ಶನಿವಾರ, ಜೂನ್ 19, 2021
22 °C
ಪರ್ಯಾಯ ಕಾರ್ಮಿಕ ಒಕ್ಕೂಟಕ್ಕೆ ಮಾನ್ಯತೆ ನೀಡಲು ವಿರೋಧ

ಚಲನಚಿತ್ರ ಚಟುವಟಿಕೆ ಅನಿರ್ದಿಷ್ಟಾವಧಿ ಬಂದ್‌

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು: ಪರ್ಯಾಯ ಕಾರ್ಮಿಕ ಒಕ್ಕೂಟಕ್ಕೆ ಮಾನ್ಯತೆ ನೀಡುವುದನ್ನು ವಿರೋಧಿಸಿ ಚಲನಚಿತ್ರ ಕಾರ್ಮಿಕರ, ತಂತ್ರಜ್ಞರ, ಕಲಾವಿದರ ಒಕ್ಕೂಟವು ಚಿತ್ರೀಕರಣ ಚಟುವಟಿಕೆಗಳನ್ನು ಬಹಿ­ಷ್ಕ­ರಿಸಿ ಅನಿರ್ದಿ­ಷ್ಟಾವಧಿ ಬಂದ್‌ ನಡೆಸಲು ತೀರ್ಮಾನಿಸಿದೆ.



ಹೊಸ ಒಕ್ಕೂಟಕ್ಕೆ ಮಾನ್ಯತೆ ನೀಡಬಾರದು ಎಂದು ಒತ್ತಾಯಿಸಿ ಅಶೋಕ್‌ ನೇತೃತ್ವದ ಒಕ್ಕೂಟವು ಚಲನಚಿತ್ರ ಚಟುವಟಿಕೆಗಳನ್ನು ಸ್ಥಗಿತ­ಗೊಳಿಸಿ ಪ್ರತಿಭಟನೆಗೆ ಮುಂದಾಗಿದೆ.



ಹೊಸ ಒಕ್ಕೂಟಕ್ಕೆ ಮಾನ್ಯತೆ ನೀಡ­ಬಾರದು ಎಂದು ಆಗ್ರಹಿಸಿ ಅಶೋಕ್‌ ನೇತೃತ್ವದ ಒಕ್ಕೂಟದ ಕಾರ್ಮಿಕರು ಸೋಮವಾರ ಎಲ್ಲಾ ಚಿತ್ರಗಳ ಚಿತ್ರೀ­ಕ­ರಣ ಕಾರ್ಯ ಸ್ಥಗಿತಗೊಳಿಸಿ ಗಾಂಧಿ­ನಗರ­ದಿಂದ ಚಲನಚಿತ್ರ ವಾಣಿಜ್ಯ ಮಂಡಳಿವರೆಗೆ ಪ್ರತಿಭಟನಾ ಮೆರವಣಿಗೆ ನಡೆಸಿದರು.



ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ನಡೆದ ಕಾರ್ಯಕಾರಿ ಸಮಿತಿ ಸಭೆಯಲ್ಲಿ, ನಿರ್ಮಾಪಕರು ತಮ್ಮ ಸಿನಿಮಾಗಳ ಕೆಲಸಕ್ಕೆ ಯಾವುದೇ ಒಕ್ಕೂಟದ ಸದಸ್ಯರ­ನ್ನಾದರೂ ಬಳಸಿಕೊಳ್ಳ­ಬಹುದು. ಅದು ಅವರ ವಿವೇಚನೆಗೆ ಬಿಟ್ಟ ವಿಚಾರ ಎಂಬ ನಿರ್ಣಯ ತೆಗೆದುಕೊಳ್ಳಲಾಯಿತು. ಈ ನಿರ್ಣಯಕ್ಕೆ ಕಾರ್ಮಿಕರು ಆಕ್ರೋಶ ವ್ಯಕ್ತಪಡಿಸಿದರು.



ಪರ್ಯಾಯ ಒಕ್ಕೂಟ ರಚನೆಗೆ ಬೆಂಬಲ ನೀಡುತ್ತಿರುವ ಕೆಲ ನಿರ್ಮಾಪ­ಕರು ಅವಾಚ್ಯ ಶಬ್ದಗಳಿಂದ ತಮ್ಮನ್ನು ನಿಂದಿ­ಸಿ­ದ್ದಾರೆ ಎಂದು ಆರೋಪಿಸಿದ ಪ್ರತಿಭಟನಾನಿರತರು ನಿರ್ಮಾಪಕರ ವಿರುದ್ಧ ಘೋಷಣೆಗಳನ್ನು ಕೂಗಿದರು. ಇದರಿಂದ ವಾಣಿಜ್ಯ ಮಂಡಳಿಯ ಎದುರು  ಕೆಲಕಾಲ ಗದ್ದಲದ ವಾತಾ­ವರಣ ನಿರ್ಮಾಣವಾಯಿತು.



ನೃತ್ಯ ನಿರ್ದೇಶಕ ರಾಜೇಶ್‌ ಬ್ರಹ್ಮಾವರ್‌ ನೇತೃತ್ವದಲ್ಲಿ ರಚನೆಯಾ­ಗಿರುವ ಹೊಸ ಒಕ್ಕೂಟಕ್ಕೆ ಮಾನ್ಯತೆ ನೀಡುವ ವಿಷಯಕ್ಕೆ ಸಂಬಂಧಿಸಿದಂತೆ ಚರ್ಚೆ ನಡೆಸಲು ಚಲನಚಿತ್ರ ವಾಣಿಜ್ಯ ಮಂಡಳಿ ಸೋಮವಾರ ಸಭೆ ಕರೆದಿತ್ತು. ಈ ಸಭೆಯಲ್ಲಿ ಒಕ್ಕೂಟಕ್ಕೆ ಮಾನ್ಯತೆ ನೀಡುವುದು ಖಚಿತ ಎಂಬ ವದಂತಿ ಹಬ್ಬಿತ್ತು. ಹೀಗಾಗಿ ಕಾರ್ಮಿಕರ ಒಕ್ಕೂಟದ ಸದಸ್ಯರು ಪ್ರತಿಭಟನೆಗೆ ಮುಂದಾದರು.



‘ನಟರು ಮಾತನಾಡುತ್ತಿಲ್ಲ’

ಇಪ್ಪತ್ತೈದು ವರ್ಷದ ಚಿತ್ರರಂಗದ ಬದುಕಿನಲ್ಲಿ ಮೊದಲ ಬಾರಿಗೆ ಇಂಥ ಕಹಿ ಅನುಭವ ಉಂಟಾಗಿದೆ. ಕೆಲವೇ ನಿರ್ಮಾಪಕರ ಹಿತಾ­ಸಕ್ತಿಗಾಗಿ ಚಿತ್ರರಂಗ­ದಲ್ಲಿ ಒಡಕು ಮೂಡಿ­ಸಲಾಗುತ್ತಿದೆ. ಇಷ್ಟೆಲ್ಲಾ ನಡೆದರೂ ಚಿತ್ರರಂಗದ ಯಾವ ಹಿರಿಯ ನಿರ್ಮಾಪಕರೂ, ನಟರೂ ಬಹಿರಂಗವಾಗಿ ಕಾರ್ಮಿಕರ ಪರ­ವಾಗಿ ಮಾತ­ನಾಡುತ್ತಿಲ್ಲ ಎಂಬ ಬಗ್ಗೆ ನೋವಾಗುತ್ತಿದೆ.

– ಅಶೋಕ್‌, ಚಲನಚಿತ್ರ ಕಾರ್ಮಿಕ ಒಕ್ಕೂಟದ ಅಧ್ಯಕ್ಷ

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.