ಬಿತ್ತನೆಗೆ ಸಣ್ಣ ಯಂತ್ರ

ಸಾಮಾನ್ಯವಾಗಿ ಹೊಲದಲ್ಲಿ ಕೂರಿಗೆಯಿಂದ ಬಿತ್ತುವ ಪದ್ಧತಿ. ಕ್ರಮೇಣ ಟ್ರಾಕ್ಟರ್, ಟಿಲ್ಲರ್‌ಗಳಿಗೆ ಜೋಡಿಸುವ ಬಿತ್ತನೆ ಯಂತ್ರಗಳು ಬಂದವು. ಕಡಲೇಬೀಜ, ತೊಗರಿ, ಸೂರ್ಯಕಾಂತಿ, ಮುಸುಕಿನ ಜೋಳ, ರಾಗಿಗಳನ್ನು ಇವುಗಳ ಸಹಾಯದಿಂದ ಬಿತ್ತಬಹುದಾಗಿದೆ.



ಈ ಮೊದಲು ದೊಡ್ಡ ಯಂತ್ರ ಇತ್ತು. ಇದೇ ರೀತಿಯ ಚಿಕ್ಕ ಯಂತ್ರವನ್ನು ಮಧುಗಿರಿಯ ಕೃಷಿ ಉಪಕರಣ ತಜ್ಞ ಎಂ. ರಾಜೇಂದ್ರಕುಮಾರ್ ಅಭಿವೃದ್ಧಿಪಡಿಸಿದ್ದಾರೆ.



ಸಣ್ಣ ಗಾತ್ರದ ಈ ಯಾಂತ್ರೀಕೃತ ಕೂರಿಗೆಯಲ್ಲಿ ಕಡಿಮೆ ಪ್ರಮಾಣದಲ್ಲಿ ಬೀಜಗಳನ್ನು ಬಿತ್ತನೆ ಮಾಡಬಹುದು. ಅಲ್ಲದೆ ಬೀಜದ ಜತೆಜತೆಗೇ ನಿರ್ದಿಷ್ಟ ಪ್ರಮಾಣದ ಗೊಬ್ಬರವನ್ನೂ ಭೂಮಿಗೆ ಸೇರಿಸಬಹುದು.



ಈ ಸಾಧನವನ್ನು ಟ್ರಾಕ್ಟರ್‌ಗೆ ಜೋಡಿಸಿದರೆ ಸಾಕು. ಇನ್ನೊಂದು ವಿಶೇಷ ಎಂದರೆ ಬೀಜ ಹಾಕಿದ ನಂತರ ಅದನ್ನು ಮುಚ್ಚಲು ಹರಗುವುದರ ಅವಶ್ಯಕತೆಯಿರುವುದಿಲ್ಲ. ಇದು ಹರಗುವ ಕೆಲಸವನ್ನು ಸಹ ಸ್ವಯಂಚಾಲಿತವಾಗಿ ನಿರ್ವಹಿಸುತ್ತದೆ.



ಈಗಾಗಲೆ ತುಮಕೂರು ಜಿಲ್ಲೆಯ ಶಿರಾ, ಮಧುಗಿರಿ, ಆಂಧ್ರದ ಮಡಕಶಿರಾ ತಾಲೂಕುಗಳಲ್ಲಿ ಈ ಯಾಂತ್ರೀಕೃತ ಕೂರಿಗೆಯನ್ನು ಅನೇಕ ರೈತರು ಯಶಸ್ವಿಯಾಗಿ ಬಳಸುತ್ತಿದ್ದಾರೆ. ಇದರಲ್ಲಿ ಸಮಯದ ಉಳಿತಾಯವಾಗುತ್ತದೆ, ಬಿತ್ತನೆ ಆಳುಗಳ ಅವಶ್ಯಕತೆ ಇರುವುದಿಲ್ಲ ಎಂದು ರಾಜೇಂದ್ರ ಕುಮಾರ್ ಹೇಳುತ್ತಾರೆ. ಅವರ ಸಂಪರ್ಕ ಸಂಖ್ಯೆ 91642 34499, 90369 65401.