ಹೊಲೆಯರಿಗೆ ದಕ್ಕದ ಅವಕಾಶ: ಅಸಮಾಧಾನ

ಕೋಲಾರ: ಲೋಕಸಭಾ ಚುನಾ­ವಣೆ­ಗಳಲ್ಲಿ ಜೆಡಿಎಸ್‌ ಮತ್ತು ಬಿಜೆಪಿ ನಿರಂತರವಾಗಿ ಹೊಲೆಯ ಸಮು­ದಾಯಕ್ಕೆ ಅನ್ಯಾಯ ಮಾಡುತ್ತಿದೆ. ಸಮುದಾಯಕ್ಕೆ ಸೇರಿದ ಆಕಾಂಕ್ಷಿಗಳಿಗೆ ಟಿಕೆಟ್‌ ನಿರಾಕರಿಸುವ ಮೂಲಕ ಸಾಮಾಜಿಕ ನ್ಯಾಯಕ್ಕೂ ಧಕ್ಕೆ ತರುತ್ತಿದೆ ಎಂದು ಜಿ. ಪಂ. ಮಾಜಿ ಸದಸ್ಯ ಬಾಲಾಜಿ ಚೆನ್ನಯ್ಯ ಆರೋಪಿಸಿದರು.



ನಗರದಲ್ಲಿ ಮಂಗಳವಾರ ಹೊಲೆ­ಯರ ಕ್ಷೇಮಾಭಿವೃದ್ಧಿ ಸಂಘವು ‘ಮುಂದಿನ ರಾಜಕೀಯ ನಿಲುವು’ ಕುರಿತು ಏರ್ಪಡಿಸಿದ್ದ ಸಂಕಿರಣದಲ್ಲಿ ಮಾತನಾಡಿದ ಅವರು, ಪರಿಶಿಷ್ಟ ಜಾತಿಗೆ ಮೀಸಲಾಗಿರುವ ಕ್ಷೇತ್ರದಲ್ಲಿ, ಅಸ್ಪೃಶ್ಯತೆಯ ಕರಾಳ ನೆರಳಿನಲ್ಲಿ ನಲುಗಿದ ಹೊಲೆಯ ಸಮುದಾಯಕ್ಕೆ ಸೇರಿದ ಸುಮಾರು 4.50 ಲಕ್ಷ ಮತ­ದಾರ­ರಿದ್ದಾರೆ. ಬಹುಸಂಖ್ಯಾತ ಮತ­ದಾರರಿರುವ ಸಮುದಾಯವನ್ನು ಈ ಪಕ್ಷಗಳು ನಿರ್ಲಕ್ಷಿಸುತ್ತಲೇ ಬರುತ್ತಿವೆ.



ಪರಿಶಿಷ್ಟ ಜಾತಿಯಲ್ಲೇ ಸ್ಪೃಶ್ಯ ಸಮು­ದಾಯಕ್ಕೆ ಸೇರಿದ ಭೋವಿ ಆಕಾಂಕ್ಷಿ­ಗಳಿಗೆ ಮಣೆ ಹಾಕುತ್ತಿವೆ ಎಂದು ದೂರಿದರು.



ಅಸ್ಪೃಶ್ಯತೆಯನ್ನು ಸರ್ಕಾರ ನಿಷೇಧಿ­ಸಿದ್ದರೂ, ಈ ರಾಜಕೀಯ ಪಕ್ಷಗಳು ಹೊಲೆಯರನ್ನು ಇನ್ನೂ ಅಸ್ಪೃಶ್ಯರ­ನ್ನಾಗಿಯೇ ಪರಿಗಣಿಸಿವೆ. ಸಮು­ದಾಯಕ್ಕೆ ರಾಜಕೀಯ ಮಹತ್ವಾ­ಕಾಂಕ್ಷೆ ಇರಬಾರದು ಎಂದು ಟಿಕೆಟ್‌ ಆಕಾಂಕ್ಷಿ­ಗಳನ್ನು ಕಡೆಗಣಿಸ­ಲಾಗುತ್ತಿದೆ ಎಂದರು.



ಹೊಲೆಯ ಸಮುದಾಯದ ಮತ­ದಾರರು ಮತ ಹಾಕದೇ ಇದ್ದರೆ ಬಿಜೆಪಿ ಮತ್ತು ಜೆಡಿಎಸ್‌ ಪಕ್ಷಗಳು ಗೆಲ್ಲಲು ಸಾಧ್ಯವೇ ಇಲ್ಲ. ಇಂಥ ವಾಸ್ತ­ವಿಕ­ವಾದ ಮಹತ್ವದ ಅಂಶವನ್ನು ಕೂಡ ಪಕ್ಷಗಳು ಕಡೆಗಣಿಸಿವೆ. ಹೀಗಾಗಿ ಎರಡೂ ಪಕ್ಷಗಳ ಅಭ್ಯರ್ಥಿಗಳು ಸೋಲುತ್ತಾರೆ ಎಂದು ಭವಿಷ್ಯ ನುಡಿದರು.



ಕೆಜಿಎಫ್‌ನ ಪ್ರಭಾವತಿ ಮಾತನಾಡಿ, ತಮ್ಮನ್ನು ಹೊಲೆಯರೆಂದು ಇತರರು ಕರೆದರೆ ಬೇಸರವಾಗುತ್ತದೆ. ಆದರೆ ಇಂದು ಹೊಲೆಯರು ತಮ್ಮ ನಿಕೃಷ್ಟ ಸ್ಥಿತಿಯನ್ನು ತಾವೇ ಮುಂದೊಡ್ಡಿ ರಾಜ­ಕೀಯ ಅವಕಾಶಕ್ಕಾಗಿ ಗೋಗರೆ­ಯುವ ಸನ್ನಿವೇಶ ನಿರ್ಮಾಣವಾಗಿದೆ. ಮೂಲ­ಸೌಕರ್ಯಗಳೂ ಇಲ್ಲದೆ, ಸಮಾ­ಜ­­ದಲ್ಲಿ ಅವಕಾಶಗಳೂ ಇಲ್ಲದೆ ಹೊಲೆಯ ಸಮುದಾಯ ಅನ್ಯಾಯಕ್ಕೆ ಈಡಾಗಿದೆ. ಚುನಾವಣೆ­ಯಲ್ಲಿ ಪ್ರಮುಖ ರಾಜಕೀಯ ಪಕ್ಷ­ಗಳೂ ಅನ್ಯಾಯ ಮಾಡಿವೆ ಎಂದು ಆರೋಪಿಸಿದರು.



ಗೊಂದಲ: ಸಂಕಿರಣದಲ್ಲಿ, ರಾಜ­ಕೀಯ ವಿಷಯಗಳ ಕುರಿತು ಯಾರೂ ಮಾತನಾಡಬಾರದು ಎಂದು ಬೆಳಗಾನ­ಹಳ್ಳಿ ಮುನಿ­ವೆಂಕಟಪ್ಪ ಹೇಳಿಕೆ ನೀಡಿದ್ದು ಕೆಲ ಕಾಲ ಗೊಂದಲದ ಸನ್ನಿವೇಶ ನಿರ್ಮಾಣ­ವಾಗಿತ್ತು. ‘ಮುಂದಿನ ರಾಜಕೀಯ ನಿಲುವು’ ಎಂಬ ಶೀರ್ಷಿಕೆ ಅಡಿ ನಡೆಸು­ತ್ತಿರುವ ಕಾರ್ಯಕ್ರಮದಲ್ಲಿ ರಾಜಕೀಯ ವಿಷಯಗಳ ಪ್ರಸ್ತಾಪ ಮಾಡಬಾರದು ಎಂದು ಹೇಳುವುದು ಸರಿಯೇ ಎಂದು ಸಭಿಕರೊಬ್ಬರು ಪ್ರಶ್ನಿಸಿದರು. ನಂತರ ಸನ್ನಿವೇಶ ತಿಳಿಯಾಯಿತು.



ಕುರುಗಲ್ ಕೃಷ್ಣಪ್ಪ, ಹೂವಳ್ಳಿ ನಾಗರಾಜ್, ರಾಜಣ್ಣ ಇತರರಿದ್ದರು.