ಭಾನುವಾರ, ಏಪ್ರಿಲ್ 18, 2021
33 °C

ಹಾರ್ದಿಕಾ ಫಿಟ್‌ನೆಸ್‌ನಲ್ಲಿ ಹರಕೆಯೂ ಸೇರಿದೆ!

ಎಚ್.ಎಸ್.ರೋಹಿಣಿ Updated:

ಅಕ್ಷರ ಗಾತ್ರ : | |

ಹಾರ್ದಿಕಾ ಫಿಟ್‌ನೆಸ್‌ನಲ್ಲಿ ಹರಕೆಯೂ ಸೇರಿದೆ!

`ದೇವರ ಹರಕೆಗಾಗಿ ಮಾಂಸಾಹಾರ ತಿನ್ನುವುದನ್ನು ಬಿಟ್ಟಿರುವೆ. ಅದು ನನ್ನ ಫಿಟ್‌ನೆಸ್‌ಗೂ ನೆರವಾಗಿದೆ~ ಎಂದು ನಕ್ಕರು ಹಾರ್ದಿಕಾ ಶೆಟ್ಟಿ.



ಹೊಳೆವ ಮೈಕಾಂತಿಯ ಸಪೂರ ಚೆಲುವೆ ಹಾರ್ದಿಕಾ ಮಂಗಳೂರಿನವರು. ಅವರೀಗ `ಬೆಂಗಳೂರು ಮೆಟ್ರೊ~ ಮತ್ತು `ಗಲಾಟೆ~ ಚಿತ್ರಗಳ ಚಿತ್ರೀಕರಣ ಮುಗಿಸಿ ಬಿಡುಗಡೆಗೆ ಕಾಯುತ್ತಿದ್ದಾರೆ. ನಿಶಾ ಶೆಟ್ಟಿ ಎಂಬ ತಮ್ಮ ನಾಮಾಂಕಿತವನ್ನು ಹಾರ್ದಿಕಾ ಎಂದು ಬದಲಿಸಿಕೊಂಡು ಸಂಖ್ಯಾಶಾಸ್ತ್ರದ ಮ್ಯಾಜಿಕ್ ನಡೆಯುವುದೇ ಎಂದು ಕಾದು ಕುಳಿತಿದ್ದಾರೆ.



`ನಟಿಯಾದ ಮೇಲೆ ಚೆನ್ನಾಗಿ ಕಾಣಿಸುವುದು ತುಂಬಾನೆ ಮುಖ್ಯ~ ಎನ್ನುವ ಅವರು ಫಿಟ್‌ನೆಸ್‌ಗೆ ಆದ್ಯತೆ ನೀಡುವ ನಟಿ. `ಪ್ರತಿದಿನ ಕನಿಷ್ಠ ಒಂದು ಗಂಟೆ ಯೋಗ ಮಾಡುವೆ. ಅದೇ ನನ್ನ ಆರೋಗ್ಯಕರ ಮೈಕಾಂತಿಯ ಗುಟ್ಟು. ಆಗಾಗ ಏರೋಬಿಕ್ಸ್ ಕೂಡ ಮಾಡುತ್ತೇನೆ.



ಆದರೆ ನಿಯಮಿತವಾಗಿ ಯೋಗ ಮಾಡುವುದನ್ನು ಮಾತ್ರ ತಪ್ಪಿಸುವುದಿಲ್ಲ~ ಎನ್ನುವ ಅವರಿಗೆ ತಿನ್ನುವ ಆಹಾರದ ಬಗ್ಗೆಯೂ ಎಚ್ಚರ ಇದೆ. ಕೇವಲ ಸಣ್ಣಗಾಗಬೇಕು ಎಂದು ಅತಿಯಾದ ಡಯಟಿಂಗ್‌ಗೆ ಮೊರೆಹೋಗದ ಅವರು ಆರೋಗ್ಯಕರ ಡಯಟಿಂಗ್‌ಗೆ ಮನಸೋತವರು.



`ಅನ್ನ ಜಾಸ್ತಿ ತಿಂದರೆ ಮುಖ ಊದಿಬಿಡುತ್ತದೆ. ಅದಕ್ಕೇ ನಾನು ಅನ್ನ ತಿನ್ನಲ್ಲ. ಹೆಚ್ಚಾಗಿ ತರಕಾರಿ, ಹಣ್ಣು ತಿನ್ನುತ್ತೇನೆ, ಜ್ಯೂಸ್‌ಗಳನ್ನು ಕುಡಿಯುತ್ತೇನೆ. ಜಂಕ್‌ಫುಡ್ ತಿನ್ನುವುದೇ ಇಲ್ಲ. ಇನ್ನು ನನ್ನಿಷ್ಟದ ಚಿಕನ್ ತಿನ್ನುವುದನ್ನು ಬಿಟ್ಟುಬಿಟ್ಟಿದ್ದೇನೆ~ ಎಂದು ಪಟ್ಟಿ ಒಪ್ಪಿಸುತ್ತಾರೆ.



ಅವರು ಮಾಂಸಾಹಾರ ತ್ಯಜಿಸಿರುವುದರ ಹಿಂದೆ ಫಿಟ್‌ನೆಸ್‌ಗಿಂತ ಹೆಚ್ಚಾಗಿ ದೇವರಿಗೆ ಮಾಡಿಕೊಂಡಿರುವ ಹರಕೆಯೇ ಕಾರಣ. ತಾವು ಜನಪ್ರಿಯ ನಟಿಯಾಗಬೇಕೆಂಬ ಸಂಕಲ್ಪ ತೊಟ್ಟು ಇಷ್ಟದ ಮಾಂಸಾಹಾರವನ್ನು ಬಿಟ್ಟಿದ್ದಾರಂತೆ. ಜೊತೆಗೆ ಅದು ಫಿಟ್‌ನೆಸ್‌ಗೂ ಸಹಕಾರಿಯಾಗಿದೆ ಎನ್ನುತ್ತಾರವರು.



`ಮಾಂಸಾಹಾರದಿಂದ ದೇಹದಲ್ಲಿ ಹೆಚ್ಚು ಕೊಬ್ಬಿನಂಶ ಶೇಖರಣೆಯಾಗುತ್ತದೆ. ಅದನ್ನು ಬಿಡುವುದರಿಂದ ಕೊಬ್ಬು ದೇಹದಲ್ಲಿ ಸೇರುವುದನ್ನು ನಿಯಂತ್ರಿಸಬಹುದು. ನಾನು ಯಾವುದೇ ಡಯಟೀಶಿಯನ್ ಅಥವಾ ಫಿಟ್‌ನೆಸ್ ಗುರುಗಳನ್ನು ಆಶ್ರಯಿಸಿಲ್ಲ. ಆರೋಗ್ಯಕರವಾದ ಹವ್ಯಾಸಗಳನ್ನು ಸಣ್ಣಂದಿನಿಂದ ಬೆಳೆಸಿಕೊಂಡಿರುವುದರಿಂದ ನನ್ನ ವೃತ್ತಿಗೆ ಅದು ನೆರವಾಗಿದೆ~ ಎನ್ನುತ್ತಾರೆ.



`ನಟಿಯಾಗಿ ಮೈಕಟ್ಟು ಕಾಯ್ದುಕೊಳ್ಳುವುದು ಎರಡನೆಯ ಸಂಗತಿ. ಆದರೆ ಮಾನವರಾಗಿ ಆರೋಗ್ಯವಂತ ಮೈಕಟ್ಟು ಹೊಂದುವುದು ಎಲ್ಲರಿಗೂ ಮುಖ್ಯ~ ಎನುವುದರಲ್ಲಿ ನಂಬಿಕೆ ಇಟ್ಟಿರುವ ಹಾರ್ದಿಕಾಗೆ ಮೈಯ್ಯಲ್ಲಿ ಆರೋಗ್ಯ ಇಲ್ಲದಿದ್ದರೆ ಮುಖದ ಕಾಂತಿ ಮೆರೆಯಾದಂತೆ ಎನಿಸಿದೆ. 



ನಟಿಯಾಗಿರುವುದರಿಂದ ಕೊಂಚ ಹೆಚ್ಚು ಫಿಟ್‌ನೆಸ್ ಕಡೆ ಗಮನಹರಿಸಿರುವ ಹಾರ್ದಿಕಾ ಸಣ್ಣಗಿದ್ದರೂ ಆಕರ್ಷಕವಾಗಿರಬೇಕೆಂಬಾಸೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.