ಟಿಬೆಟನ್ನರ ಪ್ರಧಾನಿ ಆಯ್ಕೆ ಇಂದು

ಧರ್ಮಶಾಲಾ (ಹಿಮಾಚಲ ಪ್ರದೇಶ) (ಐಎಎನ್‌ಎಸ್): ಟಿಬೆಟ್‌ನಿಂದ ಹೊರಗಿದ್ದು ‘ತ್ರಿಶಂಕು ಸರ್ಕಾರ’ ನಡೆಸುತ್ತಿರುವ ದೇಶಭ್ರಷ್ಟ ಟಿಬೆಟನ್ನರು ಭಾನುವಾರ ತಮ್ಮ ‘ಹೊಸ ಪ್ರಧಾನಿ’ಯ (ಕಲೊನ್ ತ್ರಿಪಾ) ಆಯ್ಕೆಗೆ ಮತ ಚಲಾಯಿಸಲಿದ್ದಾರೆ. ಪ್ರಧಾನಿಯಾಗಿ ಆಯ್ಕೆಯಾಗುವ ವ್ಯಕ್ತಿ ದಲೈಲಾಮ ಅವರ ಉತ್ತರಾಧಿಕಾರಿಯಾಗಲಿದ್ದಾರೆ.



ಗಡೀಪಾರು ಸ್ಥಿತಿಯಲ್ಲಿರುವ ಈ ಜನರು ಈಗ ಹೊಸ ಆಡಳಿತದ ನಿರೀಕ್ಷೆಯಲ್ಲಿದ್ದಾರೆ. ಸಮರ್ಥ, ಸುಸಂಸ್ಕೃತ, ಪಾಶ್ಚಾತ್ಯ ಶಿಕ್ಷಣ ಪಡೆದ ಯುವಕರು ನಾಯಕರಾಗಲಿ ಎಂದು ಹಾರೈಸುತ್ತಿದ್ದಾರೆ. ಲಾಬ್‌ಸಾಂಗ್ ಸಾಂಗೆ, ಟೆನ್ಜಿನ್ ನಮ್ಗಿಯಾಲ್ ಟೆತಾಂಗ್, ತಾಷಿ ನಮ್ಗಿಯಾಲ್ ವಾಂಗ್ಡಿ ಈ ಬಾರಿ ಪ್ರಧಾನಿ ಹುದ್ದೆಯ ಸ್ಪರ್ಧಾ ಕಣದಲ್ಲಿದ್ದಾರೆ.



ಗಡೀಪಾರಾದ ಟಿಬೆಟನ್ನರು ಭಾರತ, ನೇಪಾಳ, ಅಮೆರಿಕ, ಯೂರೋಪ್ ದೇಶಗಳು, ಆಸ್ಟ್ರೇಲಿಯಾ ಮುಂತಾದೆಡೆ ನೆಲೆಸಿದ್ದು ಒಟ್ಟು 85,000 ಮತದಾರರಿದ್ದಾರೆ. ಒಟ್ಟು 86 ಪ್ರಾದೇಶಿಕ ಚುನಾವಣಾ ಕಚೇರಿಗಳನ್ನು ತೆರೆಯಲಾಗಿದೆ.ದಲೈಲಾಮ ಸ್ಪಷ್ಟನೆ: ರಾಜಕೀಯ ನಿವೃತ್ತಿಯ ನಿರ್ಧಾರವನ್ನು ಪುನರ್‌ಪರಿಶೀಲಿಸಬೇಕು ಎಂಬ ದೇಶಭ್ರಷ್ಟ ಟಿಬೆಟ್ ಸಂಸತ್ತಿನ ಕೋರಿಕೆಯನ್ನು ತಳ್ಳಿಹಾಕಿರುವ ದಲೈಲಾಮ ಅವರು, ತಮ್ಮ ನಿರ್ಧಾರ ಅಚಲ ಎಂದು ಸ್ಪಷ್ಟಪಡಿಸಿದ್ದಾರೆ.