ನವದೆಹಲಿ (ಪಿಟಿಐ): ವಾಹಿನಿಗಳ ಪ್ರಸಾರ ಮಟ್ಟವನ್ನು (ಟಿಆರ್ಪಿ) ನಿಗದಿಪಡಿಸುವಾಗ ಹೆಚ್ಚು ಮನೆಗಳ ಸಮೀಕ್ಷೆ ನಡೆಸಿ, ಅಲ್ಲಿನ ವೀಕ್ಷಕರ ಸಂಖ್ಯೆ ಆಧರಿಸಿಯೇ ಟಿವಿ ವೀಕ್ಷಕರ ಪ್ರಮಾಣ ಸೂಚ್ಯಂಕ ಏಜೆನ್ಸಿಗಳು ಕಾರ್ಯ ನಿರ್ವಹಿಸಬೇಕು ಎಂದು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಸಲಹೆ ಮಾಡಿದೆ.
ಏಜೆನ್ಸಿಗಳು ತಮಗೆ ಬೇಕಾದ ಪ್ರಮಾಣದಲ್ಲಷ್ಟೇ ಮನೆಗಳ ಸಮೀಕ್ಷೆ ನಡೆಸದೇ, ಹೆಚ್ಚು ಪ್ರಮಾಣದಲ್ಲಿ ಮನೆಗಳ ಸಮೀಕ್ಷೆ ನಡೆಸಿ, ಅದರ ಆಧಾರದಲ್ಲಿ ವೀಕ್ಷಕರ ಪ್ರಮಾಣ ನಿರ್ಧರಿಸಬೇಕು ಎಂದು ಟ್ರಾಯ್ ತನ್ನ ಇತ್ತೀಚಿನ ವರದಿಯಲ್ಲಿ ಶಿಫಾರಸು ಮಾಡಿದೆ.
ವೀಕ್ಷಕರ ಸಂಖ್ಯೆಯಲ್ಲಿ ಭಾರೀ ಬದಲಾವಣೆ ಆಗುತ್ತಿದ್ದು, ಪ್ರತಿವರ್ಷ ಶೇಕಡಾ 25ರಷ್ಟು ಏರಿಳಿತ ಕಂಡುಬರುತ್ತಿದೆ. ಹಾಗಾಗಿ, ನಿರ್ದಿಷ್ಟ ಪ್ರದೇಶದ ಕೆಲವೇ ವೀಕ್ಷಕರ ಸಮೀಕ್ಷೆಯನ್ನಷ್ಟೇ ಮಾಡದೇ, ಬೃಹತ್ ಸಂಖ್ಯೆಯ ವೀಕ್ಷಕರ ಸಮೀಕ್ಷೆ ಅತ್ಯಗತ್ಯ ಎಂದು ವರದಿಯಲ್ಲಿ ಹೇಳಲಾಗಿದೆ.
ಒಂದೇ ಪ್ರದೇಶದ ಕೆಲ ಮನೆಗಳಲ್ಲಷ್ಟೇ ವೀಕ್ಷಕರ ಸಮೀಕ್ಷೆ ನಡೆಸಿ ವರದಿ ನೀಡುವುದು ಸರಿಯಲ್ಲ. ಬದಲಾಗಿ ಒಂದೇ ಪ್ರದೇಶದಲ್ಲಿ ಹಲವು ಮನೆಗಳಲ್ಲಿ ಸಮೀಕ್ಷೆ ನಡೆಸಿ ಅದರ ಆಧಾರದಲ್ಲಿ ವರದಿ ನೀಡಬೇಕು ಎಂದು ತಿಳಿಸಿದೆ.