ಶಿಕ್ಷಣ ಹಕ್ಕು ಕಾಯ್ದೆ: 867 ಮಕ್ಕಳ ದಾಖಲು

ವಿಜಯಪುರ: ಶಿಕ್ಷಣ ಹಕ್ಕು ಕಾಯ್ದೆಯಡಿ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ 4 ತಾಲ್ಲೂಕುಗಳಲ್ಲಿ 67 ಮಕ್ಕಳನ್ನು ಪೂರ್ವ ಪ್ರಾಥಮಿಕ ತರಗತಿಗೂ ಮತ್ತು 800 ಮಕ್ಕಳನ್ನು ಒಂದನೇ ತರಗತಿಗೂ ದಾಖಲಿಸಿಕೊಳ್ಳಲಾಗಿದೆ ಎಂದು ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಸಾರ್ವಜನಿಕ ಶಿಕ್ಷಣ ಇಲಾಖೆಯ ಉಪನಿರ್ದೇಶಕ ಎಚ್.ವಿ. ವೆಂಕಟೇಶಪ್ಪ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.



ಜಿಲ್ಲೆಯಲ್ಲಿ ಈ ಕಾಯ್ದೆಯ ವ್ಯಾಪ್ತಿಗೆ 175 ಖಾಸಗಿ ಪ್ರಾಥಮಿಕ ಶಾಲೆಗಳು ಒಳಪಡುತ್ತವೆ. ಶಿಕ್ಷಣ ಹಕ್ಕು ಕಾಯ್ದೆಯಡಿ ಶೇ 25ರ ಮೀಸಲಾತಿ ಅನ್ವಯ ಈ ಶಾಲೆಗಳಲ್ಲಿ ಒಟ್ಟು 1259 ಸ್ಥಾನಗಳನ್ನು ಕಾಯ್ದಿರಿಸಲಾಗಿತ್ತು.



ಇದಕ್ಕಾಗಿ ಬಂದ ಅರ್ಜಿಗಳಲ್ಲಿ 1070 ಅರ್ಜಿಗಳು ಸ್ವೀಕೃತವಾಗಿದ್ದವು. ಅವುಗಳಲ್ಲಿ 81 ಅರ್ಜಿಗಳು ಪೂರ್ವ ಪ್ರಾಥಮಿಕಕ್ಕೂ (ಎಲ್‌ಕೆಜಿ), 991 ಅರ್ಜಿಗಳು 1ನೇ ತರಗತಿಗೂ ಅನ್ವಯಿಸಿದ್ದವು. ಇವುಗಳನ್ನು ಸೂಕ್ತ ಪರಿಶೀಲನೆ ನಡೆಸಿ ಸೀಟುಗಳ ಹಂಚಿಕೆ ಮಾಡಲಾಗಿದೆ ಎಂದು ಅವರು ತಿಳಿಸಿದರು.

2011-12ರಲ್ಲಿದ್ದಂತೆ 1ನೇ ತರಗತಿಯ ಒಟ್ಟು ದಾಖಲಾತಿ 5036 ಆಗಿತ್ತು.