ಶನಿವಾರ, ಸೆಪ್ಟೆಂಬರ್ 26, 2020
22 °C

ನೆಲದ ನಡೆಯ ವಿಧಾನ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಈ ಇದೇ ಮಣ್ಣು ನೆಲವನ್ನಗೆಯತೊಡಗಿದರೆ;

ಸ್ವರ್ಣ ಖಚಿತ ಸಿಂಹಾಸನದ ಜೊತೆಜೊತೆಗೇ

ಬತ್ತೀಸ ಪುತ್ಥಳಿಗಳು ತಡೆ ತಡೆದು ಹೇಳಿದ ಕತೆ-

ಕೇಳ ಕೇಳುತ್ತಲೇ ಗುರಿಯಿಂದ ದೂರವಾದವರ ವ್ಯಥೆ.

ಈ ಇದೇ ಮಣ್ಣು ನೆಲವನ್ನು ಚಣಕಾಲ ದಿಟ್ಟಿಸಿದರೆ;

ನೆಲದ ಮರೆಯ ನಿಧಾನವನ್ನನುಸರಿಸಿ

ಪ್ರಭುವಾಗಿ ಬೆಳೆದ ಅಲ್ಲಮನ ಕಾಮಲತೆ

ತಿರು ತಿರುಗಿ ಅನಾಥವಾಗುತ್ತಲೇ ಉಳಿದ ಭಾವ-ಗೀತೆ.

ಈ ಇದೇ ಮಣ್ಣು ನೆಲವನ್ನುತ್ತತೊಡಗಿದರೆ;

ನೇಗಿಲ ಚೂಪಿಗೆ ಸಿಕ್ಕು ನರಳುವಳು ಸೀತೆ

ಪುರುಷೋತ್ತಮನ ಮಡದಿಯಾದರೂ ಕುಲಟೆ

ಅಗ್ನಿಪರೀಕ್ಷೆಗೆ ದಬ್ಬುವುದು ನಾಲಿಗೆಯ ತೀಟೆ.

ಈ ಇದೇ ಮಣ್ಣು ನೆಲವನ್ನಳೆಯತೊಡಗಿದರೆ;

ಹೆಜ್ಜೆ ಹೆಜ್ಜೆಗೂ ತೊಡರುವ ವೀರಗಲ್ಲುಗಳು

ಒಬ್ಬನ ಹೆಸರನ್ನಳಿಸಿ ಕೆತ್ತಿಸಿದ ಮತ್ತೊಬ್ಬನ ಫಲಕಗಳು

ಆಚಂದ್ರಾರ್ಕ ಕಾಡುತ್ತಲೇ ಇರುವ ಶ್ರೇಷ್ಠತೆಯ ವ್ಯಸನಗಳು.

ಈ ಇದೇ ಮಣ್ಣು ನೆಲವನ್ನಗೆದಗೆದು,

ಸವೆದು ಮೊಂಡಾಗಿರುವ ಹಾರೆ, ಗುದ್ದಲಿ, ಸನಿಕೆ

ಅರಗಿನರಮನೆಯಲ್ಲಿ ತಡೆಯಲಾರದ ಸೆಖೆ

ಗಡುವು ಮೀರಿದರೂ, ಮುಂದುವರಿಯುವುದು ತನಿಖೆ!

ಈ ಇದೇ ಮಣ್ಣು ನೆಲದ ಪರಿಧಿಯೊಳಗೇ ಸುಳಿಸುಳಿದು,

ಬಿಡದೇ ಬೆಂಬತ್ತಿರುವ ಪೂರ್ವ ಸೂರಿಗಳ ಬಿಕ್ಕುಗಳು

ಸುಖದ ಉಷ್ಣದ ಜೊತೆಗೇ ಶೀತ ಮಾರುತದ ವಾಕ್ಕುಗಳು

ಮಥುರೆಯ ದಬ್ಬಾಳಿಕೆಯಲ್ಲರಳಿದ ದ್ವಾರಕೆಯ ನಕಾಶೆಗಳು.

ಈ ಇದೇ ಮಣ್ಣು ನೆಲದ ಘಮವನ್ನಾಸ್ವಾದಿಸತೊಡಗಿದರೆ;

ಪುಳಕ ಮೈಯಲ್ಲೆಲ್ಲ ಹರಡಿ, ಕನಸು ಕಾಮರಥಿ

ತಡೆಯಿಂದಿಳಿದಿಳಿದು ಹೊರ ಚಿಮ್ಮುವ ಬಾಗೀರಥಿ

ರಂಗು ರಂಗಿನುತ್ಸವಕೆ ಕಾಯ ಕರ್ಪೂರದಾರತಿ!

 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.