ಶನಿವಾರ, ಮೇ 28, 2022
26 °C

ವಿಂಬಲ್ಡನ್ ಟೆನಿಸ್: ಎರಡನೇ ಸುತ್ತಿಗೆ ಭೂಪತಿ-ಬೋಪಣ್ಣ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಲಂಡನ್ (ಪಿಟಿಐ): ವಿಶ್ವಾಸಪೂರ್ಣ ಆಟವಾಡಿದ ಮಹೇಶ್ ಭೂಪತಿ ಹಾಗೂ ರೋಹನ್ ಬೋಪಣ್ಣಗೆ ವಿಂಬಲ್ಡನ್ ಟೆನಿಸ್ ಟೂರ್ನಿಯ ಪುರುಷರ ಡಬಲ್ಸ್ ಮೊದಲ ಸುತ್ತಿನಲ್ಲಿ ಯಶಸ್ಸು ಸಿಕ್ಕಿತು.



ಬುಧವಾರ ತಮ್ಮ ಮೊದಲ ಸುತ್ತಿನ ಪಂದ್ಯದಲ್ಲಿ ಭಾರತದ ಜೋಡಿಯು 6-0, 7-6 (1), 6-2ರಲ್ಲಿ ಉರುಗ್ವೆಯ ಮಾರ್ಸೆಲ್ ಫೆಲ್ಡರ್ ಹಾಗೂ ಟ್ಯುನಿಷಿಯಾದ ಮಾಲೆಕ್ ಜಾಜೀರಿ ವಿರುದ್ಧ ಗೆಲುವು ಸಾಧಿಸಿ, ಎರಡನೇ ಸುತ್ತಿಗೆ ಕಾಲಿಟ್ಟಿತು.



ಏಳನೇ ಶ್ರೇಯಾಂಕ ಹೊಂದಿರುವ ಭೂಪತಿ ಮತ್ತು ಬೋಪಣ್ಣ ಅವರು ಒಂದು ತಾಸು 36 ನಿಮಿಷಗಳ ಈ ಹಣಾಹಣಿಯ ಪ್ರಥಮ ಸೆಟ್‌ನಲ್ಲಿ ಸುಲಭವಾಗಿ ಗೆದ್ದರು. ಎದುರಾಳಿಗಳಿಗೆ ಒಂದು ಗೇಮ್ ಕೂಡ ಬಿಟ್ಟುಕೊಡಲಿಲ್ಲ. ಆದರೆ ನಂತರದ ಸೆಟ್‌ನಲ್ಲಿ ಫೆಲ್ಡರ್ ಹಾಗೂ ಜಾಜೀರ್ ಪ್ರಬಲ ಪೈಪೋಟಿ ನಡೆಸಿದರು. ಆದರೂ ನಿರಾಸೆಯೇನು ಕಾಡಲಿಲ್ಲ.



ಕೊನೆಯ ಸೆಟ್‌ನಲ್ಲಿ ಸಾಕಷ್ಟು ಹೊಂದಾಣಿಕೆಯಿಂದ ಹೋರಾಡಿದ ಮಹೇಶ್-ರೋಹನ್‌ಗೆ ಗೆಲುವಿನ ಹಾದಿ ಕಷ್ಟದ್ದೆನಿಸಲಿಲ್ಲ. ಎದುರಾಳಿಗಳು ಎರಡು ಗೇಮ್ ಗೆದ್ದರೂ, ಪಂದ್ಯದ ಮೇಲಿನ ಬಿಗಿ ಹಿಡಿತವನ್ನು ಭಾರತದ ಜೋಡಿ ಸಡಿಲಗೊಳಿಸಲಿಲ್ಲ.



ಲಂಡನ್ ಒಲಿಂಪಿಕ್ ಕ್ರೀಡಾಕೂಟದಲ್ಲಿ ಪುರುಷರ ಡಬಲ್ಸ್‌ನಲ್ಲಿ ಜೊತೆಯಾಗಿ ಆಡುವ ಅವಕಾಶ ಪಡೆದಿರುವ ಬೋಪಣ್ಣ ಹಾಗೂ ಭೂಪತಿಗೆ ಈ ಟೂರ್ನಿ ಅಭ್ಯಾಸದ ವೇದಿಕೆಯಾಗಿದೆ. ಇಲ್ಲಿ ಪ್ರಶಸ್ತಿ ಗೆಲ್ಲುವ ಮಟ್ಟವನ್ನು ಮುಟ್ಟುವ ಮೂಲಕ ಒಲಿಂಪಿಕ್‌ಗೆ ಮುನ್ನ ವಿಶ್ವಾಸ ಹೆಚ್ಚಿಸಿಕೊಳ್ಳಬೇಕು.



ಇಲ್ಲಿ ಎರಡನೇ ಸುತ್ತಿನ ಪಂದ್ಯದಲ್ಲಿ ಭಾರತದ ಜೋಡಿಗೆ ಯಾರು ಎದುರಾಗುತ್ತಾರೆನ್ನುವುದು ಇನ್ನೂ ನಿರ್ಧಾರವಾಗಿಲ್ಲ. ರಷ್ಯಾದ ಮಿಖೈಲ್ ಎಲ್ಗಿನಿ-ಉಜ್ಬೇಕಿಸ್ತಾನದ ಡೆನಿಸ್ ಐಸ್ಟೊಮಿನ್ ಹಾಗೂ ಸ್ಪೇನ್‌ನವರಾದ ಪಾಬ್ಲೊ ಆ್ಯಂಡುಜಾರ್-ಗುಲಿರ್ಮೊ ಗಾರ್ಸಿಯಾ ನಡುವಣ ಪಂದ್ಯದಲ್ಲಿ ಗೆಲ್ಲುವ ಜೋಡಿ ಎದುರಾಳಿ ಆಗಲಿದೆ.



ಇವಾನೊವಿಕ್‌ಗೆ ಜಯ: ಹದಿನಾಲ್ಕನೇ ಶ್ರೇಯಾಂಕ ಹೊಂದಿರುವ ಸರ್ಬಿಯಾದ ಅನಾ ಇವಾನೊವಿಕ್ ಅವರು ಮಹಿಳೆಯರ ಸಿಂಗಲ್ಸ್ ಮೊದಲ ಸುತ್ತಿನ ಪಂದ್ಯದಲ್ಲಿ ವಿಜಯ ಸಾಧಿಸಿ, ಮುಂದಿನ ಸುತ್ತಿನಲ್ಲಿ ಉಕ್ರೇನ್‌ನ ಕ್ಯಾಥರಿನಾ ಬೊದಾರೆಂಕೊ ವಿರುದ್ಧ ಹೋರಾಡಲು ಸಜ್ಜಾಗಿದ್ದಾರೆ.



ಆಕರ್ಷಕ ಆಟದಿಂದ ಗಮನ ಸೆಳೆದ ಅನಾ ಎರಡನೇ ಸೆಟ್‌ನಲ್ಲಿ ನಿರಾಸೆ ಹೊಂದಿದರೂ 6-3, 3-6, 6-3ರಲ್ಲಿ ಸ್ಪೇನ್‌ನ ಜೋಸ್ ಮಾರ್ಟಿನೇಜ್ ಸಾಂಚೇಜ್ ವಿರುದ್ಧ ಗೆಲುವು ಸಾಧಿಸಿದರು. ಇನ್ನೊಂದು ಪಂದ್ಯದಲ್ಲಿ ಕ್ಯಾಥರಿನಾ 5-7, 6-3, 6-3ರಲ್ಲಿ ಜಪಾನ್‌ನ ಕಿಮಿಕೊ ಡೇಟ್ ಕ್ರುಮ್ ಎದುರು ಜಯಿಸಿದರು.



ಮುರ‌್ರೆಗೆ ಶರಣಾದ ನಿಕೊಲಯ್: ನಾಲ್ಕನೇ ಶ್ರೇಯಾಂಕದ ಆಟಗಾರ ಇಂಗ್ಲೆಂಡ್‌ನ ಆ್ಯಂಡಿ ಮರ‌್ರೆಗೆ ಮೊದಲ ಸುತ್ತಿನ ಪಂದ್ಯವು ಕಷ್ಟದ್ದಾಗಲೇ ಇಲ್ಲ. ಅವರು 6-1, 6-1, 6-4ರಲ್ಲಿ ರಷ್ಯಾದ ನಿಕೊಲಯ್ ಡವಿಡೆಂಕೊ ವಿರುದ್ಧ ಗೆದ್ದು ಎರಡನೇ ಸುತ್ತಿಗೆ ರಹದಾರಿ ಪಡೆದರು.



ಸ್ಪೇನ್‌ನ ಟೆನಿಸ್ ತಾರೆ ಏಳನೇ ಶ್ರೇಯಾಂಕದ ಡೇವಿಡ್ ಫೆರೆರ್ 7-6 (7-5), 6-4, 6-4ರಲ್ಲಿ ಜರ್ಮನಿಯ ಡಸ್ಟಿನ್ ಬ್ರೌನ್ ಅವರನ್ನು ಪರಾಭವಗೊಳಿಸಿದರು. ಅರ್ಜೆಂಟೀನಾದ ಜುವಾನ್ ಮಾರ್ಟಿನ್ ಡೆಲ್ ಪಾಟ್ರೊ ಅವರು 6-4, 3-6, 7-6 (7-3), 7-5ರಲ್ಲಿ ಹಾಲೆಂಡ್‌ನ ರಾಬಿನ್ ಹಾಸ್ ಎದುರು ಗೆದ್ದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.