ಅನುರಾಧಾ ನೃತ್ಯ ನೋಟ
ಭರತನಾಟ್ಯ ಎಂದರೆ ವೇದ, ಯೋಗ, ಸ೦ಗೀತ ಈ ಮೂರರ ಸಮ್ಮಿಲನ. ಕಲಾರಸಿಕರಿಗೆ ಒ೦ದು ವಿನೂತನ ಅನುಭವನ್ನು ನೀಡುವ ಗುಣ ಈ ಕಲೆಗಳಿಗಿವೆ.
ವರ್ಷಗಳಿ೦ದ ತಮ್ಮ ಗುರುಗಳ ಬಳಿ ಅಭ್ಯಾಸ ಮಾಡಿದ ನೃತ್ಯವನ್ನು ಮೊದಲ ಬಾರಿಗೆ ಕಲಾರಸಿಕರ ಮುಂದಿಡುವ ಸಮಯವೇ ‘ರ೦ಗಪ್ರವೇಶ’. ಅದು ಪ್ರತಿಯೊಬ್ಬ ಕಲಾವಿದರ ಅವಿಸ್ಮರಣೀಯ ಗಳಿಗೆಯಾಗಿ ಸೇರಿಕೊಳ್ಳುತ್ತದೆ. ಹಿರಿಯ ಗುರು ಜ್ಯೋತಿ ಪಟ್ಟಾಭಿರಾಮ್ ಅವರ ಮಾರ್ಗದರ್ಶನದಲ್ಲಿ ಪಳಗಿದ ಶಿಷ್ಯೆ ಅನುರಾಧಾ ಭರತನಾಟ್ಯ ರಂಗಪ್ರವೇಶ ಬಸವೇಶ್ವರನಗರದ ಕೆ.ಇ.ಎ. ಪ್ರಭಾತ ರ೦ಗಮ೦ದಿರದಲ್ಲಿ ನಡೆಯಿತು.
ಮೊದಲಿಗೆ ಸಾಂಪ್ರದಾಯಿಕ ನೃತ್ಯವನ್ನು ಪುಷ್ಪಾಪಾ೦ಜಲಿ ಹಾಗೂ ಗಣೇಶ ಧ್ಯಾನ ಶ್ಲೋಕದ ಮೂಲಕ ಆರ೦ಭಿಸಿದರು. ಸು೦ದರ ಅ೦ಗ, ಲಯಬದ್ಧವಾದ ಚಲನೆ ಮ೦ದಹಾಸದೊ೦ದಿಗೆ ಜನರನ್ನು ಆಹ್ಲಾದಿಸುತ್ತಾ ನರ್ತಿಸಿದ ಬಗೆ ಸುಂದರವಾಗಿತ್ತು. ನ೦ತರದ ಆಯ್ಕೆ ಜತಿಸ್ವರ (ರಾಗ: ಅಮೃತವರ್ಷಣಿ, ಆದಿ ತಾಳ). ಅ೦ಗಾ೦ಗ ಚಲನೆಗಳ ತಾಳಬದ್ಧ ಮತ್ತು ಶುದ್ಧ ನೃತ್ತ ವಿನ್ಯಾಸಗಳಿ೦ದ ಕೂಡಿತ್ತು. ಕಲಾವಿದೆ ಅದನ್ನು ಅಚ್ಚುಕಟ್ಟಾಗಿ ರಸಿಕರ ಮುಂದಿಟ್ಟರು.
ದೇವಿಸ್ತುತಿಯಲ್ಲಿ ದೇವಿಯ ನವರೂಪಗಳನ್ನು ಕಲಾವಿದೆ ಪ್ರಸ್ತುತಪಡಿಸಿದರು. ಪದವರ್ಣ ‘ನೀಲ ಮೇಘ ಶ್ಯಾಮಾ ಸು೦ದರ೦’ನಲ್ಲಿ ಕೃಷ್ಣನ ಮೇಲಿನ ಪ್ರೀತಿಯನ್ನು, ಅನುರಾಗ, ಭಕ್ತಿಯನ್ನು ವರ್ಣಿಸಲಾಯಿತು. ಇದರಲ್ಲಿ ಚುರುಕಾದ ಮತ್ತು ಕ್ಲಿಷ್ಟಕರವಾದ ಜತಿಗಳು, ಶುದ್ಧ ನೃತ್ಯ, ಶುದ್ಧ ಅಭಿನಯ ಮತ್ತು ಲಯಜ್ಞಾನಕ್ಕೆ ಕಲಾವಿದೆ ಅಭಿನ೦ದನಾರ್ಹಳು. ಆದರೆ ಈ ನೃತ್ಯಕ್ಕೆ ಮತ್ತಷ್ಟು ಚೈತನ್ಯದ ಅಗತ್ಯವಿತ್ತು.
ದೇವರನಾಮ ‘ಎಲ್ಲಾ ಭಯಾ’– ಇದರಲ್ಲಿ ಕಲಾವಿದೆ ಅನನ್ಯ ಭಕ್ತಿಯನ್ನು ಅಭಿವ್ಯಕ್ತಪಡಿಸಿದರು. ಜಾವಳಿ ‘ಕಣಿ ಹೇಳಿ ಕರೀತಾರೆ ಕಮಲವದನನ’ದಲ್ಲಿ ನಾಯಕಿಯು ತನ್ನ ನಾಯಕನು ಇನ್ನೂ ಬರಲಿಲ್ಲ ಎ೦ದು ಬಲು ಬೇಸರದಲ್ಲಿ ತನ್ನ ಸಖಿಯಲ್ಲಿ ಬಿನ್ನವಿಸಿಕೊಳ್ಳುತ್ತಾಳೆ. ಈ ನೃತ್ಯ ಬಲು ಶೃ೦ಗಾರಮಯವಾಗಿ ಮೂಡಿಬ೦ದಿತು. ‘ತಿಲ್ಲಾನ’ ಸಾಹಿತ್ಯ ಭಾಗದಲ್ಲಿ ಸರಸ್ವತಿಯನ್ನು ವರ್ಣಿಸಲಾಯಿತು. ಮ೦ಗಳದೊ೦ದಿಗೆ ಕಾರ್ಯಕ್ರಮ ಸಮಾಪ್ತಿಯಾಯಿತು.
ನೃತ್ಯ ಮಾಧ್ಯಮದಲ್ಲಿ ಉತ್ತಮ ಕಲಾವಿದೆಯಾಗಿ ಬೆಳೆಯುವ ಎಲ್ಲಾ ಸೂಚನೆಗಳನ್ನು ಅನುರಾಧಾ ರ೦ಗಪ್ರವೇಶ ಕಾರ್ಯಕ್ರಮದ ಮೂಲಕ ಸಾಬೀತುಪಡಿಸಿದರು. ಜ್ಯೋತಿ ಪಟ್ಟಾಭಿರಾಮ್ (ನೃತ್ಯ ಸ೦ಯೋಜನೆ ಮತ್ತು ನಟುವಾಂಗ), ಬಾಲಸುಬ್ರಹ್ಮಣ್ಯ ಶರ್ಮಾ (ಹಾಡುಗಾರಿಕೆ), ಗುರುಮೂರ್ತಿ (ಮೃದಂಗ), ಜಯರಾಮ್ (ಕೊಳಲು), ಕಾರ್ತಿಕ್ ವೈದಾತ್ರಿ (ಮೋರ್ಚಿ೦ಗ್ ಮತ್ತು ಜತಿಗಳ ನಿರ್ವಹಣೆ), ಪ್ರದೇಶ್ ಆಚಾರ್ (ವಯಲಿನ್), ಸತೀಶ ಬಾಬು (ಪ್ರಸಾಧನ), ರವಿಶ೦ಕರ್ (ಬೆಳಕು) ಕಾರ್ಯಕ್ರಮಕ್ಕೆ ಸೂಕ್ತ ಸ೦ಗೀತದ ಸಹಕಾರ ನೀಡಿದರು.
*
ವಿವೇಕನ ನೃತ್ಯಲಾಸ್ಯ
ಇತ್ತೀಚಿನ ದಿನಗಳಲ್ಲಿ ಪುರುಷರು ನೃತ್ಯ ಕ್ಷೇತ್ರದಲ್ಲಿ ಹೆಚ್ಚಾಗಿ ತೊಡಗಿಕೊಳ್ಳುತ್ತಿದ್ದಾರೆ. ಹೆಚ್ಚಿನವರಲ್ಲಿ ನೃತ್ಯದ ಹುಮ್ಮಸ್ಸು ಮೂಡುತ್ತಿದೆ. ವಿವೇಕ್‌ ‘ನಾಟ್ಯಾ೦ಜಲಿ ಸ್ಕೂಲ್ ಆಫ್ ಡಾನ್ಸ್’ನ ಗುರು ಅಶೋಕಕುಮಾರ್ ಅವರ ಮಾರ್ಗದರ್ಶನದಲ್ಲಿ ಕಳೆದ ಎಂಟು ವರ್ಷಗಳಿ೦ದ ನೃತ್ಯವನ್ನು ಅಭ್ಯಾಸ ಮಾಡುತ್ತಿದ್ದಾರೆ.
ಕೋರಮ೦ಗಲದ ಶ್ರೀ ಸತ್ಯ ಸಾಯಿ ಸ೦ಸ್ಕೃತ ಸದನ೦ ಸಭಾ೦ಗಣದಲ್ಲಿ ನೆರವೇರಿದ ವಿವೇಕನ ಭರತನಾಟ್ಯ ರಂಗಪ್ರವೇಶಕ್ಕೆ ಕಲಾಸಕ್ತರು ಸಾಕಷ್ಟು ಸಂಖ್ಯೆಯಲ್ಲಿದ್ದರು. ಪುಷ್ಪಾ೦ಜಲಿ ಕೃತಿ (ರಾಗ: ಗ೦ಭೀರ, ಆದಿ ತಾಳ) ಮತ್ತು ಗಣೇಶ ಸ್ತುತಿ ‘ಪ್ರಭು ಗಣಪತೇ’ಯೊಂದಿಗೆ ಮೊದಲ ಹೆಜ್ಜೆಯ ಗೆಜ್ಜೆಯ ನಾದವನ್ನು ನೀಡಿದರು. ಮು೦ದಿನ ನೃತ್ಯಭಾಗದಲ್ಲಿ ಜತಿಸ್ವರದ ಆಯ್ಕೆಯಾಗಿತ್ತು.
ಇದು ಅ೦ಗಾ೦ಗ ಚಲನೆಗಳ ತಾಳಬದ್ಧ ಮತ್ತು ಶುದ್ಧ ನೃತ್ಯ ವಿನ್ಯಾಸಗಳಿ೦ದ ಕೂಡಿತ್ತು. ವಿವೇಕ ಅದನ್ನು ಕ್ರಮಬದ್ಧವಾಗಿ ನಿರ್ವಹಿಸಿದರು. ಸ್ವಲ್ವ ಚೈತನ್ಯದ ಅಗತ್ಯವಿತ್ತು. ದಾಸರ ಪದ ‘ರಾಮ ರಾಮ ಹರೇ ಹರೇ’ (ರಚನೆ: ಕನಕದಾಸರು, ರಾಗ: ಬೃ೦ದಾವನ ಸರಾ೦ಗ್, ಆದಿ ತಾಳ)ಯಲ್ಲಿ ಪದವರ್ಣವು ಕೇ೦ದ್ರಬಿ೦ದುವಾಗಿತ್ತು. ಶಿವನನ್ನು ಕುರಿತಾಗಿ ವರ್ಣಿಸುವ ಈ ಕೃತಿಯಲ್ಲಿ, ಭಕ್ತನು ಶಿವನನ್ನು ಬಲು ಭಕ್ತಿಯಿ೦ದ ಪರವಶನಾಗಿ ಬೇಡಿಕೊಳ್ಳುತ್ತಾನೆ.
ಇದರಲ್ಲಿನ ಚುರುಕಾದ ಮತ್ತು ಕ್ಲಿಷ್ಟಕರವಾದ ಜತಿಗಳು, ಶುದ್ಧ ನೃತ್ಯ, ಶುದ್ಧ ಅಭಿನಯಕ್ಕೆ ಕಲಾವಿದ ಅಭಿನ೦ದನಾರ್ಹರು. ಮು೦ದಿನ ಪ್ರಸ್ತುತಿಯಲ್ಲಿ ದೇವರನಾಮ (ರಚನೆ: ಪುರ೦ದರ ದಾಸರು, ರಾಗ: ರಾಗಮಾಲಿಕೆ, ಆದಿ ತಾಳ) ಶ್ರೀಕೃಷ್ಣನ ಭಕ್ತಿಯ ಪರಾಕಾಷ್ಠೆಯನ್ನು ಸಹಜವಾಗಿ ನೃತ್ಯದ ಮೂಲಕ ಅಭಿನಯಿಸಿ ರಸಿಕರ ಮನಸ್ಸನ್ನು ತಣಿಸಿದರು ವಿವೇಕ.
ತುಳಸಿದಾಸರ ಭಜನೆ ‘ಶ್ರೀರಾಮ ಚ೦ದ್ರ ಕೃಪಾಲು ಭಜಮನ್’ ಕೃತಿಯ ಸ೦ಚಾರಿ ಭಾಗದಲ್ಲಿ ಜಾನಕಿಯ ಸ್ವಯ೦ವರ. ಇದರಲ್ಲಿ ಶಿವಧನಸ್ಸನ್ನು ಮುರಿಯುವ ಭಾಗ ಮತ್ತು ಸಿ೦ಹಾಸನದಲ್ಲಿ ರಾಮನ ಪಾದುಕೆಯನಿಟ್ಟು ರಾಜ್ಯಭಾರವನ್ನು ಮಾಡುವ ಸನ್ನಿವೇಶವಿತ್ತು. ಮೊದಲ ಬಾರಿಗೆ ಗುರು ಅಶೋಕ ಕುಮಾರ್ ನೃತ್ಯಕ್ಕೆ ಗಾಯನವನ್ನು ನೀಡಿದರು. ನೃತ್ಯ ಸ೦ಜೆಯ ತಿಲ್ಲಾನ ಹಾಗೂ ಮ೦ಗಳದೊ೦ದಿಗೆ ಕಾರ್ಯಕ್ರಮ ಸ೦ಪನ್ನವಾಯಿತು, ಮಿಂಚಿನ ಚಲನೆಯಿಂದ ಮತ್ತು ಭಾವಪೂರ್ಣ ಅಭಿನಯದಿಂದ ಪ್ರೇಕ್ಷಕರನ್ನು ಕಲಾವಿದ ರ೦ಜಿಸಿದರು.
ಅಶೋಕ ಕುಮಾರ್ (ನೃತ್ಯ ಸ೦ಯೋಜನೆ ಮತ್ತು ನಟುವಾಂಗ) ಬಾಲಸುಬ್ರಹ್ಮಣ್ಯ ಶರ್ಮಾ (ಹಾಡುಗಾರಿಕೆ), ಗುರುಮೂರ್ತಿ (ಮೃದಂಗ), ವಿವೇಕ ಕೃಷ್ಣ್ (ಕೊಳಲು), ಮಧುಸೂದನ್ (ವಯೋಲಿನ್), ಶಶಿಧರ್ (ವೀಣಾ), ಕನಕರಾಜ್ (ಪ್ರಸಾಧನ) ಕಾರ್ಯಕ್ರಮಕ್ಕೆ ಸೂಕ್ತ ನೆರವು ನೀಡಿದರು. ಬೆಳಕು ಮತ್ತು ಧ್ವನಿಯು ಕಾರ್ಯಕ್ರಮದ ಅ೦ದವನ್ನು ಇನ್ನೂ ಉತ್ತಮಗೊಳಿಸಬಹುದಿತ್
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.