ಮೊದಲ ಓದು

ಹೆಂಡತಿ ಹೇಳಿದ ಹತ್ತು ಸತ್ಯಗಳು

ಸಂಸಾರದಲ್ಲಿ ದಂಪತಿಯ ನಡುವಿನ ಅನ್ಯೋನ್ಯತೆ, ಸುಮಧುರ ಸಂಬಂಧ ದೀರ್ಘಕಾಲ ಬಾಳಲು ಪರಸ್ಪರ ತಿಳಿವಳಿಕೆ ಅಗತ್ಯ. ಪತ್ನಿ ಪತಿದೇವರಿಗೆ ಕೆಲವು ಸತ್ಯಗಳನ್ನು (ಕೆಲವೊಮ್ಮ ಸುಳ್ಳು ಕೂಡ ಹೇಳಿ!) ಹೇಳದೆ ಸಂಸಾರವನ್ನು ನಡೆಸಿಕೊಂಡು ಹೋಗಿರುತ್ತಾಳೆ.

ಅನುಭವಿ ಪತಿಯಾಗಿರುವ ಲೇಖಕ ಬೇಲೂರು ರಾಮಮೂರ್ತಿ ಪತ್ನಿ ಬಚ್ಚಿಟ್ಟ ಅಂಥ ಹತ್ತು ಸತ್ಯಗಳನ್ನು ಇಲ್ಲಿ ಕೊಟ್ಟಿದ್ದಾರೆ. ಎಂದಿನ ಮಧ್ಯಮ ವರ್ಗದ ಸಾಂಸಾರಿಕ ಪರಿಭಾಷೆ ಇಲ್ಲಿ ಮೂಡಿದೆ. ಅವರು ನಿತ್ಯ ಪಡುವ ಸಂಸಾರದ ಪಾಡು ಇಲ್ಲಿನ ಹತ್ತು ಸತ್ಯಗಳ ವಸ್ತು.

ದೀರ್ಘಕಾಲದ ದಾಂಪತ್ಯದಲ್ಲಿ ಕಾಣಿಸುವ ಎಲ್ಲ ರಾಗಳು, ಸರಿಗಮಗಳು ಇಲ್ಲಿ ಕಾಣಿಸುತ್ತವೆ; ಕೇಳಿಸುತ್ತವೆ. ಅವರದನ್ನು ಆಪ್ತಧಾಟಿಯಲ್ಲಿ ದಾಖಲಿಸಿದ್ದಾರೆ. ಹೆಂಡತಿ ಎಂದರೆ ಲೇಖಕರಿಗೆ ಪ್ರೀತಿ, ಹೆಮ್ಮೆ ಎರಡೂ ಉಂಟು. ಆದರೆ, ಅವರು ಹೆಂಡತಿಗೊಂದು ವ್ಯಕ್ತಿತ್ವ ಇಲ್ಲ ಎನ್ನುವಂತೆ ‘ಲೇ... ಇವಳೇ...’ ಎಂದು ಸಂಬೋಧಿಸುತ್ತಾರೆ.

ಕೊನೆಯಲ್ಲಿ ‘ಏನೇ, ಇವಳೇ, ಶಶಿ’ ಎಂದು ಕರೆಯುತ್ತಾರೆಯಾದರೂ ‘ನಾನು ಏನು ಕರೆದರೂ ನಿನಗೆ ಖುಷಿಯೇ’ ಎನ್ನುತ್ತಾರೆ. ಇದರಿಂದಾಗಿ ಹೆಂಡತಿ ಎಂಬ ಅಗೋಚರ ವ್ಯಕ್ತಿತ್ವವೊಂದು ಇಲ್ಲಿ ರೂಪುಗೊಂಡಿದೆ. ಹಾಗಾಗಿ ಇದನ್ನು ‘ಯಾರ ಹೆಂಡತಿ ಹೇಳಿದ ಸತ್ಯಗಳು ?’ ಎಂದು ಕೆಲವು ರಸಿಕರು ಪ್ರಶ್ನೆ ಕೇಳುವ ಸಾಧ್ಯತೆಯಂತೂ ಇಲ್ಲಿನ ಬರವಣಿಗೆಯ ಸಂದರ್ಭದಲ್ಲಿ ಇದ್ದೇ ಇದೆ!

ಅಗಣಿತ ವಿಸ್ಮಯ

ಗಣಿತ ಎಂದರೆ ಮಾರುದೂರ (ಎಷ್ಟು ಮಾರು ಎಂದು ಲೆಕ್ಕ ಕೇಳುವಂತಿಲ್ಲ!) ಹಾರಿ ಬೀಳುವವರು ಎಂದಿನಿಂದ ಇಂದಿನವರೆಗೂ ಇದ್ದಾರೆ. ಸರಳ ಗಣಿತವೂ ಇವನಿಗೆ/ಇವಳಿಗೆ ಬರುವುದಿಲ್ಲ ಎಂದು ಮಾಸ್ತರರು ಸೇರಿದಂತೆ ಅನೇಕರು ಬೈಯುವುದು ಸಾಮಾನ್ಯ ಸಂಗತಿ. ಇಂಥ ಗಣಿತದ ಚಳಿ ಹಿಡಿದವರ ಚಳಿಯನ್ನು ಬಿಡಿಸಲೆಂದೇ ರೋಹಿತ್‌ ಚಕ್ರವರ್ತಿ ಗಣಿತ ಲೋಕಕ್ಕೆ ಸಂಬಂಧಿಸಿದ ವಿಸ್ಮಯಗಳನ್ನು ಇಲ್ಲಿ ಕೊಟ್ಟಿದ್ದಾರೆ.

ಇಲ್ಲಿರುವುದು ಒಂದು ರೀತಿಯಲ್ಲಿ ಗಣಿತಶಾಸ್ತ್ರದ ಹಿಂದಿನ ವಿಸ್ಮಯಕಾರಕ ಕಥೆ. ಕಥೆ ಆಗಿರುವುದರಿಂದ ಗಣಿತ ಎಂದರೆ ಜಾರಿಕೊಳ್ಳುವವರು, ತಲೆಬಿಸಿ ಮಾಡಿಕೊಳ್ಳುವವರು ಇದನ್ನು ಕಥೆಗಳ ಪುಸ್ತಕದಂತೆಯೇ ಓದಬಹುದು. ಭಾರಮಾಪಕದ ಸಹಾಯವಿಲ್ಲದೇ ಆನೆಗಳ ತೂಕವನ್ನು, ಮತ್ತು ಅಳತೆಪಟ್ಟಿಯ ಸಹಾಯವಿಲ್ಲದೆ ಅವುಗಳ ಮೈಯಳತೆಯನ್ನು ಕಂಡು ಹಿಡಿಯುವ ಸೂತ್ರಗಳನ್ನು ಕೊಟ್ಟ ಜೀವವಿಜ್ಞಾನಿ ಕೇರಳದ ಕೆ.ಪಿ. ಶ್ರೀಕುಮಾರ್‌ ಅವರದು ಇಂಥ ಕಥೆ.

ಇಂಥ ಆಸಕ್ತಿ ಹುಟ್ಟಿಸುವ ಅನೇಕ ಕಥೆಗಳು ಇಲ್ಲಿವೆ. ಈ ಪುಸ್ತಕದ ವಿಶಿಷ್ಟ ಅಂಶವೆಂದರೆ ಗಹನ ವಿಷಯಗಳನ್ನೇ ತಮಾಷೆಯಾಗಿ ಹೇಳಿರುವುದು. ಗಂಭೀರ ವಿಷಯ ಎಂದುಕೊಂಡಿರುವ ಗಣಿತ ಮತ್ತು ಅದರ ಸಂಶೋಧನೆಯ ಹಿಂದಿನ ಕಥೆಗಳು ರೋಚಕವಾಗಿವೆ ಮಾತ್ರವಲ್ಲ, ಅವು ಶಾಲಾ ಮಕ್ಕಳಿಗೂ ಅರ್ಥವಾಗುವ ಸರಳ ಕನ್ನಡದಲ್ಲಿದೆ ಎಂಬುದು ದುಗರ ಗಮನಕ್ಕೆ ಅರ್ಹವಾದ ಅಂಶವಾಗಿದೆ.
–ಸಂದೀಪ ನಾಯಕ.