ದೇವಯಾನಿಗೆ ರಾಜತಾಂತ್ರಿಕ ವಿನಾಯ್ತಿ ಇಲ್ಲ

ನ್ಯೂಯಾರ್ಕ್‌ (ಪಿಟಿಐ): ವೀಸಾ ವಂಚನೆ ಮತ್ತು ಸುಳ್ಳು ಹೇಳಿಕೆ ಕ್ರಿಮಿನಲ್‌ ಪ್ರಕರಣಕ್ಕೆ  ಸಂಬಂಧಿಸಿ­ದಂತೆ ಭಾರತದ ರಾಜತಾಂತ್ರಿಕ ಅಧಿಕಾರಿ ದೇವಯಾನಿ ಖೋಬ್ರಾಗಡೆ ಅವರಿಗೆ ರಾಜತಾಂತ್ರಿಕ ವಿನಾಯ್ತಿ ಇಲ್ಲ ಎಂದು ಅಮೆರಿಕದ ವಿದೇ­ಶಾಂಗ ಸಚಿವಾಲಯವು ಕೋರ್ಟ್‌ಗೆ ಸಲ್ಲಿಸಿರುವ ಘೋಷಣಾಪತ್ರದಲ್ಲಿ ತಿಳಿಸಿದೆ.



 ವಿದೇಶಾಂಗ ಸಚಿವಾಲಯದ ಕಾನೂನು ಸಲಹಾ ವಿಭಾಗದ ಅಟಾರ್ನಿ  ಸ್ಟೀಫನ್‌ ಕೆರ್‌ ಅವರು ಸಹಿ ಮಾಡಿರುವ ಲಿಖಿತ ಘೋಷಣಾಪತ್ರವನ್ನು ಮ್ಯಾನ್‌­ಹಟನ್‌ ಫೆಡ­ರಲ್‌ ಪ್ರಾಸಿಕ್ಯೂ­ಟರ್‌ ಪ್ರೀತ್‌ ಭರಾರ ಶುಕ್ರವಾರ ನ್ಯಾಯಾ­ಲಯಕ್ಕೆ ಸಲ್ಲಿಸಿದ್ದಾರೆ.



ತಮ್ಮ ವಿರುದ್ಧ ಮಾಡಲಾಗಿರುವ ವೀಸಾ ವಂಚನೆ ಮತ್ತು ಸುಳ್ಳು ಹೇಳಿಕೆ ಪ್ರಕರಣಗಳನ್ನು ರದ್ದು­ಪಡಿಸ­ಬೇಕು ಎಂದು ಖೋಬ್ರಾಗಡೆ ಸಲ್ಲಿಸಿರುವ ಕೋರಿಕೆಗೆ ಪ್ರತಿಯಾಗಿ ಅಮೆರಿಕ ವಿದೇ­ಶಾಂಗ ಕಚೇರಿಯು ಈ ಘೋಷಣಾಪತ್ರ ಸಲ್ಲಿಸಿದೆ.



ಭಾರತದ ಡೆಪ್ಯೂಟಿ ಕಾನ್ಸುಲ್‌ ಜನರಲ್‌ ಆಗಿದ್ದ ಖೋಬ್ರಾಗಡೆ ಅವರಿಗೆ ಸಂಪೂರ್ಣ ರಾಜತಾಂತ್ರಿಕ ವಿನಾಯ್ತಿ ಸೌಲಭ್ಯ ಇಲ್ಲದಿರುವುದರಿಂದ ಕಳೆದ ಡಿ. 12ರಂದು ಫೆಡರಲ್‌ ಪೊಲೀಸರು ಅವರನ್ನು ಬಂಧಿಸಿರುವುದು ಸರಿಯಾದ ಕ್ರಮ ಎಂದು ಘೋಷಣಾ­ಪತ್ರ ದಲ್ಲಿ ಸಮರ್ಥಿಸಿಕೊಳ್ಳಲಾಗಿದೆ.   ಕ್ರಿಮಿನಲ್‌ ಪ್ರಕರಣದ ವಿಚಾರಣೆ­ಯಿಂದ ಸಹ ಅವರಿಗೆ ವಿನಾಯ್ತಿ ಸೌಲಭ್ಯ­­ವಿಲ್ಲ. ಆದ್ದರಿಂದ ಖೋಬ್ರಾಗಡೆ ಅವರ ಮನವಿ­ಯನ್ನು ಮಾನ್ಯ ಮಾಡ­ಬಾರದು ಎಂದು ತಿಳಿಸಲಾಗಿದೆ.



ವಿಶ್ವಸಂಸ್ಥೆಯ ಕಚೇರಿಗೆ ವರ್ಗಾವಣೆ  ಮಾಡಿದ ನಂತರ ಖೋಬ್ರಾಗಡೆ ಅವರು ಅಲ್ಲಿ ಎರಡು ದಿನ ಕೆಲಸ ಮಾಡಿದ ಮಾತ್ರಕ್ಕೆ ಪೂರ್ಣ ಪ್ರಮಾಣದ ರಾಜ­ತಾಂತ್ರಿಕ ವಿನಾಯ್ತಿ ನೀಡಲು ಸಾಧ್ಯವಿಲ್ಲ ಎಂದು ವಾದಿಸಲಾಗಿದೆ.



ಪ್ರತಿಕ್ರಿಯೆ:  ಈ ಮಧ್ಯೆ, ದೇವಯಾನಿ ಅವರಿಗೆ ರಾಜ­ತಾಂತ್ರಿಕ ವಿನಾಯಿತಿ ಇಲ್ಲವೆಂದು ಸರ್ಕಾರಿ ವಕೀಲ ಪ್ರೀತ್‌ ಭರಾರ ಅವರು ನ್ಯಾಯಾಲಯಕ್ಕೆ ಘೋಷಣಾ­ಪತ್ರ ಸಲ್ಲಿ­ಸಿ­ರುವುದಕ್ಕೆ ಆಕ್ಷೇಪ ವ್ಯಕ್ತಪಡಿಸಿರುವ ಖೋಬ್ರಾ­ಗಡೆ ವಕೀಲರು, ಇಂತಹ ವಿಷ­ಯಗಳನ್ನು ನ್ಯಾಯಾಲಯ ನಿರ್ಧರಿಸು­ತ್ತದೆ ಎಂದು ಹೇಳಿದ್ದಾರೆ.



ಭಾರತದ ವಿರುದ್ಧ ಸೇಡಿನ ಕ್ರಮವಲ್ಲ: ಸ್ಪಷ್ಟನೆ

ವಾಷಿಂಗ್ಟನ್‌ (ಐಎಎನ್‌ಎಸ್‌):  ಭಾರ­ತದ ನಾಗರಿಕ ವಿಮಾನಯಾನ ನಿರ್ದೇಶ­ನಾಲಯವನ್ನು ಸುರಕ್ಷತಾ ವಿಚಾರ­ದಲ್ಲಿ ಒಂದನೇ ವರ್ಗದಿಂದ ಎರಡನೇ ವರ್ಗಕ್ಕೆ ಇಳಿಸಿದ ಅಮೆರಿಕದ ಫೆಡರಲ್‌ ವಿಮಾನಯಾನ ಪ್ರಾಧಿಕಾರದ ಕ್ರಮವು ಭಾರತದ ವಿರುದ್ಧ ಸೇಡಿನ ಕ್ರಮ ಎಂಬ ಟೀಕೆಗಳು ಕೇಳಿ ಬರುತ್ತಿವೆ.

ರಾಜತಾಂತ್ರಿಕ ಅಧಿಕಾರಿ ಖೋಬ್ರಾ­ಗಡೆ ಪ್ರಕರಣದ ಹಿನ್ನೆಲೆಯಲ್ಲಿ ಭಾರತದ ವಿಮಾನಯಾನ ನಿರ್ದೇಶನಾಲಯ­ವನ್ನು ಸುರಕ್ಷತೆ ವಿಚಾರದಲ್ಲಿ ಎರಡನೇ ಸ್ಥಾನಕ್ಕೆ ತಳ್ಳಲಾಗಿದೆ ಎಂಬ ವಾದವನ್ನು ಅಮೆರಿಕ ವಿದೇಶಾಂಗ ಸಚಿವಾಲಯದ ವಕ್ತಾರೆ ಮೇರಿ ಹಾರ್ಫ್‌ ತಳ್ಳಿ­ಹಾಕಿದ್ದಾರೆ. ಅಂತರರಾಷ್ಟ್ರೀಯ ವಿಮಾನಯಾನ ಸುರಕ್ಷತೆಯ ನಿಯಮಗಳಿಗೆ ಅನುಸಾರ­ವಾಗಿ ಫೆಡರಲ್‌ ವಿಮಾನಯಾನ ಸಂಸ್ಥೆ ನಿರ್ಧಾರ ತೆಗೆದುಕೊಂಡಿದ್ದು, ಖೋಬ್ರಾ­­ಗಡೆ ಪ್ರಕರಣಕ್ಕೂ ಈ ನಿರ್ಧಾ­ರಕ್ಕೂ ಸಂಬಂಧವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.



ಭರವಸೆ: ಈ ಮಧ್ಯೆ, ಅಮೆರಿಕವು ಭಾರತದ ವಿಮಾನ ಸುರ­ಕ್ಷತಾ ದರ್ಜೆ­ಯನ್ನು ಪಾಕಿ­ಸ್ತಾನಕ್ಕಿಂತ ಕೆಳಗೆ ಮತ್ತು ಬಾಂಗ್ಲಾದೇಶ, ಘಾನಾ ಇನ್ನಿತರ ಬಡ ರಾಷ್ಟ್ರಗಳ ಸ್ಥಾನ­ಮಾನಕ್ಕೆ ಇಳಿಸಿದ ಮಾರನೇ ದಿನವಾದ ಶನಿವಾರ ಪ್ರತಿಕ್ರಿ­ಯಿಸಿ, ಆದಷ್ಟು ಬೇಗ ಭಾರತಕ್ಕೆ ನೆರ­ವಾಗಿ ವಿಮಾನ ಸುರಕ್ಷತೆ­ಮೇಲ್ದರ್ಜೆಗೇ­ರಿ­ಸುವ ಭರವಸೆ ನೀಡಿದೆ.