‘ಮಾನವೀಯ ಮೌಲ್ಯ ಅಳವಡಿಸಿಕೊಳ್ಳಿ’

ಗದಗ:  ಪುಣ್ಯ ಎಂದರೆ ಮಾನವೀಯ ಮೌಲ್ಯಗಳನ್ನು ಅಳವಡಿಸಿಕೊಂಡು ಅನುಷ್ಠಾನ­ಗೊಳಿಸುವುದು ಎಂದರ್ಥ ಎಂದು ಕೋಡಿಮಠದ ಶಿವಾನಂದ ಶಿವಯೋಗಿ ರಾಜೇಂದ್ರ ಸ್ವಾಮೀಜಿ ನುಡಿದರು.



ನಗರದ ವಿದ್ಯಾಶ್ರಮದಲ್ಲಿ ಶುಕ್ರವಾರ ನಡೆದ ಸತ್ಸಂಗ ಸಮ್ಮೇಳನ, ಆದಿಶಕ್ತಿ ರಥೋತ್ಸವ, ಸದಾಶಿವಾನಂದ ಗುರು­ಗಳ 117 ನೇ ಜಯಂತ್ಯುತ್ಸವ­ದಲ್ಲಿ ಮಾತನಾಡಿದ ಅವರು, ಪರೋಪಕಾರ, ಸಂಕಷ್ಟದಲ್ಲಿ ಇರುವವರಿಗೆ ಸಹಾಯ  ಹಾಗೂ ಸಕಲ ಜೀವಿಗಳನ್ನು ಪ್ರೀತಿ­ಯಿಂದ ನೋಡಿಕೊಳ್ಳಬೇಕು. ಮಾನ­ವೀಯತೆ ಇಲ್ಲದ ವ್ಯಕ್ತಿ ಮನುಷ್ಯ ಎನಿಸಿಕೊಳ್ಳುವುದಿಲ್ಲ.



ಮಾನವೀಯ­ತೆಯ ಮೂಲಕ ಮನುಷ್ಯತ್ವದ ಗುಣ­ಗಳು ಅನಾವರಣಗೊಳ್ಳಬೇಕು. ಮನ­ಸ್ಸಿನ ಕೊಳೆ ತೊಳೆದುಕೊಳ್ಳಲು ಸತ್ಸಂಗ ಅವಶ್ಯ.  ಸಮಾಜದಲ್ಲಿ ಇಂದು ಧರ್ಮ ಜಾಗೃತಗೊಳ್ಳುವ ಮೂಲಕ ಜನರು ಜಾಗೃತರಾಗಬೇಕು. ಧಾರ್ಮಿಕ ಮತ್ತು ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿ­ಕೊಂಡು ಜೀವನ ಶೈಲಿಯನ್ನು ಉತ್ತಮಪಡಿಸಿಕೊಳ್ಳಬೇಕು ಎಂದು ತಿಳಿಸಿದರು.



ಶಿವಾನಂದ ಮಠದ ಅಭಿನವ ಶಿವಾನಂದ ಸ್ವಾಮಿ ಸಾನಿಧ್ಯ  ವಹಿಸಿದ್ದರು. ಸುಣಧೋಳಿಯ ಜಡಿ­ಸಿದ್ಧೇಶ್ವ­ರ­ಮಠದ ಅಭಿನವ ಶಿವಾನಂದ ಸ್ವಾಮಿ, ತುಪ್ಪದಕುರಹಟ್ಟಿಯ ವಾಗೀಶ ಪಂಡಿತರಾಧ್ಯ ದೇವರು ಭೂಸನೂ­ರಮಠ ಹಾಜರಿದ್ದರು.  ಅಧ್ಯಕ್ಷತೆಯನ್ನು ಇಮ್ರಾಹಿಂಪೂರದ ಶಿವಾನಂದಮಠದ ಸಂಪೂರ್ಣಾನಂದ ಸ್ವಾಮಿ ವಹಿಸಿದ್ದರು.



ಶಿವಾನಂದ ಮಠದ ದಯಾನಂದ ಮಹಾಸ್ವಾಮಿ, ಕೆ.ಐ.ಗುದಗಿ, ನಗರ­ಸಭಾ ಸದಸ್ಯ ಅನೀಲ ಗರಗ ಭಾಗವ­ಹಿಸಿದ್ದರು  ಸಮಾರಂಭದಲ್ಲಿ ಎ.ಎಸ್.­ಬ್ಯಾಳಿ ಹಾಗೂ ಬಸವರಾಜ ಶಾಬಾದಿಮಠ ಅವರನ್ನು ಸನ್ಮಾನಿಸಲಾಯಿತು.



ಮಹಾಲಕ್ಷ್ಮೀ ಮಹಿಳಾ ಭಜನಾ ಮಂಡಳಿಯಿಂದ ಪ್ರಾರ್ಥನೆ ನಡೆಯಿತು. ಮಾಜಿ ಶಾಸಕ ಡಿ.ಆರ್.ಪಾಟೀಲ ಸ್ವಾಗತಿಸಿದರು, ಆಧ್ಯಾತ್ಮ ವಿದ್ಯಾಶ್ರಮದ   ನೀಲಮ್ಮತಾಯಿ ಅವರು ಶರಣು ಸರ್ಮ­­ಪಿ­ಸಿದರು, ಎಸ್.ಬಿ.­ದೊಡ್ಡ­ಣ್ಣವರ ನಿರೂಪಿಸಿದರು,  ಎಸ್.ಬಿ.­ಹೂಗಾರ ವಂದಿಸಿದರು.



ಸಂಜೆ ಶ್ರೀದೇವಿ ರಥೋತ್ಸವ ಮತ್ತು ಮುತ್ತೈದೆಯರಿಂದ ತನಾರತಿ ಸೇವೆ ಭಕ್ತಿ ಭಾವದೊಂದಿಗೆ ಜರುಗಿತು.

ನಂತರ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಯೋಗದಲ್ಲಿ ಜಾನಪದ ಹಾಗೂ ಅನುಭಾವ ಚಿಂತನಗೋಷ್ಠಿ ನಡೆಯಿತು.