ಸೋಮವಾರ, ಜೂನ್ 14, 2021
27 °C

ಕಂಪ್ಯೂಟರನ್ನೇ ಕಿವಿಯಲ್ಲಿಟ್ಟರೆ!

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಕಂಪ್ಯೂಟರ್ ಎಂದಾಕ್ಷಣ, ಮಾನಿಟರ್, ಕೀ ಬೋರ್ಡ್, ಮೌಸ್, ಸಿಪಿಯು ನೆನಪಾಗುತ್ತದೆ ಅಲ್ಲವೇ? ಆದರೆ ಇನ್ನು ಮುಂದೆ ಕಂಪ್ಯೂಟರ್ ಎಂದರೆ ‘ಇಯರ್ ರಿಂಗ್’ ನೆನಪಾಗಲಿದೆ! ಹೌದು, ಸದ್ಯ ಇರುವ ಕಂಪ್ಯೂಟರ್ ಪರಿಕಲ್ಪನೆಗೆ ಹೊಸ ರೂಪ ನೀಡುವತ್ತ ಜಪಾನ್ ತಂತ್ರಜ್ಞರು ಹೆಜ್ಜೆ ಇಟ್ಟಿದ್ದಾರೆ.



‘ಇಯರ್ ರಿಂಗ್‌’ನಂತೆ ಕಿವಿ­ಯಲ್ಲಿ ಇಟ್ಟುಕೊಳ್ಳಬಲ್ಲ ಅತ್ಯಂತ ಪುಟ್ಟ ಗಾತ್ರದ ಕಂಪ್ಯೂಟರ್ ತಯಾರಿಕೆಯಲ್ಲಿ ಜಪಾನಿನ ‘ಹಿರೋಶಿಮಾ ಸಿಟಿ’ ವಿಶ್ವವಿದ್ಯಾಲ­ಯದ ತಂಡ ಕಾರ್ಯನಿರತವಾಗಿದೆ. 2016ರಲ್ಲಿ ಕ್ರಿಸ್‌ಮಸ್ ವೇಳೆಗೆ ಇದನ್ನು ಮಾರುಕಟ್ಟೆಗೆ ಪರಿಚಯಿ­ಸುವ ನಿಟ್ಟಿನಲ್ಲಿ ನಿರಂತರ ಶ್ರಮಿಸುತ್ತಿದೆ.  ಕಂಪ್ಯೂಟರ್ ಕ್ಷೇತ್ರದಲ್ಲಿ ಇದು ಹೊಸ ಯುಗಾರಂ­ಭಕ್ಕೆ ನಾಂದಿ ಹಾಡಲಿದೆ ಎನ್ನುವುದು ಈ ತಜ್ಞರ ತಂಡದ ಅಭಿಮತ.



ಇದು ಇಯರ್ ಕ್ಲಿಪ್ ಮಾದ­ರಿಯ ಪರ್ಸನಲ್ ಕಂಪ್ಯೂಟರ್ (ಪಿಸಿ). ವಿನ್ಯಾಸದಲ್ಲಿ ಬ್ಲೂಟೂತ್ ಹೆಡ್ ಫೋನ್ ರೀತಿ ಕಾಣಿಸುತ್ತದೆ.

17 ಗ್ರಾಂ ತೂಕದ ಈ ವೈರ್‌ಲೆಸ್ ಕಂಪ್ಯೂಟರ್‌ನಲ್ಲಿ ಬ್ಲೂಟೂತ್, ಜಿಪಿಎಸ್, ಕಾಂಪಾಸ್­(ದಿಕ್ಸೂಚಿ), ಬ್ಯಾಟರಿ, ಬಾರೋ­ಮೀಟರ್, ಸ್ಪೀಕರ್ ಮತ್ತು ಮೈಕ್ರೋ­ಫೋನ್ ಸೌಲಭ್ಯಗಳಿವೆ. ಮೈಕ್ರೋ­ಚಿಪ್‌­ನಲ್ಲಿ ಮಾಹಿತಿ ಸಂಗ್ರಹ  ಮಾಡಿಕೊಳ್ಳಬಹುದು ಮತ್ತು ಅಗತ್ಯ ತಂತ್ರಾಂಶಗಳನ್ನೂ ಅಳವಡಿಸಿಕೊಳ್ಳಬಹುದು.



‘ikebana’ ಜಪಾನಿನ ಜನಪ್ರಿಯ ಪುಷ್ಪ ಜೋಡಣೆ ಕಲೆ. ಈ ಕಲಾಕೃತಿಯ ಶೈಲಿಯಲ್ಲಿಯೇ ಕಿವಿಯಲ್ಲಿ  ಅಲಂಕಾರಿಕವಾಗಿ ಧರಿಸಬಹು­ದಾದ ಈ ಸಣ್ಣ ಕಂಪ್ಯೂಟರ್ ವಿನ್ಯಾಸಗೊಳಿಸಲಾಗಿದೆ ಎನ್ನುತ್ತಾರೆ ತಜ್ಞರು. ಇದರಿಂದ ಐಪ್ಯಾಡ್ ಮತ್ತು ಇತರ ಗ್ಯಾಜೆಟ್‌ಗಳಿಗೆ ಸಂಪರ್ಕ ಕಲ್ಪಿಸಿ ಸಾಫ್ಟ್‌ವೇರ್ ಪ್ರೋಗ್ರಾಂಗಳನ್ನು ನಿಯಂತ್ರಿಸಬಹುದಾಗಿದೆ.



ಪ್ರೋಗ್ರಾಮಿಂಗ್

ಈ ಸೂಕ್ಷ್ಮ ಸ್ವರೂಪದ ಗಣಕಕ್ಕೆ ಇನ್ಫ್ರಾರೆಡ್‌ (ಅತಿನೇರಳೆ) ಸೆನ್ಸಾರ್ ಅಳವಡಿಸಲಾಗಿದೆ. ಹಾಗಾಗಿ ಈ ಗಣಕವನ್ನು ಕಣ್ಣು ಮತ್ತು ಕಣ್ರೆಪ್ಪೆಯ ಚಲನೆ, ನಾಲಿಗೆಯನ್ನು ಅತ್ತಿತ್ತ ಸರಿದಾಡಿಸುವ  ಮೂಲಕ ಮತ್ತು ತುಟಿ ಚಲನೆಯಿಂದ ನಿಯಂತ್ರಿಸಬಹುದಾಗಿದೆ ಎನ್ನುತ್ತದೆ ಇದರ ಸೃಷ್ಟಿಕರ್ತರ ತಂಡ.



ಯಾರಿಗೆ ಉಪಯೋಗ?

ವಾಹನ ಸವಾರರು, ಅದರ­ಲ್ಲೂ ಬೈಕ್ ಸವಾರರಿಗೆ, ಚಾರಣ ಪ್ರಿಯರಿಗೆ, ಗಗನಯಾತ್ರಿ­ಗಳಿಗೆ ಮತ್ತು ಅಂಗವಿಕಲರಿಗೆ ಮೂರನೇ ಕೈ ರೀತಿಯಲ್ಲಿ ಈ ಪುಟಾಣಿ ಕಂಪ್ಯೂಟರ್‌ ಪ್ರಯೋಜ­ನಕ್ಕೆ ಬರಲಿದೆ ಎನ್ನುತ್ತಾರೆ ತಂತ್ರಜ್ಞರು.



ನಾನು ಶಿಖರ ಏರುತ್ತಿರು­ವಾಗ, ಆಕಾಶದಲ್ಲಿ ಪ್ರಜ್ವಲಿಸುತ್ತಿ­ರುವ ಒಂದು ನಕ್ಷತ್ರ ಕಂಡರೆ, ನಾನು ನೋಡುತ್ತಿರುವ ದಿಕ್ಕು ಮತ್ತು ಕೋನದ ಆಧಾರದ ಮೇಲೆ ನಾನು ನೋಡುತ್ತಿರುವ ನಕ್ಷತ್ರ ಯಾವುದು ಎಂದು ಇದು ತಿಳಿಸುತ್ತದೆ. ಎನ್ನುತ್ತಾರೆ ಜಪಾನ್ ತಜ್ಞ.



ವೃದ್ಧರ ಆರೈಕೆಗೆ

ಮನೆಯಲ್ಲಿರುವ ವೃದ್ಧರಿಗೆ ಈ ಕಂಪ್ಯೂಟರ್ ಅಳವಡಿಸಿದರೆ ಅವರ ಆರೋಗ್ಯಕ್ಕೆ ಸಂಬಂಧಿಸಿದ ಮಾಹಿತಿಗಳನ್ನು ನೀಡುತ್ತದೆ. ಮಾತ್ರವಲ್ಲ ತೀವ್ರ ಅನಾರೋಗ್ಯ ಉಂಟಾದರೆ ಅಥವಾ ಅಪಘಾತ ಸಂಭವಿಸಿದರೆ ‘ಜಿಪಿಎಸ್’ ನೆರವಿನಿಂದ ಆಂಬುಲೆನ್ಸ್‌ಗೆ ಮಾಹಿತಿಯನ್ನೂ ರವಾನಿಸಿ ಆಪತ್ಕಾಲದ ಸಹಾಯಕನಂತೆ ನೆರವಾಗುತ್ತದೆ. l

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.