ನಟಿ ಶಿಲ್ಪಾ ಶೆಟ್ಟಿ ಈಗ ವಸ್ತ್ರ ವಿನ್ಯಾಸಕಿ. ಆಶ್ಚರ್ಯವಾದರೂ ಇದು ಸತ್ಯ. ರಾಜ್ ಕುಂದ್ರಾ ಜತೆಗಿನ ಮದುವೆ ಹಾಗೂ ಪುತ್ರೋತ್ಸವದ ನಂತರ ಬಾಲಿವುಡ್‌ನ ಈ ಬೆಡಗಿ ತಮ್ಮದೇ ರಾಜಸ್ತಾನ್ ರಾಯಲ್ಸ್ ಐಪಿಎಲ್ ತಂಡದ ಅಭಿಮಾನಿಗಳಿಗಾಗಿ ಅಧಿಕೃತ ಫ್ಯಾನ್ ವೇರ್ ಸಂಗ್ರಹಗಳನ್ನು ತಾವೇ ವಿನ್ಯಾಸ ಮಾಡಿದ್ದಾರೆ.
`ಪ್ರವೋಗ್' ಜತೆಗೂಡಿ ವಿನ್ಯಾಸ ಮಾಡಲಾಗಿರುವ ಈ ವಸ್ತ್ರಗಳನ್ನು ಇತ್ತೀಚೆಗೆ ಸ್ವತಃ ತಾವೇ ಧರಿಸಿ ರ‌್ಯಾಂಪ್ ಏರಿ, ಶಿಲ್ಪಾ ಪ್ರದರ್ಶಿಸಿದರು. ಐಪಿಎಲ್‌ನ ಆರನೇ ಆವೃತ್ತಿಗೆ ವಿಧ್ಯುಕ್ತ ಚಾಲನೆ ದೊರೆತ ಹಿನ್ನೆಲೆಯಲ್ಲಿ ನಟಿ, ವಿನ್ಯಾಸಕಿ ಶಿಲ್ಪಾ ಶೆಟ್ಟಿ ತಮ್ಮ ವಸ್ತ್ರಗಳ ಕುರಿತು `ಈ ಸಂಗ್ರಹಗಳು ಅತ್ಯಂತ ಜಾಗರೂಕತೆಯಿಂದ ವಿನ್ಯಾಸ ಮಾಡಿದಂಥವು.
ಯುವ ಜನಾಂಗಕ್ಕೆ ಇಷ್ಟವಾಗುವ ಇವು ಹೆಚ್ಚು ಆರಾಮದಾಯಕ. ಮತ್ತೆ ಮತ್ತೆ ಇವನ್ನು ತೊಡಬೇಕೆನಿಸುತ್ತದೆ. ಲೈನಿನ್ ಶರ್ಟ್‌ಗಳು, ನೀಲಿ ಹಾಗೂ ಹಸಿರು ಬಣ್ಣಗಳನ್ನೊಳಗೊಂಡ ಬಗೆಬಗೆಯ ವಿನ್ಯಾಸದ ಪೊಲೊ ಟಿ-ಶರ್ಟ್‌ಗಳು ಇದರಲ್ಲಿ ಸೇರಿವೆ' ಎಂದು ಅವರು ತಿಳಿಸಿದ್ದಾರೆ.
ಶಿಲ್ಪಾ ಶೆಟ್ಟಿ ವಿನ್ಯಾಸದ ಈ ವಸ್ತ್ರಗಳನ್ನು ರಾಜಸ್ತಾನ್ ರಾಯಲ್ಸ್ ತಂಡದ ರಾಹುಲ್ ದ್ರಾವಿಡ್, ಅಜಿಂಕ್ಯಾ ರಹಾನೆ, ಶಾನ್ ಟೈಟ್, ಬ್ರಾಡ್ ಹಾಗ್, ಕೆವೊನ್ ಕೂಪರ್ ಮುಂತಾದವರು ತೊಟ್ಟು ರ‌್ಯಾಂಪ್ ತುಳಿದರು. ಅಂತಿಮವಾಗಿ ಶೋ ಸ್ಟಾಪರ್ ಹಾಗೂ ವಿನ್ಯಾಸಕಿ ಎರಡೂ ಪಾತ್ರಗಳನ್ನು ಶಿಲ್ಪಾ ಒಬ್ಬರೇ ನಿಭಾಯಿಸಿ ಗಮನ ಸೆಳೆದರು.
