ಮಂಗಳವಾರ, ಮಾರ್ಚ್ 2, 2021
29 °C
ನಾಲ್ಕು ಮೆಗಾಪಿಕ್ಸೆಲ್‌ ಸಿಸಿ ಟಿವಿ ಕ್ಯಾಮೆರಾ ಕಣ್ಣು; ಟಿವಿಎಲ್‌ ಕ್ಯಾಮೆರಾಗಳಿಗೆ ವಿದಾಯ

ಕಿಮ್ಸ್‌ ಭದ್ರತೆಯ ‘ಸಾಮರ್ಥ್ಯ’ ಹೆಚ್ಚಳ

ವಿಕ್ರಂ ಕಾಂತಿಕೆರೆ Updated:

ಅಕ್ಷರ ಗಾತ್ರ : | |

ಕಿಮ್ಸ್‌ ಭದ್ರತೆಯ ‘ಸಾಮರ್ಥ್ಯ’ ಹೆಚ್ಚಳ

ಹುಬ್ಬಳ್ಳಿ: ಮಗು ಅಪಹರಣ, ‘ಪ್ರಸಾದ’ದಲ್ಲಿ ವಿಷ ಹಾಕಿ ರೋಗಿಯ ಸಂಬಂಧಿಕರಿಂದ ನಗ–ನಗದು ಕಳವು ಯತ್ನ ಮುಂತಾದ ಪ್ರಕರಣಗಳಿಂದ ಬೆಚ್ಚಿರುವ ನಗರದ ಕರ್ನಾಟಕ ವೈದ್ಯಕೀಯ ವಿಜ್ಞಾನ ಸಂಸ್ಥೆಯ (ಕಿಮ್ಸ್) ಭದ್ರತೆಯನ್ನು ಇನ್ನಷ್ಟು ಬಲಪಡಿಸಲು ಮುಂದಾಗಿದೆ.



ಜನವರಿ ತಿಂಗಳಲ್ಲಿ ಕಿಮ್ಸ್‌ನಲ್ಲಿ ನವಜಾತ ಶಿಶುವೊಂದನ್ನು ಮಹಿಳೆ­ಯೊಬ್ಬರು ಅಪಹರಿಸಿದ ಘಟನೆ ನಡೆದಿತ್ತು. ಇದರ ಹಿನ್ನೆಲೆಯಲ್ಲಿ ಭದ್ರತಾ ಸಲಹೆಗಾರರನ್ನು ನೇಮಕ ಮಾಡಲು ನಿರ್ಧರಿಸಲಾಗಿತ್ತು. ಆದರೆ ಈ ಪ್ರಕ್ರಿಯೆ ಇನ್ನೂ ಪೂರ್ಣಗೊಂಡಿಲ್ಲ. ಹೀಗಾಗಿ ಭದ್ರತೆ ಬಲಪಡಿಸಿದ ನಂತರ ಸಲಹೆ­ಗಾರರನ್ನು ನೇಮಕ ಮಾಡುವ ಕುರಿತು ಸರ್ಕಾರದ ಮೇಲೆ ಒತ್ತಡ ಹೇರಲು ಸಂಸ್ಥೆಯ ಆಡಳಿತ ನಿರ್ಧರಿಸಿದೆ.



ಇದ­ಕ್ಕಾಗಿ ಹೆಚ್ಚು ಗುಣಮಟ್ಟದ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಿದ್ದು ಇವು­ಗಳ ನಿರ್ವಹಣೆಯನ್ನು ಖಾಸಗಿ ಏಜೆನ್ಸಿ­ಯೊಂದಕ್ಕೆ ವಹಿಸಲು ನಿರ್ಧರಿಸಲಾಗಿದೆ. ಭದ್ರತಾ ಸಲಹೆಗಾರರ ನೇಮಕವಾದ ನಂತರ ಈ ಏಜೆನ್ಸಿಯ ಉಸ್ತುವಾರಿ ಕೂಡ ಅವರ ಹೆಗಲಿಗೆ ಹೊರಿಸುವುದು ಆಡಳಿತದ ಉದ್ದೇಶ.



‘ಆರು ತಿಂಗಳಿಂದ ಕಿಮ್ಸ್‌ನಲ್ಲಿ ಕಾನೂನು ಸಲಹೆಗಾರರು ಇದ್ದಾರೆ. ಕಾನೂನಾತ್ಮಕ ಅಂಶಗಳಿಗೆ ಸಂಬಂಧಿಸಿದ ವಿಷಯಗಳನ್ನು ಅವರೇ ನೋಡಿಕೊಳ್ಳು­ತ್ತಿದ್ದಾರೆ. ಇದೇ ರೀತಿ ಭದ್ರತೆಗೆ ಸಂಬಂಧಿಸಿದ ವಿಷಯಗಳನ್ನು ನೋಡಿ­ಕೊಳ್ಳು­ವುದಕ್ಕೂ ಸಲಹೆಗಾರರ ನೇಮಕ ಆಗಬೇಕಿದೆ.



ಈ ಕುರಿತು ಪ್ರಯತ್ನ ನಡೆಯುತ್ತಿದೆ. ಅದಕ್ಕೂ ಮುನ್ನ ಭದ್ರತೆಗೆ ಸಂಬಂಧಿಸಿ ಏಜೆನ್ಸಿಯೊಂದನ್ನು ನಿಗದಿ ಮಾಡಲಾಗುವುದು’ ಎಂದು ಕಿಮ್ಸ್ ನಿರ್ದೇಶಕ ಡಾ.ಡಿ.ಡಿ.ಬಂಟ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.



ಭದ್ರತೆ ಹೆಚ್ಚಿಸುವ ಕಾರ್ಯದ ಅಂಗ­ವಾಗಿ ಕಿಮ್ಸ್‌ನಲ್ಲಿ ಹೆಚ್ಚು ಸಾಮರ್ಥ್ಯದ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸ­ಲಾಗಿದೆ. ಈ ಹಿಂದೆ ಇದ್ದ ಟಿವಿಎಲ್‌ (ಟೆಲಿವಿಷನ್‌ ವರ್ಟಿಕಲ್ ಲೈನ್ಸ್‌) ಕ್ಯಾಮೆರಾಗಳನ್ನು ತೆಗೆದು ಇದೀಗ ನಾಲ್ಕು ಮೆಗಾಪಿಕ್ಸೆಲ್ ಸಾಮರ್ಥ್ಯದ ಕ್ಯಾಮೆರಾ­ಗಳನ್ನು ಅಳವಡಿಸಲಾಗಿದೆ.



ಮೊದಲ ಹಂತವಾಗಿ ವಿವಿಧ ಭಾಗ­ಗಳ ಏಳು ಗೇಟ್‌ಗಳಿಗೆ ಇಂಥ ಕ್ಯಾಮೆರಾ ಅಳವಡಿಸಲಾಗಿದೆ. ಆಸ್ಪತ್ರೆ, ಹೊರರೋಗಿಗಳ ವಿಭಾಗ, ತುರ್ತು ಚಿಕಿತ್ಸಾ ಘಟಕಗಳ ಬಾಗಿಲ ಬಳಿಯ ದೃಶ್ಯಾವಳಿಗಳನ್ನು ಸೆರೆ ಹಿಡಿಯಲಿರುವ ಈ ಕ್ಯಾಮೆರಾಗಳು ನಿರ್ದೇಶಕರು, ವೈದ್ಯಕೀಯ ಅಧೀಕ್ಷಕರು ಮತ್ತು ಮುಖ್ಯ ಆಡಳಿತ ಅಧಿಕಾರಿ ಕಚೇರಿಯಲ್ಲಿರುವ ಕಂಪ್ಯೂಟರ್‌ ಪರದೆಯ ಮೇಲೆ ಮೂಡಿಸುತ್ತವೆ.



‘ಸಂಸ್ಥೆಯಲ್ಲಿ ಮೊದಲು 600ರಿಂದ 700 ಟಿವಿಎಲ್‌ ಸಾಮರ್ಥ್ಯದ ಕ್ಯಾಮೆರಾ­ಗಳಿದ್ದವು. ನಂತರ ಅವುಗಳನ್ನು 1,000 ಟಿ.ವಿ.ಎಲ್. ಸಾಮರ್ಥ್ಯಕ್ಕೆ ಏರಿಸ­ಲಾಯಿತು. ಇದೇ ಮೊದಲ ಬಾರಿ ಮೆಗಾ­ಪಿಕ್ಸೆಲ್ ಕ್ಯಾಮೆರಾಗಳು ಸಂಸ್ಥೆಯ ಪ್ರಮುಖ ಗೇಟ್‌ಗಳಲ್ಲಿನ ಚಿತ್ರಾವಳಿ­ಗಳನ್ನು ಸೆರೆಹಿಡಿಯಲಿವೆ’ ಎಂದು ಕಿಮ್ಸ್‌ ಮಾಹಿತಿ ತಂತ್ರಜ್ಞಾನ ವಿಭಾ­ಗದ ಉಸ್ತುವಾರಿ ಎ.ವಿ.ಪಾಟೀಲ ತಿಳಿಸಿದರು.



ಸದ್ಯ ಕ್ಯಾಮೆರಾಗಳು ಮತ್ತು ಅವುಗಳ ಉಸ್ತುವಾರಿಯನ್ನು ಮಾಹಿತಿ ತಂತ್ರಜ್ಞಾನ ವಿಭಾಗದವರೇ ನೋಡಿ­ಕೊಳ್ಳು­ತ್ತಿದ್ದಾರೆ. ಏಜೆನ್ಸಿ ನಿರ್ಧಾರವಾದ ನಂತರ ಈ ಕಾರ್ಯವನ್ನು ಅವರೇ ನೋಡಿಕೊಳ್ಳಲಿದ್ದಾರೆ. ‘ಸಿಸಿಟಿವಿ ಕ್ಯಾಮೆರಾಗಳ ನಿರ್ವಹಣೆ, ಹೊಸ ಕ್ಯಾಮೆರಾಗಳ ಅಳವಡಿಕೆ, ದುರಸ್ತಿ ಇತ್ಯಾದಿ ಕಾರ್ಯಗಳನ್ನು ಏಜೆನ್ಸಿಯವರು ನೋಡಿಕೊಳ್ಳಲಿದ್ದಾರೆ’ ಎಂದು ಬಂಟ್‌ ವಿವರಿಸಿದರು.



‘ಟಿವಿಎಲ್‌ ಕ್ಯಾಮೆರಾಗಳಲ್ಲಿ ದೃಶ್ಯಾ­ವಳಿ­ಗಳು ಸ್ಪಷ್ಟವಾಗಿ ಮೂಡುವುದಿಲ್ಲ. ಮೆಗಾಪಿಕ್ಸೆಲ್‌ನಲ್ಲಿ ವ್ಯಕ್ತಿಯ ಮುಖ, ತೊಟ್ಟಿರುವ ಬಟ್ಟೆಯ ಬಣ್ಣ ಇತ್ಯಾದಿ ಸ್ಪಷ್ಟವಾಗಿ ದಾಖಲಾಗುತ್ತದೆ. ಇದರಿಂ­ದಾಗಿ ವ್ಯಕ್ತಿಗಳನ್ನು ನಿಖರವಾಗಿ ಗುರು­ತಿಸಲು ಸಾಧ್ಯವಾಗುತ್ತದೆ’ ಎದರು.



ಮುಖ್ಯ ರಸ್ತೆಗೂ ಬರಲಿದೆ ಕ್ಯಾಮೆರಾ: ಸಂಸ್ಥೆಗೆ ಬರುವ ಮುಖ್ಯರಸ್ತೆಯ ದೃಶ್ಯಾವಳಿಗಳನ್ನು ದಾಖಲಿಸುವುದಕ್ಕೂ ಕಿಮ್ಸ್ ಮುಂದಾಗಿದೆ. ರಾತ್ರಿ ಕೆಲಸ ಮುಗಿಸಿ ವಸತಿ ನಿಲಯಗಳಿಗೆ ಹೋಗುವ ವಿದ್ಯಾರ್ಥಿಗಳ ಸುರಕ್ಷತೆಗಾಗಿ ವಸತಿ ನಿಲಯಗಳ ದಾರಿಯಲ್ಲೂ ಸಿಸಿಟಿವಿ ಕ್ಯಾಮೆರಾ ಅಳವಡಿಸುವ ಚಿಂತನೆ ನಡೆದಿದೆ. ವಿದ್ಯಾರ್ಥಿಗಳು ರಾತ್ರಿ 1 ಗಂಟೆ ವರೆಗೆ ವಾಚನಾಲಯದಲ್ಲಿರುತ್ತಾರೆ. ಈ ಹಿನ್ನೆಲೆಯಲ್ಲಿ ಅಲ್ಲಿಯೂ ಕ್ಯಾಮೆರಾ ಅಳವಡಿಸಲು ಸಿದ್ಧತೆ ನಡೆಯುತ್ತಿದೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.