ಶುಕ್ರವಾರ, ಜೂನ್ 25, 2021
22 °C

ಹುಬ್ಬಳ್ಳಿಯಲ್ಲಿ ಹೊನಲು ಬೆಳಕಿನ ಕ್ರಿಕೆಟ್‌!

ಪ್ರಜಾವಾಣಿ ವಾರ್ತೆ ಹುಬ್ಬಳ್ಳಿ: ರಾಜನಗರದ ಕೆಎ Updated:

ಅಕ್ಷರ ಗಾತ್ರ : | |

ಹುಬ್ಬಳ್ಳಿ: ರಾಜನಗರದ ಕೆಎಸ್‌ಸಿಎಯ ಹಸಿರು ಅಂಗಣ, ದೇಶಪಾಂಡೆ ನಗರದ ಕರ್ನಾಟಕ ಜಿಮ್ಖಾನಾ ಮೈದಾನದ ಟರ್ಫ್ ಪಿಚ್‌ ಮುಂತಾದ ಸೌಲಭ್ಯಗಳನ್ನು ಹೊಂದಿರುವ ಹುಬ್ಬಳ್ಳಿ ಕ್ರಿಕೆಟ್‌ ಕ್ಷೇತ್ರಕ್ಕೆ ಈಗ ಮತ್ತೊಂದು ಗರಿಮೆಯ ಸೇರ್ಪಡೆ­ಯಾಗಿದೆ. ವಿಶ್ವೇಶ್ವರನಗರದ ಹುಬ್ಬಳ್ಳಿ ಕ್ರಿಕೆಟ್‌ ಅಕಾಡೆಮಿಯಲ್ಲಿ (ಎಚ್‌ಸಿಎ) ಹೊನಲು ಬೆಳಕಿನ ಸೌಲಭ್ಯ ಬಂದಿದೆ.



ಹದಿನೈದು ವರ್ಷಗಳಿಂದ ಕ್ರಿಕೆಟ್‌ ತರಬೇತಿ­ಯಲ್ಲಿ ತೊಡಗಿಕೊಂಡಿರುವ ಎಚ್‌ಸಿಎ ಆವರಣದ ನೆಟ್ಸ್‌ನಲ್ಲಿ ಎಲ್‌ಇಡಿ ಮತ್ತು ಹ್ಯಾಲೋಜೆನ್‌ ಬಲ್ಬ್‌ಗಳು ಪ್ರಖರ ಬೆಳಕು ಬೀರಲು ತೊಡಗಿದ್ದು ಈ ಸೌಲಭ್ಯದ ಅಧಿಕೃತ ಉದ್ಘಾಟನೆ ಇದೇ 21ರಂದು ಸಂಜೆ ಏಳು ಗಂಟೆಗೆ ನಡೆಯಲಿದೆ.



ಮೂರು ಟರ್ಫ್‌ ಪಿಚ್‌, ಎರಡು ಕಾಂಕ್ರೀಟ್‌ ಮತ್ತು ಒಂದು ಮ್ಯಾಟಿಂಗ್‌ ಪಿಚ್‌ ಇಲ್ಲಿದೆ. ಇವು­ಗಳ ಮೇಲೆ ಒಟ್ಟು ಹದಿನೆಂಟು ಎಲ್‌ಇಡಿ ಬಲ್ಬ್‌­ಗಳನ್ನು ಅಳವಡಿಸಲಾಗಿದೆ. ಬೌಲಿಂಗ್‌ ಮಾಡುವ ಭಾಗದಲ್ಲಿ ಆರು ಹ್ಯಾಲೋಜೆನ್ ಬಲ್ಬ್‌ಗಳು ಬೆಳಕು ಬೀರುತ್ತವೆ. ಬೌಲಿಂಗ್‌ ಯಂತ್ರ, ಯಾಂತ್ರೀಕೃತ ರೋಲರ್‌ ಮತ್ತು ವಿಡಿಯೋ ಅನಾಲಿಸಿಸ್‌ ಸೌಲಭ್ಯ ಇರುವ ಕ್ಲಬ್‌ನಲ್ಲಿ ಹೊನಲು ಬೆಳಕು ಕೂಡ ಬಂದಿರುವುದು ರಾತ್ರಿ­ಯೂ ಅಭ್ಯಾಸ ಮಾಡಲು ನೆರವಾಗಲಿದೆ. ಉತ್ತರ ಕರ್ನಾಟಕದ ಮೊದಲ ಹೊನಲು ಬೆಳಕಿನ ಸೌಲಭ್ಯ ಎಂಬ ಖ್ಯಾತಿಯೂ ಇಲ್ಲಿಗೆ ಬಂದಂತಾಗಿದೆ.



ಎಚ್‌ಸಿಎ ಆವರಣದಲ್ಲಿ ಹೆಚ್ಚು ಜಾಗ ಇಲ್ಲ. ಕೇವಲ ಹತ್ತು ಗುಂಟೆ ಜಾಗದಲ್ಲಿ ಪಿಚ್‌ಗಳು, ಕಚೇರಿ ಇತ್ಯಾದಿ ಇದೆ. ಹೀಗಾಗಿ ಹೆಚ್ಚು ಮಂದಿಗೆ ಅಭ್ಯಾಸ ಮಾಡಲು ಸಾಧ್ಯವಾಗುತ್ತಿಲ್ಲ. ಬೇಸಿಗೆ ಶಿಬಿರ ಸದ್ಯದಲ್ಲೇ ಆರಂಭವಾಗಲಿದೆ. ಈ ಸಂದರ್ಭದಲ್ಲಿ ಮಕ್ಕಳಿಗೆ ಹಗಲು ತರಬೇತಿ ನೀಡಿ ಕ್ಲಬ್‌ ಸದಸ್ಯರು ರಾತ್ರಿ ಕೂಡ ಅಭ್ಯಾಸ ಮಾಡ­ಬಹುದು ಎಂಬ ಉದ್ದೇಶದಿಂದ ಈ ಸೌಲಭ್ಯ ಕಲ್ಪಿಸ­ಲಾಗಿದೆ. ಭವಿಷ್ಯದಲ್ಲಿ ಹುಬ್ಬಳ್ಳಿ ಕ್ರಿಕೆಟ್‌ ಬೆಳವಣಿ­ಗೆಗೆ ಇದು ಸಹಕಾರಿಯಾಗಲಿದೆ ಎಂಬುದು ಕ್ಲಬ್ ಪದಾಧಿಕಾರಿಗಳ ಅನಿಸಿಕೆ.



ಕ್ಲಬ್‌ನ ಸಂಸ್ಥಾಪಕರಲ್ಲಿ ಒಬ್ಬರಾಗಿರುವ ವಿಜಯ ಕಾಮತ್‌ ಅವರ ಕನಸಿನ ಕೂಸಾದ ಹೊನಲು ಬೆಳಕಿನ ಸೌಲಭ್ಯವನ್ನು ಕಾರ್ಯರೂಪಕ್ಕೆ ತಂದ­ವರು ಹೆಸ್ಕಾಂ ಉದ್ಯೋಗಿ ಮಂಜುನಾಥ ದೊಡಮನಿ. ‘ಪಿಚ್ ಮೇಲೆ ಅಳವಡಿಸಿರುವ ಬಲ್ಬ್‌ಗಳು ಹಗಲು ಬೆಳಕಿನಷ್ಟೇ ಪರಿಣಾಮ ಬೀರಬಲ್ಲವು. ಅಭ್ಯಾಸ ನಡೆಸುವ  ಪಿಚ್‌ ಮೇಲಿನ ಬಲ್ಬ್‌ಗಳನ್ನು ಮಾತ್ರ ಉರಿಸುವ ಸೌಲಭ್ಯ ಇದೆ. ಇತರ ಬಲ್ಬ್‌ಗಳನ್ನು ಬಳಸದೇ ಇರುವುದರಿಂದ ವಿದ್ಯುತ್‌ ಪೋಲಾಗುವುದನ್ನು ತಪ್ಪಿಸಬಹುದಾ­ಗಿದೆ’ ಎನ್ನುತ್ತಾರೆ ಮಂಜುನಾಥ.



‘ಇದು ` 1 ಲಕ್ಷದ ಯೋಜನೆ. ಬೆಂಗಳೂರು ಬಿಟ್ಟರೆ ಬೇರೆಲ್ಲೂ ಇಂಥ ಸೌಲಭ್ಯ ಇಲ್ಲ. ಹುಡು­ಗರಿಗೆ ಇದನ್ನು ಅರ್ಪಿಸುತ್ತಿದ್ದೇವೆ, ಬಳಸಿಕೊಂಡು ಬೆಳೆ­ಯುವುದು. ಹುಬ್ಬಳ್ಳಿ ಕ್ರಿಕೆಟ್‌ ಬೆಳೆಸುವುದು ಅವರಿಗೆ ಬಿಟ್ಟ ವಿಚಾರ’ ಎಂದು ವಿಜಯ ಕಾಮತ್‌ ಹೇಳಿದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.