ನವದೆಹಲಿ (ಪಿಟಿಐ): ದ್ವಿಚಕ್ರ ಮತ್ತು ತ್ರಿಚಕ್ರ ವಾಹನ ತಯಾರಿಕೆ ಕಂಪೆನಿ ಬಜಾಜ್ ಆಟೊ, ನಾಲ್ಕು ಚಕ್ರಗಳ ನಗರ ಸಾರಿಗೆ ವಾಹನ `ಆರ್‌ಇ60~ ಅನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ವರ್ಷಾಂತ್ಯಕ್ಕೆ ಈ ವಾಹನ ಮಾರುಕಟ್ಟೆಗೆ ಬರುವ ನಿರೀಕ್ಷೆ ಇದೆ.
ಈ ಮೊದಲು 2008ರಲ್ಲಿ ಕಂಪೆನಿ ರೆನಾಲ್ಟ್-ನಿಸಾನ್ ಸಭಾಗಿತ್ವದಲ್ಲಿ ಚಿಕ್ಕ ಕಾರೊಂದನ್ನು ತಯಾರಿಸುವ ಯೋಜನೆ ರೂಪಿಸಿತ್ತು. ಆದರೆ, ಬೆಲೆ ನಿಗದಿ ಮತ್ತು ವಿನ್ಯಾಸದ ವಿಚಾರದಲ್ಲಿ ಕಂಪೆನಿಗಳ ನಡುವೆ ಒಮ್ಮತ ಮೂಡದ ಹಿನ್ನೆಲೆಯಲ್ಲಿ ಅದನ್ನು ಕೈಬಿಡಲಾಗಿತ್ತು.
`ಆರ್‌ಇ60~ ಈ ಯೋಜನೆಯ ಮುಂದುವರೆದ ಭಾಗದಂತೆ ಹೊರಬಂದಿದೆ. ತ್ರಿಚಕ್ರ ವಾಹನ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು ಹೊಸ ವಾಹನ ಪರಿಚಯಿಸುತ್ತಿದ್ದೇವೆ ಎಂದು ಬಜಾಜ್ ಆಟೊನ ವ್ಯವಸ್ಥಾಪಕ ನಿರ್ದೇಶಕ ರಾಜೀವ್ ಬಜಾಜ್ ತಿಳಿಸಿದ್ದಾರೆ.
200 ಸಿಸಿ ಪೆಟ್ರೋಲ್ ಎಂಜಿನ್ ಹೊಂದಿರುವ `ಆರ್‌ಇ60~ 35 ಕಿ.ಮೀ ಇಂಧನ ಸಾಮರ್ಥ್ಯ ಹೊಂದಿದ್ದು, ಗಂಟೆಗೆ 70 ಕಿ.ಮೀ ವೇಗದ ಮಿತಿ ಹೊಂದಿದೆ. ಕಡಿಮೆ ಇಂಗಾಲ ಉಗುಳುವ ಪರಿಸರ ಸ್ನೇಹಿ ತಂತ್ರಜ್ಞಾನ ಅಳವಡಿಸಲಾಗಿದೆ. ವಾಹನ ತಯಾರಿಕೆ ಮತ್ತು ಮಾರಾಟಕ್ಕಾಗಿ ರೆನಾಲ್ಟ್-ನಿಸಾನ್ ಕಂಪೆನಿ ಜತೆ ಒಪ್ಪಂದ ಮಾಡಿಕೊಳ್ಳಲಾಗಿದೆ ಎಂದು ರಾಜೀವ್ ಹೇಳಿದ್ದಾರೆ.
