‘ಆಲಿಕಲ್ಲಿನ ಹೊಡೆತಕ್ಕೆ ಅಮ್ಮ ನ ಉಸಿರೇ ನಿಂತಿತು’

ಬಳ್ಳಾರಿ: ‘ಕೇವಲ 10ರಿಂದ 15 ನಿಮಿಷಗಳಲ್ಲೇ ಎಲ್ಲ ಮುಗಿದು ಹೋಯಿತು. ಆಲಿಕಲ್ಲುಗಳ ಹೊಡೆತ ತಾಳಲಾರದೆ ಬಳಲಿದ ಅಮ್ಮನನ್ನು ರಕ್ಷಿಸ­ಬೇಕೆಂದರೂ ಸಾಧ್ಯವಾಗಲಿಲ್ಲ. ಕಣ್ಣೆದುರೇ ಆಕೆಯ ಉಸಿರು ನಿಂತು ಹೋಯಿತು. ನನಗೂ ತೀವ್ರ ಪೆಟ್ಟಾಗಿದೆ. ಜತೆಯಲ್ಲಿದ್ದ ಹೆಂಡತಿ ಮತ್ತು ನಾನು ಉಳಿದಿದ್ದು ನಿಜಕ್ಕೂ ಪವಾಡ...’



ತಾಲ್ಲೂಕಿನ ಕಮ್ಮರಚೇಡು ಗ್ರಾಮದಲ್ಲಿ ಶುಕ್ರವಾರ ಸಂಜೆ ಸುರಿದ ಆಲಿಕಲ್ಲುಗಳ ಪೆಟ್ಟು ತಾಳ­ಲಾರದೆ ಸಾವಿಗೀಡಾದ ಲಕ್ಷ್ಮಮ್ಮ (55) ಅವರ ಪುತ್ರ ನಾಗರಾಜ,   ಅಮ್ಮನನ್ನು ಉಳಿಸಿ­ಕೊಳ್ಳ­ಲಾಗದ ಅಸಹಾಯಕತೆಯನ್ನು ಹೀಗೆ ವ್ಯಕ್ತ­­ಪಡಿ­­ಸು­ತ್ತಿದ್ದರೆ, ಆತನ ಕಣ್ಣಂಚಿನಿಂದ ನೀರು  ಇಳಿಯುತ್ತಿತ್ತು.



ಕೃಷಿ ಕೆಲಸ ಮುಗಿಸಿ ಮನೆಯತ್ತ ಬರುತ್ತಿ­ದ್ದ­ವರಿಗೆ ಮಾರ್ಗ ಮಧ್ಯ­ದಲ್ಲಿ ಎದುರಾದ ಭೀಕರ ಆಲಿ­ಕಲ್ಲು ಮಳೆ ದಿಕ್ಕು ತೋಚದಂತೆ ಮಾಡಿತು. ಕೃಷಿಯಲ್ಲಿ ತೊಡಗಿಕೊಂಡು ಕುಟುಂಬಕ್ಕೆ ಆಸರೆ­­ಯಾ­ಗಿದ್ದ ಅಮ್ಮನನ್ನು ಕಳೆದುಕೊಂಡ ಯುವಕ, ಜೆಸಿಬಿ ಒಂದ­ರಲ್ಲಿ ಹೆತ್ತ ತಾಯಿಯ ಶವವನ್ನು ಮನೆಗೆ ಸಾಗಿಸಿದ್ದು, ತನ್ನ ಜೀವನದಲ್ಲೇ ಇಂತಹ ಮಳೆ­ಯನ್ನು ಕಂಡಿಲ್ಲ ಎಂದು ಉಸಿರು ಬಿಡದೆ ಹೇಳಿದ. ಅದು ಗಂಭೀರ ಸ್ವರೂಪದ ಮಳೆ. ಅಂದಾಜು 45 ನಿಮಿಷ­ಗಳ ಕಾಲ ಧೋ ಎಂದು ಸುರಿದ ಮಳೆ­ಯೊಂದಿಗೆ ಆಕಾಶದಿಂದ ಬಿದ್ದ ಆಲಿ­ಕಲ್ಲುಗಳ ರಾಶಿ ಜನ­ರನ್ನು ಬೆಚ್ಚಿ­ಬೀಳಿಸಿದೆ.



ಪಕ್ಕದ ಎತ್ತಿನಬೂದಿಹಾಳ ಗ್ರಾಮದ ದಮ್ಮೂರು ಗಂಗಮ್ಮ ಆಲಿಕಲ್ಲುಗಳ ಹೊಡೆತ ತಾಳದೆ ಹೆದರಿ ಜೀವ ರಕ್ಷಣೆಗೆಂದು

ಓಡಿ ಹೋಗುವಾಗ ಬಿದ್ದು ಕೈ ಮುರಿದು­ಕೊಂಡಿ­ದ್ದರೆ, ಅದೇ ಊರಿನ ಗೋವಿಂದಪ್ಪ ಮತ್ತು ನಿಂಗಪ್ಪ ಎಂಬವರ ತಲೆಗೆ ತೀವ್ರ ಪೆಟ್ಟಾಗಿದೆ.



‘ನಾವೆಲ್ಲ ಉಳಿದದ್ದೇ ವಿಸ್ಮಯ. ಒಂದು ಕಡೆ ಸಿಡಿಲು, ಗುಡುಗು ಇದ್ದುದರಿಂದ ಮರದ ಕೆಳಗೂ ಕುಳಿತಕೊಳ್ಳುವಂತಿಲ್ಲ. ಆಲಿಕಲ್ಲು ಸುರಿಯುತ್ತಿ­ದ್ದು­ದ­ರಿಂದ ಓಡಿ ಹೋಗಲೂ ಆಗದ ಸ್ಥಿತಿ ತಲು­ಪಿ­ದ್ದೆವು. ಮೇಲಿನಿಂದ ಯಾರೋ ಕಲ್ಲು­ಗಳನ್ನು ಎತ್ತಿ ತಲೆ ಮೇಲೆ ಎಸೆಯುತ್ತಿ­ದ್ದಾ­ರೇನೋ ಎಂಬಂತೆ ಭಾಸ­ವಾಗುತ್ತಿತ್ತು. ಹೇಗೋ ನಮ್ಮ ಜೀವ ಉಳಿ­ಯಿತು’ ಎಂದು ಗ್ರಾಮದ ವುಂತಕಲ್‌ ರಾಮಯ್ಯ, ಕೆಂಚಪ್ಪ ‘ಪ್ರಜಾವಾಣಿ’ ಎದುರು ತಮ್ಮ ಅನುಭವ ಹಂಚಿಕೊಂಡರು.



ಕಮರಿದ ಕನಸು: ‘ಐದಾರು ತಿಂಗಳಿಂದ ಬೆಳೆಸಿದ ಜೋಳ, ಹತ್ತಿ ಕಣ್ಣೆದುರೇ ನೆಲಕಚ್ಚಿತು. ಕೀಟ, ರೋಗ ಬಾಧೆಗೊಳಗಾದರೆ ಔಷಧಿ ಸಿಂಪಡಿಸಿ ರಕ್ಷಿಸಿ­ಕೊಳ್ಳಬಹುದು. ಆದರೆ, ಪ್ರಕೃತಿಯೇ ಮುನಿಸಿ­ಕೊಂಡು ಬೆಳೆಯನ್ನು ನಾಶ ಮಾಡಿದರೆ ಉಳಿಸಿ­ಕೊಳ್ಳುವುದು ಅಸಾಧ್ಯ. ಹತ್ತಾರು ಸಾವಿರ ಖರ್ಚು ಮಾಡಿ ಬೆಳೆಸಿ, ಉಳಿಸಿದ ಹತ್ತಿ, ಮೆಣಸಿನ­ಕಾಯಿ, ಜೋಳ ಅರ್ಧ ಗಂಟೆಯಲ್ಲೇ ನೆಲದ ಪಾಲಾ­ಯಿತು. ಮಗುವಿನ ಕೈಯಲ್ಲಿರುವ ತುತ್ತನ್ನು ಎಲ್ಲಿಂದಲೋ ಹಾರಿಬಂದ ಕಾಗೆ   ಕಿತ್ತು­ಕೊಂಡು ಹೋದಂತಾಯಿತು’ ಎಂದು ವಿಘ್ನೇಶ್ವರ ಕ್ಯಾಂಪ್‌ನ ರೈತರಾದ ಕೆ. ಸಂಜೀವಪ್ಪ, ರಾಜ­ಕುಮಾರ ಅವರು ತಿಳಿಸಿದರು.



ಇದೇ ಊರಿನ ಪಕ್ಕದಲ್ಲಿರುವ ಮಾರೆಮ್ಮ ಕ್ಯಾಂಪ್‌ನ ಈಶ್ವರರಾವ್‌ ಅವರ ತೋಟದಲ್ಲಿನ ಪಪ್ಪಾಯ ಗಿಡಗಳು ನೆಲಕಚ್ಚಿದ್ದು,  ಹಣ್ಣು­­ಗಳು ಅಪ್ರಯೋ­ಜಕವಾಗಿವೆ. ತಾಲ್ಲೂಕಿ­ನಲ್ಲಿ ಕಳೆದ ಐದು ದಿನಗಳಿಂದ ಸುರಿದ ಅಕಾಲಿಕ ಮಳೆ, ಬಿರುಗಾಳಿ ಆಲಿಕಲ್ಲು ಹಾವಳಿಯಿಂದ 10 ಸಾವಿ­ರಕ್ಕೂ ಅಧಿಕ ಎಕರೆ ಭೂಮಿ­ಯಲ್ಲಿ ಬೆಳೆದು ನಿಂತಿದ್ದ ಕೃಷಿ ಮತ್ತು ತೋಟಗಾರಿಕೆ ಫಸಲು ಮಣ್ಣು­­ಪಾಲಾ­ಗಿದ್ದು, ಬೇಸಿಗೆಯನ್ನು  ಮರೆ ಮಾಚಿ, ಮಳೆ­ಗಾಲದ ಅನುಭವ ನೀಡುತ್ತಿದೆ. ಶನಿ­ವಾರವೂ ಮಳೆ ಲಕ್ಷಣ­ಗಳು ಕಾಣಿಸಿ­ಕೊಂಡಿ­ದ್ದರಿಂದ ಜನರಲ್ಲಿ  ಭಯ ಮುಂದುವರೆದಿದೆ.