ಚಂದಪದ್ಯ: ಕಂಬಳ

ಕಂಬಳವೆನೆ ಕುಣಿದಾಡುವುದೆನ್ನೆದೆ

ಕಂಬಳವೆನೆ ಮೈ ನಿಮಿರುವುದು

ಕಂಬಳ ನೋಡುವುದೆಂದರೆ ಮೈ ಮನ

ಕಾತರದಲಿ ನಲಿದಾಡುವುದು

ಕೆಸರಲಿ ಓಡುವ ಕೋಣದ ಜೋಡಿಯ

ನೋಡುವುದೇ ಮಹದಾನಂದ

ಕೆಸರನು ಆ ಕಡೆ ಈ ಕಡೆ ಚಿಮ್ಮುವ

ಪರಿಯನು ನೋಡುವುದೇ ಚೆಂದ

ಸೊಂಟಕೆ ದಟ್ಟಿಯ ತಲೆಗೆ ರುಮಾಲನು

ಸುತ್ತಿರುವಂತಹ ಬಲಶಾಲಿ

ಕೋಣದ ಹಿಂಗಡೆ ಕೋಲನು ಬೀಸುತ

ಓಡುತ ಸಾಗುವ ವೇಗದಲಿ

ಕೋಣದ ಬಾಲವ ತಿರುಚುತ ಕೆರಳಿಸಿ

ಚಾಟಿಯ ಝಳಪಿಸಿ ಜಗ್ಗುವನು

ಕೋಣವು ರಭಸದಿ ಮುಂದಕೆ ನುಗ್ಗುತ

ಸಾಗುತಲಿರೆ ಮುನ್ನುಗ್ಗುವನು

ಹಾಹಾ! ಹೋಹೋ! ಎನ್ನುತ ಮಂದಿಯು

ಜೋರಲಿ ಕೂಗುತ ನಲಿಯುವರು

ಓಹೋ! ಹೋಹೋ! ಎನ್ನುತ ತಮ್ಮಯ

ಕೈಗಳ ತಟ್ಟುತ ಕುಣಿಯುವರು

ಎತ್ತರ ಎತ್ತರ ಚಿಮ್ಮುವ ಕೆಸರಿನ

ಕಾರಂಜಿಯು ಮನ ಸೆಳೆಯುವುದು

ಕೆಸರಿನ ಓಕುಳಿ ಮಂದಿಯ ಮನಸಿಗೆ

ಮುದವನು ನೀಡುತ ಇಳಿಯುವುದು

ಇಂತಹ ಸುಂದರ ಕಂಬಳದಾಟವು

ನಾಡಿನ ಎಲ್ಲಾ ಕಡೆಯಲ್ಲಿ

ಇದ್ದರೆ ಎಂತಹ ಸೊಗಸಾಗಿರುವುದು

ಅನ್ನಿಸದಿರುವುದೆ ಮನದಲ್ಲಿ?