ಹುಬ್ಬಳ್ಳಿ: ಬೆಂಗಳೂರು ಸೇರಿದಂತೆ ರಾಜ್ಯದ ಇತರೆ ಮಾರುಕಟ್ಟೆಗಳಲ್ಲಿ ಈರುಳ್ಳಿ ಧಾರಣೆ ಪಾತಾಳಕ್ಕೆ ಕುಸಿದರೂ, ಇಲ್ಲಿನ ಎಪಿಎಂಸಿಯಲ್ಲಿ ಶುಕ್ರವಾರ ಉತ್ತಮ ಬೆಲೆ ದೊರೆಯಿತು.
ಮಾರುಕಟ್ಟೆಗೆ ಶುಕ್ರವಾರ 6,489 ಕ್ವಿಂಟಲ್ ಆವಕವಾಗಿತ್ತು. ಸ್ಥಳೀಯ ತಳಿಯ ಉತ್ತಮ ಗುಣಮಟ್ಟದ ಈರುಳ್ಳಿಗೆ ಕ್ವಿಂಟಲ್‌ಗೆ ₨ 900 ಮಾದರಿ ಬೆಲೆ ದೊರೆಯಿತು.
ಮಹಾರಾಷ್ಟ್ರದಲ್ಲಿ ಮೂರು ದಿನಗಳಿಂದ ಭಾರಿ ಪ್ರಮಾಣದಲ್ಲಿ ಬೆಲೆ ಕುಸಿದು ಬೆಳೆಗಾರರ ಪ್ರತಿಭಟನೆಗೆ ಕಾರಣವಾಗಿರುವ ಪುಣೆ ತಳಿಯ ಈರುಳ್ಳಿ ಹುಬ್ಬಳ್ಳಿ ಎಪಿಎಂಸಿಗೆ 191 ಕ್ವಿಂಟಲ್‌ನಷ್ಟು ಬಂದಿದ್ದು ₨ 950 ಮಾದರಿ ಬೆಲೆ ದೊರೆತು ದೂರದ ಊರುಗಳಿಂದ ಬಂದಿದ್ದ ರೈತರು ಸಂತಸಗೊಂಡರು.
ವಿಜಾಪುರ ಭಾಗದಲ್ಲಿ ಬೆಳೆಯುವ ತೆಲಗಿ ತಳಿ ಈರುಳ್ಳಿ ಕೂಡ ಕ್ವಿಂಟಲ್‌ಗೆ ₨ 900 ದರದಲ್ಲಿ ಮಾರಾಟವಾಯಿತು.
