ಇಲ್ಲಿ ಗುಡಿಸಲೇ ಅಂಗನವಾಡಿ!

ಯಳಂದೂರು: ತೆಂಗಿನ ಗರಿಗಳ ಹೊದಿಕೆಯೇ ಚಪ್ಪರ. ಮಣ್ಣಿನ ನೆಲವೇ ಹಾಸಿಗೆ. ಮಳೆಗೆ ಸೋರುವ ಮಾಳಿಗೆ. ಬಿಸಿಲಿನಲ್ಲೇ ಕಲಿಯಬೇಕಾದ ಅನಿವಾರ್ಯತೆ.

-ಇದು ತಾಲ್ಲೂಕಿನ ದೊಡ್ಡ ಗ್ರಾಮಗಳಲ್ಲಿ ಒಂದಾಗಿರುವ ಕೆಸ್ತೂರು ಗ್ರಾಮದ ಹೊಸ ಉಪ್ಪಾರ ಬಡಾವಣೆಯ ಅಂಗವಾಡಿ ಕೇಂದ್ರದ ದುಃಸ್ಥಿತಿ.
ಇಲ್ಲಿನ 6 ಕೇಂದ್ರಗಳಿಗೆ ಸ್ವಂತ ಹಾಗೂ ಸುಸಜ್ಜಿತ ಕಟ್ಟಡಗಳಿವೆ. 2006ರಲ್ಲಿ ಆರಂಭವಾದ ಈ ಅಂಗನವಾಡಿಗೆ ಸ್ವಂತಕಟ್ಟಡದ ಭಾಗ್ಯ ಲಭಿಸಿಲ್ಲ. ಹಾಗಾಗಿ ತೆಂಗಿನಗರಿಯ ಜೋಪಡಿ ಚಿಣ್ಣರ ಕಲಿಕಾ ಕೇಂದ್ರವಾಗಿ ಮಾರ್ಪಟ್ಟಿದೆ. ಪ್ರಸ್ತುತ ಈ ಕೇಂದ್ರದಲ್ಲಿ 22 ಮಕ್ಕಳು ಕಲಿಯುತ್ತಿದ್ದಾರೆ.

ಹಿಂದುಳಿದ ವರ್ಗದ ಮಕ್ಕಳ ಸಂಖ್ಯೆಯೇ ಇಲ್ಲಿ ಹೆಚ್ಚಾಗಿದೆ. ಇವರೆಲ್ಲ ಸೌಲಭ್ಯ ವಂಚಿತರಾಗಿ ಕಲಿಯುವ ಅನಿವಾರ್ಯತೆ ಇಲ್ಲಿ ಸ್ಟಷ್ಟಿಯಾಗಿದೆ.
ಮಳೆ ಬಂದರೆ ಈ ಕೇಂದ್ರವು ಸೋರುತ್ತದೆ. ಅನಿವಾರ್ಯವಾಗಿ ಮಕ್ಕಳನ್ನು ಮಳೆಗಾಲದಲ್ಲಿ ಮನೆಗಳಿಗೆ ಕಳುಹಿಸುವ ಸ್ಥಿತಿ ನಿರ್ಮಾಣವಾಗುತ್ತದೆ.

ಈ ಕೇಂದ್ರಕ್ಕೆ ತಿಂಗಳಿಗೆ ರೂ 200 ಬಾಡಿಗೆ ನೀಡಲಾಗುತ್ತಿದೆ. ಕೇಂದ್ರದ ಮುಂದೆ ನಾಮಫಲಕ ಸಹ ಅಳವಡಿಸಿಲ್ಲ. ಜತೆಗೆ ಮಕ್ಕಳಿಗೆ ಕಲಿಕಾ ಸಾಮಗ್ರಿ ಹಾಗೂ ಆಹಾರ ಸಾಮಗ್ರಿಗಳ ಇಡಲು ಸ್ಥಳಾವಕಾಶವಿಲ್ಲ. ಮಕ್ಕಳನ್ನು ಇಂತಹ ಕೇಂದ್ರಕ್ಕೆ ಕಳುಹಿಸುವುದು ಅನಿವಾರ್ಯವಾಗಿದೆ ಎಂಬುದು ಪೋಷಕರ ಅಳಲು.