ನವದೆಹಲಿ(ಪಿಟಿಐ): ಕಾರ್ಪೊರೇಟ್‌ ಮತ್ತು ಸರ್ಕಾರಿ ಸ್ವಾಮ್ಯದ ಕಂಪೆನಿಗಳ ನಿರ್ದೇಶಕ ಮಂಡಳಿಯಲ್ಲಿ ಮಹಿಳೆಯರ ಸಂಖ್ಯೆ ಹೆಚ್ಚುತ್ತಿದೆ. ಕೇಂದ್ರ ಕಂಪೆನಿ ವ್ಯವಹಾರಗಳ ಸಚಿವ ಸಚಿನ್‌ ಪೈಲಟ್‌ ಸೋಮವಾರ ರಾಜ್ಯ ಸಭೆಗೆ ನೀಡಿರುವ ಮಾಹಿತಿ ಪ್ರಕಾರ, 2013ರ ನವೆಂಬರ್‌ವರೆಗೆ ದೇಶದ ವಿವಿಧ ಕಂಪೆನಿಗಳ ನಿರ್ದೇಶಕ ಮಂಡಳಿಯಲ್ಲಿ ಒಟ್ಟು 4.83 ಲಕ್ಷ ವನಿತೆಯರಿದ್ದಾರೆ.
ಕಂಪೆನಿ ವ್ಯವಹಾರಗಳ ಸಚಿವಾಲಯ ದಲ್ಲಿ 13.29 ಲಕ್ಷ ಕಂಪೆನಿಗಳು ನೋಂದಣಿಯಾಗಿವೆ. ಇದರಲ್ಲಿ 8.84 ಲಕ್ಷ ಕಂಪೆನಿಗಳು ಮಾತ್ರ ಈಗ ಕಾರ್ಯ ನಿರ್ವಹಿಸುತ್ತಿವೆ. 2013ರ ಕಂಪೆನಿ ಕಾಯ್ದೆ ಅನ್ವಯ ಪ್ರತಿ ಕಂಪೆನಿಯು ತನ್ನ ನಿರ್ದೇಶಕ ಮಂಡಳಿಯಲ್ಲಿ ಕನಿಷ್ಠ ಒಬ್ಬ ಮಹಿಳೆಯನ್ನಾದರೂ ಹೊಂದಿರಬೇಕು. ಪ್ರಸ್ತುತ ಹಲವು ಕಂಪೆನಿಗಳ ನಿರ್ದೇಶಕ ಮಂಡಳಿಯಲ್ಲಿ ಮಹಿಳೆಯರಿದ್ದಾರೆ ಎಂದು ಸಚಿನ್‌ ಮಾಹಿತಿ ನೀಡಿದ್ದಾರೆ.
