ಬೆಂಗಳೂರು (ಐಎಎನ್ಎಸ್): ರಾಷ್ಟ್ರದ ಮೊತ್ತಮೊದಲ ಸೇನಾ ಉಪಗ್ರಹ `ಜಿಸ್ಯಾಟ್-7'ನ್ನು ಬುಧವಾರ ಯಶಸ್ವಿಯಾಗಿ ಭೂಸ್ಥಿರ ಕಕ್ಷೆಗೆ ಸೇರಿಸಲಾಗಿದೆ.
185 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿರುವ ಈ ಬಹುಬ್ಯಾಂಡ್ ಸಂವಹನ ಉಪಗ್ರಹ `ಜಿಸ್ಯಾಟ್-7'ನ್ನು ಹಾಸನದಲ್ಲಿರುವ ಉಪಗ್ರಹ ನಿಯಂತ್ರಣ ಕೇಂದ್ರದ ತಜ್ಞರು 36 ಸಾವಿರ ಕಿ.ಮೀ ಎತ್ತರದಲ್ಲಿ ಇರುವ ಭೂಸ್ಥಿರ ಕಕ್ಷೆಗೆ ಯಶಸ್ವಿಯಾಗಿ ಸೇರಿಸಿದರು ಎಂದು ಇಸ್ರೊ (ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಕೇಂದ್ರ) ತಿಳಿಸಿದೆ.
ಈ ಉಪಗ್ರಹವು ಅತ್ಯಧಿಕ ಕಂಪನದ ಹೆಲಿಕ್ಸ್ ಆ್ಯಂಟೆನಾ, ನಾಲ್ಕು ಟ್ರ್ಯಾನ್ಸ್ಪಾನ್ಡರ್ಗಳನ್ನು ಹೊಂದಿದೆ. ಅಲ್ಲದೆ 108 ಆ್ಯಂಪಿಯರ್-ಹವರ್ ಲಿಥಿಯಮ್ ಅಯಾನ್ ಬ್ಯಾಟರಿ ಅಳವಡಿಸಿರುವುದರಿಂದ ಗ್ರಹಣದ ಸಂದರ್ಭದಲ್ಲಿಯೂ ಕಾರ್ಯ ನಿರ್ವಹಿಸಬಲ್ಲ ಸಾಮರ್ಥ್ಯ ಹೊಂದಿದೆ.
ಈ ಉಪಗ್ರಹವು ನೌಕಾಪಡೆಗೆ ಉತ್ತಮ ಸಂವಹನ ಸೇವೆಯನ್ನು ನೀಡುವುದರಿಂದ ವಿದೇಶಿ ಉಪಗ್ರಹ ಇನ್ಮಾರ್ಸ್ಯಾಟ್ ಅವಶ್ಯಕತೆ ಇರುವುದಿಲ್ಲ ಎಂದು ರಕ್ಷಣಾ ತಜ್ಞರು ತಿಳಿಸಿದರು.