ಪಣಜಿ (ಐಎಎನ್ಎಸ್): ವಾಸ್ಕೊದಲ್ಲಿ ಬಾಲಕಿ ಮೇಲಿನ ಅತ್ಯಾಚಾರ ಪ್ರಕರಣವನ್ನು ಬಯಲಿಗೆ ಎಳೆಯದಿರುವುದು, ನಿರಂತರವಾಗಿ ನಡೆಯುತ್ತಿರುವ ಪೊಲೀಸ್ ಕಿರುಕುಳ ಪ್ರಕರಣಗಳು ಮತ್ತು ಹಣದುಬ್ಬರದಿಂದ ಬೇಸತ್ತು ಗೋವಾದಲ್ಲಿ ಅನಕ್ಷರಸ್ಥರೊಬ್ಬರು ಲೋಕಸಭೆ ಚುನಾವಣೆ ಅಖಾಡಕ್ಕೆ ಇಳಿದಿದ್ದಾರೆ.
ಗೋವಾದ ಎರಡು ಲೋಕಸಭೆ ಕ್ಷೇತ್ರಗಳಲ್ಲಿ ಒಟ್ಟು 19 ಅಭ್ಯರ್ಥಿಗಳು ಕಣದಲ್ಲಿದ್ದಾರೆ. ಈ ಪೈಕಿ 42 ವರ್ಷದ ಬಾಲಕೃಷ್ಣ ಸಲಗಾಂವಕರ್ ಒಬ್ಬರೇ ಅಕ್ಷರಾಭ್ಯಾಸ ಇಲ್ಲದವರು. ರಾಜ್ಯದಲ್ಲಿ ಸಾಕ್ಷರತೆ ಪ್ರಮಾಣ ಶೇ 87ರಷ್ಟಿದೆ. ‘ವಾಸ್ಕೊ ಅತ್ಯಾಚಾರ ಪ್ರಕರಣ ನನಗೆ ಭಾರಿ ಘಾಸಿ ಉಂಟು ಮಾಡಿತ್ತು. ನನ್ನ ಸಹೋದರನ ಮಗು ಕೂಡ ಅದೇ ಶಾಲೆಯಲ್ಲಿ ಓದುತ್ತಿದೆ. ಅದರಿಂದ ನಾವು ಭಯಭೀತರಾಗಿದ್ದೇವೆ. ಈ ಪ್ರಕರಣದ ಸೂಕ್ತ ತನಿಖೆಗೆ ಬಿಜೆಪಿ ಮತ್ತು ಕಾಂಗ್ರೆಸ್ ಎರಡೂ ನಮ್ಮ ಸಹಾಯಕ್ಕೆ ಬಂದಿಲ್ಲ’ ಎಂದು ಸಲಗಾಂವಕರ್ ಗೋಳು ತೋಡಿಕೊಂಡಿದ್ದಾರೆ.
‘ದೆಹಲಿಯಲ್ಲಿ ಯುವತಿ ಮೇಲೆ ಸಾಮೂಹಿಕ ಅತ್ಯಾಚಾರ ಘಟನೆ ನಡೆದಾಗ ಕಾಂಗ್ರೆಸ್ ಪ್ರತಿಭಟನೆ ನಡೆಸಿತ್ತು. ಆದರೆ, ಗೋವಾದಲ್ಲಿ ಅವರು ವಿರೋಧ ಪಕ್ಷವಾಗಿ ನಿಷ್ಪ್ರಯೋಜಕರಾಗಿದ್ದಾರೆ’ ಎಂದು ಆರೋಪಿಸಿದ್ದಾರೆ.