ಜೆಎಸ್‌ಎಸ್‌ ಕಾಲೇಜಿಗೆ ₹5 ಕೋಟಿ ದಂಡ

ನವದೆಹಲಿ: ಮಂಜೂರಾದ ಸೀಟುಗಳಿಗಿಂತಲೂ ಹೆಚ್ಚು ವಿದ್ಯಾರ್ಥಿಗಳಿಗೆ ಎಂಬಿಬಿಎಸ್‌ ಕೋರ್ಸ್‌ಗೆ ಪ್ರವೇಶ ನೀಡಿದ  ಮೈಸೂರಿನ ಜೆಎಸ್ಎಸ್ ವೈದ್ಯಕೀಯ ಕಾಲೇಜಿಗೆ ಸುಪ್ರೀಂ ಕೋರ್ಟ್ ₹5  ಕೋಟಿ  ದಂಡ ವಿಧಿಸಿದೆ.



ನ್ಯಾಯಮೂರ್ತಿಗಳಾದ ಮದನ್‌ ಬಿ. ಲೋಕೂರ್ ಮತ್ತು ಆರ್.ಕೆ. ಅಗರ್‌ವಾಲ್ ಅವರ ಪೀಠ ಈ ಅದೇಶ ನೀಡಿದೆ. ಆಡಳಿತ ಮಂಡಳಿಯ ಈ ಕ್ರಮ ‘ಅತ್ಯಂತ ದುರದೃಷ್ಟಕರ’ ಎಂದು ಹೇಳಿದೆ. ಆಲ್ಲದೆ, ದಂಡದ ಮೊತ್ತವನ್ನು ನಾಲ್ಕು ವಾರಗಳ ಒಳಗೆ ಠೇವಣಿ ಇಡುವಂತೆ ಸೂಚನೆ ನೀಡಿದೆ.



‘2012ರಲ್ಲಿ ಈ ನ್ಯಾಯಾಲಯ ನೀಡಿದ  ಆದೇಶಗಳನ್ನು ಕಾಲೇಜು ಪಾಲಿಸಿಲ್ಲ. ವಿದ್ಯಾರ್ಥಿಗಳಿಗೆ ಅವರ ವಿದ್ಯಾಭ್ಯಾಸ ಮುಂದುವರಿಸಲು ಆವಕಾಶ ನೀಡಿದೆ. ಈ ಕಾಲೇಜಿಗೆ ಮತ್ತು ಹೀಗೆ ನಿಯಮ ಉಲ್ಲಂಘನೆ ಮಾಡುವ ಇತರ ಕಾಲೇಜುಗಳಿಗೆ ಎಚ್ಚರಿಕೆ ನೀಡುವುದಕ್ಕಾಗಿ ಜೆಎಸ್‌ಎಸ್‌ ಕಾಲೇಜಿಗೆ ₹5 ಕೋಟಿ ದಂಡ ವಿಧಿಸುವುದೇ ಸೂಕ್ತ’ ಎಂದು ನ್ಯಾಯಪೀಠ ಹೇಳಿದೆ.



ಈ ಕಾಲೇಜಿನಲ್ಲಿ ಪ್ರವೇಶ ಪಡೆದು ನಾಲ್ಕೂವರೆ ವರ್ಷದ ಎಂಬಿಬಿಎಸ್ ಕೋರ್ಸ್‌ ಪೂರ್ಣಗೊಳಿಸದಂತಹ ವಿದ್ಯಾರ್ಥಿಗಳು ಮತ್ತು ಇದೇ ಜೂನ್ ನಲ್ಲಿ ಕೋರ್ಸ್ ಪೂರ್ಣಗೊಳಿಸುವಂತಹ ವಿದ್ಯಾರ್ಥಿಗಳು ತಮ್ಮ ವಿದ್ಯಾಭ್ಯಾಸ ಮುಂದುವರಿಸಬಹುದು ಎಂದು ನ್ಯಾಯಾಲಯ ಹೇಳಿದೆ.



ಆಲ್ಲದೆ, ಜೆಎಸ್ಎಸ್ ವೈದ್ಯಕೀಯ ಕಾಲೇಜು ಆಡಳಿತ ಮಂಡಳಿ 2016-17 ನೇ ಸಾಲಿನಲ್ಲಿ ಮಂಜೂರು ಮಾಡಲಾದಂತಹ 200 ಸೀಟುಗಳ ಪೈಕಿ ಕೇವಲ 150 ಸೀಟುಗಳನ್ನು ಮಾತ್ರ ಭರ್ತಿ ಮಾಡಬೇಕು ಎಂದು ಸೂಚನೆ ನೀಡಿದೆ.