ಬುಧವಾರ, ಜೂನ್ 16, 2021
27 °C

ಹಣದುಬ್ಬರ,‘ಐಐಪಿ’ ಪ್ರಭಾವ?

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ನವದಹಲಿ (ಪಿಟಿಐ):   ಕೈಗಾರಿಕಾ ಪ್ರಗತಿ ಸೂಚ್ಯಂಕ (ಐಐಪಿ) ಮತ್ತು ಹಣದುಬ್ಬರ ಅಂಕಿ ಅಂಶಗಳು ಕ್ರಮ­ವಾಗಿ ಮಾರ್ಚ್‌ 12 ಮತ್ತು 14ರಂದು ಪ್ರಕಟ­­ಗೊಳ್ಳಲಿವೆ. ಇದರ ಜತೆಗೆ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರ (ಎಫ್‌ಐಐ) ಚಟುವಟಿಕೆ ಸಹ ಈ ವಾರ ಷೇರುಪೇಟೆ ವಹಿವಾಟಿನ ಗತಿ ನಿರ್ಧರಿಸಲಿವೆ ಎಂದು ಮಾರುಕಟ್ಟೆ ತಜ್ಞರು ವಿಶ್ಲೇಷಿಸಿದ್ದಾರೆ.



  ಕಳೆದ ವಾರ ವಿದೇಶಿ ಸಾಂಸ್ಥಿಕ ಹೂಡಿ­ಕೆದಾರರು ₨5,044.54 ಕೋಟಿ ಮೌಲ್ಯದ ಷೇರು ಖರೀದಿಸಿ­ದ್ದಾರೆ. ಚುನಾ­ವಣೆ ದಿನಾಂಕ ಪ್ರಕಟವಾದ ನಂತರ ‘ಎಫ್‌ಐಐ’ ಚಟುವಟಿಕೆ ದಾಖಲೆ ಪ್ರಮಾಣದಲ್ಲಿ ಹೆಚ್ಚಿದೆ. ಚಾಲ್ತಿ ಖಾತೆ ಕೊರತೆ (ಸಿಎಡಿ) ತಗ್ಗಿರುವುದು ಮತ್ತು ಡಾಲರ್‌ ವಿರುದ್ಧ ರೂಪಾಯಿ ಮೌಲ್ಯ ಚೇತರಿಕೆ ಕಂಡಿರುವುದೂ ಷೇರು­ಪೇಟೆಗೆ ಬಲ ತುಂಬಿವೆ ಎಂದು ಬೊನಾಂಜಾ ಪೋರ್ಟ್‌ಪೊಲಿಯೊ ಸಂಸ್ಥೆ ಹೇಳಿದೆ. 



ಅಮೆರಿಕದ ಉದ್ಯೋಗ ಮಾರುಕಟ್ಟೆ ಚೇತರಿಕೆ ಕಂಡಿರುವುದು ಏಷ್ಯಾದ ಷೇರುಪೇಟೆಗಳ ಮೇಲೆ ಸಕಾರಾತ್ಮಕ ಪರಿಣಾಮ ಬೀರುವ ಸಾಧ್ಯತೆ ಇದೆ. ಫೆಬ್ರುವರಿಯಲ್ಲಿ ಅಮೆರಿಕದಲ್ಲಿ ಕೃಷಿಯೇತರ ವಲಯದಲ್ಲಿ 1.75 ಲಕ್ಷ ಉದ್ಯೋಗಾವಕಾಶಗಳು ಸೃಷ್ಟಿಯಾ­ಗಿವೆ. ಈ ಅಂಕಿ ಅಂಶಗಳು ಶುಕ್ರವಾರ ಅಧಿಕೃತವಾಗಿ ಪ್ರಕಟ­ಗೊಳ್ಳಲಿದೆ.  ಸೋಮವಾರ ವಹಿ­ವಾಟು ಆರಂಭವಾ­ಗುತ್ತಿ­ದ್ದಂತೆ ಏಷ್ಯಾದ ಷೇರುಪೇಟೆಗಳಲ್ಲಿ ಏರಿಕೆ ನಿರೀಕ್ಷಿಸಬ­ಹುದು ಎಂದು ರೆಲಿ­ಗೇರ್‌ ಸೆಕ್ಯುರಿಟೀಸ್‌ನ ಅಧ್ಯಕ್ಷ ಜಯಂತ್‌ ಮಂಗ್ಲಿಕ್‌  ಅಭಿಪ್ರಾಯ­ಪಟ್ಟಿದ್ದಾರೆ. 



ಕಳೆದ ವಾರಾಂತ್ಯದಲ್ಲಿ ಸೂಚ್ಯಂಕ ಹೊಸ ದಾಖಲೆ ಮಟ್ಟವಾದ 21,919 ಅಂಶ­ಗಳಿಗೆ ಏರಿಕೆ ಕಂಡಿದೆ.  ರಾಷ್ಟ್ರೀಯ ಷೇರು ಸೂಚ್ಯಂಕ ‘ನಿಫ್ಟಿ’ ಕೂಡ 6,526 ಅಂಶಗಳಲ್ಲಿ ವಹಿವಾಟು ಕೊನೆಗೊ­ಳಿಸಿದೆ. ‘ಬಿಎಸ್‌ಇ’ ಒಂದು ವಾರದಲ್ಲಿ ಶೇ 3.79ರಷ್ಟು ಅಂದರೆ 800 ಅಂಶಗಳಷ್ಟು ಏರಿಕೆ ಕಂಡಿದೆ.



ಜನವರಿ ತಿಂಗಳ ಕೈಗಾರಿಕಾ ಪ್ರಗತಿ ಸೂಚ್ಯಂಕ (ಐಐಪಿ) ಮತ್ತು ಗ್ರಾಹಕ ಬೆಲೆ ಸೂಚ್ಯಂಕ (ಸಿಪಿಐ) ಆಧರಿಸಿದ ಹಣದು­ಬ್ಬರ ಅಂಕಿ ಅಂಶಗಳು ಬುಧವಾರ ಪ್ರಕಟಗೊಳ್ಳಲಿವೆ. ಇದರ ಬೆನ್ನಿಗೇ ಶುಕ್ರವಾ­ರದೆಂದು ಸಗಟು ಬೆಲೆ ಸೂಚ್ಯಂಕ ಆಧರಿಸಿದ (ಡಬ್ಲ್ಯುಪಿಐ) ಹಣದುಬ್ಬರ ದರ ಪ್ರಕಟಗೊಳ್ಳಲಿದೆ. ಏಪ್ರಿಲ್‌ 1ರಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ ಹಣಕಾಸು ನೀತಿ ಪರಾಮರ್ಶೆ ಪ್ರಕಟಿಸಲಿದ್ದು ಈ ಅಂಕಿ ಅಂಶಗಳು ‘ಆರ್‌ಬಿಐ’ ನೀತಿಯ ಮೇಲೆ ಪ್ರಭಾವ ಬೀರುವ ಸಾಧ್ಯತೆಗಳಿವೆ ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು. 



ಮರಳಿದ ವಿಶ್ವಾಸ

‘ಎಫ್‌ಐಐ’ ಹೂಡಿಕೆ ಹೆಚ್ಚಿರುವುದು, ರೂಪಾಯಿ ಮೌಲ್ಯ ಸ್ಥಿರಗೊಂಡಿ­ರುವುದು ಹೂಡಿಕೆದಾರರಲ್ಲಿ ವಿಶ್ವಾಸ ಹೆಚ್ಚಿಸಿದೆ. ಚುನಾವಣೆ ನಂತರ ಸ್ಥಿರವಾದ ಸರ್ಕಾರ ರಚನೆಯಾಗ­ಬಹು­ದು ಎಂಬ  ನಿರೀಕ್ಷೆ ಇರುವುದಿಂದ ಸೂಚ್ಯಂಕ ಸದ್ಯ ಏರುಗತಿಯಲ್ಲಿದೆ’ ಎಂದು ಕೊಟಕ್‌ ಸೆಕ್ಯುರಿಟೀಸ್‌ನ ಉಪಾಧ್ಯಕ್ಷ ಸಂಜೀವ್‌ ಜರ್ಬದೆ ಹೇಳಿದ್ದಾರೆ.



‘ಹಣದುಬ್ಬರ ಮತ್ತು ಚಾಲ್ತಿ ಖಾತೆ ಕೊರತೆ (ಸಿಎಡಿ) ತಗ್ಗಿರುವುದರಿಂದ ಈ ಬಾರಿ  ‘ಆರ್‌ಬಿಐ’ ಅಲ್ಪಾವಧಿ ಬಡ್ಡಿ ದರ ತಗ್ಗಿಸುವ ಸಾಧ್ಯತೆ ಹೆಚ್ಚಿದೆ. ಹೂಡಿಕೆ­ದಾರರು ಇದರ ಮೇಲೆ ನಿಗಾ ವಹಿಸು­ತ್ತಿದ್ದಾರೆ’ ಎಂದು ಕ್ಯಾಪಿಟಲ್‌ ವಯಾ ಗ್ಲೋಬಲ್‌ ರಿಸರ್ಚ್‌ ಸಂಸ್ಥೆಯ ವಿವೇಕ್‌ ಗುಪ್ತಾ ಹೇಳಿದ್ದಾರೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.