚೂರುಗಳನ್ನು ನೋಡಿ ಮೂಗಿಗೆ ಖುಷಿಯೋ ಖುಷಿ. ಆದರೆ ಅವುಗಳಲ್ಲಿ ತನ್ನ ಅಷ್ಟಾವಕ್ರ ರೂಪವನ್ನು ನೋಡಿ ಮೂಗು ಪೆಚ್ಚಾಯಿತು; ಇನ್ನಷ್ಟು ಕೆಂಪಾಯಿತು!</p>.<div><p><strong>ಪ್ರಜಾವಾಣಿ ಆ್ಯಪ್ ಇಲ್ಲಿದೆ: <a href="https://play.google.com/store/apps/details?id=com.tpml.pv">ಆಂಡ್ರಾಯ್ಡ್ </a>| <a href="https://apps.apple.com/in/app/prajavani-kannada-news-app/id1535764933">ಐಒಎಸ್</a> | <a href="https://whatsapp.com/channel/0029Va94OfB1dAw2Z4q5mK40">ವಾಟ್ಸ್ಆ್ಯಪ್</a>, <a href="https://www.twitter.com/prajavani">ಎಕ್ಸ್</a>, <a href="https://www.fb.com/prajavani.net">ಫೇಸ್ಬುಕ್</a> ಮತ್ತು <a href="https://www.instagram.com/prajavani">ಇನ್ಸ್ಟಾಗ್ರಾಂ</a>ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.</strong></p></div>
<p><strong>ಇರುವೆ ಮತ್ತು ಆನೆ</strong></p>.<p>ಇರುವೆ ಮರಿಗೆ ರಾತ್ರಿ ಎಂಥೆಂಥದೋ ಕನಸು. ಬೆಳಿಗ್ಗೆ ಎದ್ದ ತಕ್ಷಣ ಅಮ್ಮನ ಹತ್ತಿರ ಹೋಗಿ `ಅಮ್ಮಾ, ಅಮ್ಮಾ, ರಾತ್ರಿ ನನ್ನ ಕನಸಲ್ಲಿ ಒಂದು ಆನೆ ಬಂದಿತ್ತು. ಎಷ್ಟು ದೊಡ್ಡಿತ್ತು ಅಂದ್ರೆ - ಒಂದು ಪರ್ವತದ ಹಾಗಿತ್ತು! ಅಮ್ಮಾ, ನಂಗೆ ಆನೆ ನೋಡ್ಬೇಕೂಂತ ತುಂಬ ಆಸೆ ಆಗ್ತಿದೆ...<br /> <br /> ತೋರಿಸ್ತೀಯಾ, ಪ್ಲೀಸ್' ಅಂತ ಮುದ್ದುಮುದ್ದಾಗಿ ಕೇಳಿತು. `ಆಯ್ತು ಮರೀ, ಮೊದಲು ಹಲ್ಲುಜ್ಜಿ ಮುಖ ತೊಳೆದು, ಹಾಲು ಕುಡಿದು ರೆಡಿಯಾಗು... ಆಮೇಲೆ ಆನೆ ನೋಡೋಕೆ ಹೋಗೋಣ' ಎಂದಿತು ಅಮ್ಮ ಇರುವೆ'. ಮರಿ ಛಕ ಛಕಾ ಹಲ್ಲುಜ್ಜಿ, ಮುಖ ತೊಳೆದು, ಹಾಲು ಕುಡಿದು, ಹೊಸಾ ಬಟ್ಟೆ ಹಾಕ್ಕೊಂಡು - `ಅಮ್ಮಾ ನಾನು ರೆಡಿ; ನಿಂದೇ ತಡ!' ಎಂದು ಅವಸರಿಸಿತು. ಅಮ್ಮ ಇರುವೆ ಮರೀನ ಎತ್ತಿಕೊಂಡು, ಸರ್ಕಸ್ ಕಂಪೆನೀಲಿದ್ದ ಆನೆ ತೋರ್ಸೋದಕ್ಕೆ ಕರೆದುಕೊಂಡು ಹೋಯಿತು. ಆನೆ ನೋಡಿದ್ದೇ ಇರುವೆ ಮರಿ ಹಿ ಹ್ಹಿ ಹೀ... ಅಂತ ಜೋರಾಗಿ ನಗಲಿಕ್ಕೇ ಶುರು ಮಾಡಿತು. ಆನೆಗೋ ಕೆಂಡದಂಥ ಸಿಟ್ಟು! `ಯಾಕೆ ಹಾಗೆ ನನ್ನೋಡಿ ನಗ್ತೀಯಾ? ಹಲ್ಲುದ್ರಿಸ್ತೀನಿ ನೋಡು' ಅಂತ ಘೀಳಿಟ್ಟಿತು.<br /> <br /> `ಅಯ್ಯೋ.. ನೀನೆಂಥಾ ಆನೆ! ನನ್ನ ಕನಸಲ್ಲಿ ಬಂದಿದ್ದ ಆನೆ ನಿಂಗಿಂತ ನೂರು ಪಟ್ಟು ದೊಡ್ಡ ಇತ್ತು, ಗೊತ್ತಾ? ನೀನು ಬರೀ ಪಿಳ್ಳಾರಿ... ಥು! ನಡಿ, ಹೋಗೋಣಾಮ್ಮ... ಈ ಆನೆ ನಂಗಿಷ್ಟ ಆಗಲ್ಲ' ಎನ್ನುತ್ತಾ ಇರುವೇ ಮರಿ ಅಮ್ಮನ ಮಡಿಲಲ್ಲಿ ಕುಳಿತುಕೊಂಡು ಹೊರಟೇ ಹೋಯಿತು.<br /> <br /> <strong>ಮೂಗಿನ ಕೋಪ</strong><br /> ಕೆಂಪು ಕೆಂಪಾಗಿತ್ತು ಮೂಗು, ಯಾಕೆ ಗೊತ್ತೇ? ಗೋಡೆ ಮೇಲಿದ್ದ ಕನ್ನಡಿ ಅದನ್ನು ನೋಡಿ `ಕಿಸಿಕಿಸಿ' ನಕ್ಕಿತ್ತು. ಮೂಗಿಗೆ ಅವಮಾನ ತಡ್ಕೊಳ್ಳೋಕೇ ಆಗಲಿಲ್ಲ, ಆದರೆ ಏನು ಮಾಡೋದು? ಕನ್ನಡಿಗೆ ಬುದ್ಧಿ ಕಲಿಸೋರು ಯಾರು? ಯೋಚನೆ ಮಾಡೀ ಮಾಡೀ, ಮೂಗು ತನ್ನ ಕೆಳಗಿದ್ದ ಮೀಸೆಯನ್ನು ಕೇಳಿತು. `ಮೀಸೆಯಣ್ಣಾ, ನೋಡು ನಿಂಗಿರೋಕೆ ನನ್ನ ಕೆಳಗೇ ಜಾಗ ಕೊಟ್ಟಿದ್ದೀನಿ, ಅಲ್ವಾ? ಈಗ ನೀನು ನಂಗೊಂದು ಸಹಾಯ ಮಾಡ್ಬೇಕು... ಆ ದರಿದ್ರ ಕನ್ನಡೀಗೆ ಬುದ್ಧಿ ಕಲಿಸು... ಪ್ಲೀಸ್' ಎಂದು ಗೋಗರೀತು. ಮೀಸೆಗೊ ಮೂಗಿಗೆ ಸಹಾಯ ಮಾಡುವ ಮನಸ್ಸೇನೋ ಇತ್ತು. ಕನ್ನಡೀನ ನೋಡುತ್ತಾ ಒಂದು ಕ್ಷಣ ಥರ ಥರ ಅಲುಗಿ ತನ್ನ ಕೋಪ ಹೊರಹಾಕಿತು. ಆದರೆ ಕನ್ನಡಿ ಹೆದರಲೇ ಇಲ್ಲ.<br /> <br /> ಮೂಗು ಹಲ್ಲನ್ನು ಬೇಡಿಕೊಂಡಿತು. ಹಲ್ಲು ಸಿಟ್ಟಿನಿಂದ ಕನ್ನಡಿ ನೋಡುತ್ತಾ ಕರಕರ, ಕಟಕಟ ಅಂತ ಸದ್ದು ಮಾಡಿ ತೆಪ್ಪಗಾಯಿತು. ನಾಲಗೆಗೂ ಕನ್ನಡಿ ವಿರುದ್ಧ ಏನೂ ಮಾಡಲು ಸಾಧ್ಯವಾಗಲಿಲ್ಲ. ಆ ಕಡೆ ಈ ಕಡೆ ಹೊರಳಾಡಿ ಸುಮ್ಮನಾಯಿತು. ಕೊನೆಗೆ ಮೂಗು ಕೈಯನ್ನು - `ಅಣ್ಣಯ್ಯ, ನೀನಾದ್ರೂ ಕನ್ನಡಿಗೆ ಬುದ್ಧಿ ಕಲಿಸ್ತೀಯಾ?' ಅಂತ ಅಂಗಲಾಚಿತು. ಮೂಗಿನ ಮಾತು ಮುಗಿದಿದ್ದೇ ತಡ, ಕೈ `ರಪ್' ಅಂತ ಕನ್ನಡಿಗೆ ಹೊಡೀತು. ಕನ್ನಡಿ ಫಳ್ ಅಂತ ಚೂರು ಚೂರಾಯ್ತು. ಕೈಯಿಂದ ದಳದಳಾ ಅಂತ ರಕ್ತ ಸುರೀತು. ಕಣ್ಣಲ್ಲಿ ಫಳಕ್ಕನೇ ನೀರು ಬಂತು.<br /> <br /> ನೆಲದ ಮೇಲೆ ಚೆಲಾಪಿಲ್ಲಿಯಾಗಿ ಬಿದ್ದಿದ್ದ ಕನ್ನಡಿಯ ಚೂರುಗಳನ್ನು ನೋಡಿ ಮೂಗಿಗೆ ಖುಷಿಯೋ ಖುಷಿ. ಆದರೆ ಅವುಗಳಲ್ಲಿ ತನ್ನ ಅಷ್ಟಾವಕ್ರ ರೂಪವನ್ನು ನೋಡಿ ಮೂಗು ಪೆಚ್ಚಾಯಿತು; ಇನ್ನಷ್ಟು ಕೆಂಪಾಯಿತು!</p>.<div><p><strong>ಪ್ರಜಾವಾಣಿ ಆ್ಯಪ್ ಇಲ್ಲಿದೆ: <a href="https://play.google.com/store/apps/details?id=com.tpml.pv">ಆಂಡ್ರಾಯ್ಡ್ </a>| <a href="https://apps.apple.com/in/app/prajavani-kannada-news-app/id1535764933">ಐಒಎಸ್</a> | <a href="https://whatsapp.com/channel/0029Va94OfB1dAw2Z4q5mK40">ವಾಟ್ಸ್ಆ್ಯಪ್</a>, <a href="https://www.twitter.com/prajavani">ಎಕ್ಸ್</a>, <a href="https://www.fb.com/prajavani.net">ಫೇಸ್ಬುಕ್</a> ಮತ್ತು <a href="https://www.instagram.com/prajavani">ಇನ್ಸ್ಟಾಗ್ರಾಂ</a>ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.</strong></p></div>
