ಘಟನೆ ವಿವರ: ತೃತೀಯ ಬಿಎ ವಿದ್ಯಾರ್ಥಿಗಳಾದ ಎನ್. ವೆಂಕಟೇಶ್, ಸಂಗಪ್ಪ, ಎಸ್. ಯೋಗೀಶ್ ಅವರು ಬರೆಯಬೇಕಾದ ಇಂಗ್ಲಿಷ್ ಪರೀಕ್ಷೆಗೆ ಈ ನಕಲಿ ವಿದ್ಯಾರ್ಥಿಗಳು ಹಾಜರಾಗಿದ್ದರು. ವಿಶ್ವವಿದ್ಯಾಲಯದ ಪರಿವೀಕ್ಷಕರು ಅಭ್ಯರ್ಥಿಗಳ ಪ್ರವೇಶಪತ್ರದ ಸಹಿ ಮತ್ತು ಉತ್ತರ ಪತ್ರಿಕೆ ಸಂಖ್ಯೆಯುಳ್ಳ (ಡೈರಿ) ದಾಖಲೆಗೆ ಹಾಕಲಾದ ಸಹಿಯನ್ನು ಪರಸ್ಪರ ತಾಳೆ ಹಾಕಿದಾಗ ನಕಲಿ ವಿದ್ಯಾರ್ಥಿಯೊಬ್ಬ ಸಿಕ್ಕಿಬಿದ್ದ. ವಿಷಯ ತಿಳಿಯುತ್ತಿದ್ದಂತೆಯೇ ಬೇರೆ ಕೊಠಡಿಗಳಲ್ಲಿ ಪರೀಕ್ಷೆ ಬರೆಯುತ್ತಿದ್ದ ಲೋಕ್ಯಾ ನಾಯ್ಕ ಮತ್ತು ಲೋಕೇಶ ಪರಾರಿಯಾಗಲು ಯತ್ನಿಸಿ ಶೌಚಾಲಯದೊಳಗೆ ನುಗ್ಗಿದರು. ಶಂಕೆಗೊಂಡ ಪರಿವೀಕ್ಷಕರು ಅವರನ್ನೂ ಹಿಡಿದು ವಿಚಾರಿಸಿದಾಗ ವಿಷಯ ಬೆಳಕಿಗೆ ಬಂದಿದೆ. ನಕಲಿ ವಿದ್ಯಾರ್ಥಿಗಳು ಪರೀಕ್ಷೆ ಬರೆಯುತ್ತಿರುವಾಗ ಅಸಲಿ ವಿದ್ಯಾರ್ಥಿಗಳು ಕಾಲೇಜಿನ ಹೊರಗೆ ಇದ್ದುಕೊಂಡು ನಿಗಾ ವಹಿಸಿದ್ದರು ಎಂದು ವಿವಿ ವೀಕ್ಷಕರ ತಂಡದವರಲ್ಲೊಬ್ಬರಾದ ರವೀಂದ್ರ ಮೂರ್ತಿ ತಿಳಿಸಿದರು.