ರೇಂಜ್‌ ರೋವರ್‌ಗೆ ಚೇಂಜ್ ಆಗುವ ಕನಸು..!

7
ಫಸ್ಟ್‌ ಡ್ರೈವ್‌

ರೇಂಜ್‌ ರೋವರ್‌ಗೆ ಚೇಂಜ್ ಆಗುವ ಕನಸು..!

Published:
Updated:

ಹನ್ನೆರಡು ವರ್ಷಗಳ ಹಿಂದೆ, ‘ಗಂಡ ಹೆಂಡತಿ’ಯಂತಹ ಚಿತ್ರವನ್ನು ನಾನು ಒಪ್ಪಿಕೊಂಡಿದ್ದೇ ನನ್ನ ಕನಸಿನ ಕಾರು ಖರೀದಿಸಬೇಕೆಂಬ ಕಾರಣಕ್ಕೆ. ‌

ನಾನಾಗ ಮೊದಲ ಪಿಯು ಓದ್ತಾ ಇದ್ದೆ. ನನ್ನ ಬಹುತೇಕ ಗೆಳತಿಯರು ಕಾರಿನಲ್ಲೇ ಬರುತ್ತಿದ್ದರು. ಅನೇಕರು ತಾವೇ ಕಾರು ಓಡಿಸಿಕೊಂಡು ಬರುತ್ತಿದ್ದರು. ನನಗೂ ನನ್ನದೇ ಆದ ಒಂದು ಕಾರಿದ್ದರೆ ಎಷ್ಟು ಚೆಂದ ಅಂತನಿಸಿದ್ದು ಆಗಲೇ.

ಅಲ್ಲಿವರೆಗೂ ಮಾಡೆಲಿಂಗ್‌ ಮಾಡಿಕೊಂಡು, ಸಣ್ಣಪುಟ್ಟ ಜಾಹೀರಾತುಗಳಿಂದ ಹಣ ಸಂಪಾದಿಸುತ್ತಿದ್ದೆ. ಅದೇ ವೇಳೆ, ಜಾಹೀರಾತು ಏಜೆನ್ಸಿಯಿಂದ ‘ಗಂಡ ಹೆಂಡತಿ’ ಸಿನಿಮಾ ಆಫರ್‌ ಬಂತು. ಯಾವ ಸಿನಿಮಾ, ಯಾರು ಹೀರೊ, ಏನು ವಿಷಯ, ಪಾತ್ರ ಎಂಥದ್ದು... ಹೂಂ ಹೂಂ... ಏನೂ ಯೋಚಿಸಲೇ ಇಲ್ಲ. ‘ದುಡ್ಡು ಕೊಡ್ತಾರಾ?‘ ಅನ್ನುವುದು ನನ್ನ ಮೊದಲ ಪ್ರಶ್ನೆಯಾಗಿತ್ತು. ‘ಎಷ್ಟು ಕೊಡ್ತಾರೆ?’ ಎನ್ನುವ ಕುತೂಹಲ ನಂತರದ್ದು. ಅವರು ‘ಲಕ್ಷಗಳಲ್ಲಿ ಹಣ ಕೊಡ್ತಾರೆ’ ಅಂತ ಹೇಳಿದ್ದೇ ಬಂತು. ನಾನು ಖುಷಿಯಿಂದ ಕುಣಿದು ಬಿಟ್ಟಿದ್ದೆ. ತಕ್ಷಣ ನನ್ನ ತಲೆಯಲ್ಲಿ ಬಂದಿದ್ದು ಸೆಕೆಂಡ್‌ ಹ್ಯಾಂಡ್‌ ಝೆನ್‌ ಕಾರು. ‘ಓ, ಸಾಕು ಬಿಡು, ನನ್ನ ರೇಂಜ್‌ನಲ್ಲಿ ಒಂದು ಕಾರು ಬರುತ್ತಲ್ಲ... ಅದೂ ಒಂದೇ ಪ್ರಾಜೆಕ್ಟ್‌ಗೆ...’ ಅಂದುಕೊಂಡೆ. ‘ಯಾವಾಗ ಬರಬೇಕು, ಎಲ್ಲಿ ಬರಬೇಕು’ ಅಂತ ಕೇಳಿದೆ. ಹೋಗಿ ಸಿನಿಮಾಕ್ಕೆ ಸಹಿ ಕೂಡ ಹಾಕಿ ಬಂದೆ. ಎಲ್ಲರ ಮುಂದೆ ರಾಣಿಯಂತೆ ಝೆನ್‌ ಕಾರಲ್ಲಿ ಬಂದಿಳಿಯಬೇಕು ಎನ್ನುವುದೊಂದೇ ನನ್ನ ಅಂದಿನ ಗುರಿಯಾಗಿತ್ತು. ಬೇರೆ ಏನೂ ತಲೆಗೆ ಬರಲೇ ಇಲ್ಲ. ‌ಒಟ್ಟಾರೆ ನನ್ನನ್ನು ಈ ಸಿನಿಮಾ ಲೋಕಕ್ಕೆ ಎಳೆದು ತಂದಿದ್ದು ಈ ಕಾರೆನ್ನುವ ಕನಸು.

ನಾನು ಮೊಟ್ಟ ಮೊದಲ ಬಾರಿ ಸ್ಟೀರಿಂಗ್‌ ಹಿಡಿದಿದ್ದು ಮಾರುತಿ 800 ಕಾರಿನದ್ದು. ನನ್ನ ಕಾರನ್ನು ನಾನೇ ಓಡಿಸಬೇಕು ಎನ್ನುವ ಆಸೆಯಿಂದ ಸದಾಶಿವನಗರದಲ್ಲಿ ಡ್ರೈವಿಂಗ್‌ ಕ್ಲಾಸ್‌ ಸೇರಿಕೊಂಡಿದ್ದೆ. ಡ್ರೈವಿಂಗ್‌ ಕ್ಲಾಸ್‌ನಲ್ಲಿ ನಾವು ಡ್ರೈವಿಂಗ್‌ ಕಲಿತಿವಿ ಅನ್ನೋದೆಲ್ಲಾ ಸುಳ್ಳು. ಅಲ್ಲಿ ನಾವು ಕಾರು ಓಡಿಸೋದನ್ನ ಕಲಿಯೋದೇ ಇಲ್ಲ. ಕಾರು ಓಡಿಸಬಲ್ಲೆ ಎಂಬ ಧೈರ್ಯವನ್ನು ಮಾತ್ರ ಅವರು ನಮ್ಮಲ್ಲಿ ತುಂಬುತ್ತಾರೆ. ಜೊತೆಗೆ ಒಂದು ’ಎಲ್‌’ ಬೋರ್ಡ್‌, ಲೈಸನ್ಸ್‌ ಸಿಗುತ್ತೆ, ಅಷ್ಟೇ. ಆದರೆ ನಿಜವಾಗಿ ಕಾರು ಕಲಿಯೋದು ಸ್ವಂತ ಕಾರಿನಲ್ಲೇ. ನಾವೊಬ್ಬರೇ ಕಾರು ಓಡಿಸೋಕೆ ಶುರುಮಾಡ್ತೀವಲ್ಲ ಆಗ. ಯಾವಾಗ ಒಂದನೇ ಗೇರ್‌ನಲ್ಲಿರಬೇಕು, ಯಾವಾಗ ಎರಡನೇ ಗೇರ್‌ಗೆ ಮತ್ತು ಯಾವಾಗ ಮೂರನೇ ಗೇರ್‌ಗೆ ಬದಲಾಯಿಸಬೇಕು ಅನ್ನೋದನ್ನೆಲ್ಲ  ಕಲಿಯೋದು ಡ್ರೈವಿಂಗ್‌ ಕ್ಲಾಸ್‌ ಮುಗಿದ ಮೇಲೆಯೇ.

ಈ ಜೀವನ ಕೂಡ ಹಾಗೆನೇ ಅಲ್ವಾ? ಕಲಿಯಬೇಕು. ಕಲಿಯುತ್ತಲೇ ಇರಬೇಕು. ತಗ್ಗು–ದಿನ್ನೆ, ಹಂಪ್‌ ಎಲ್ಲಾನೂ ನೋಡಿಕೊಂಡು ಜೀವನ ಎನ್ನುವ ಕಾರನ್ನು ಹುಷಾರಾಗಿ ಓಡಿಸಬೇಕು. ಎಷ್ಟೇ ಎಚ್ಚರಿಕೆಯಿಂದ ಓಡಿಸಿದರೂ ಕೆಲವೊಮ್ಮೆ ಬೇರೆಯವರು ಬಂದು ಗುದ್ದಿ ಅಪಘಾತ ಮಾಡಿ ಬಿಡುತ್ತಾರೆ. ಸಾವರಿಸಿಕೊಂಡು, ಮತ್ತೆ ಮೇಲೆದ್ದು ಮುಂದೆ ಹೋಗಬೇಕಾದ ಸರದಿ ನಮ್ಮದು.

ಜೀವನದಲ್ಲಿ ಏಳು–ಬೀಳು ಇದ್ದಿದ್ದೆ. ನಾನು ಆರಂಭದಲ್ಲಿಯೇ ಬಲವಾಗಿ ಬಿದ್ದು ಮೇಲೆದ್ದೆ. ಮತ್ತೆಂದೂ ಮುಗ್ಗರಿಸಲಿಲ್ಲ.

ಹಿಂದೆ ಎರಡೂವರೆ ಲಕ್ಷ ರೂಪಾಯಿ ಮೌಲ್ಯದ ಝೆನ್‌ ಕಾರು ಓಡಿಸುವಾಗಲೂ ಅಷ್ಟೇ ನಿಧಾನವಾಗಿ ಓಡಿಸುತ್ತಿದ್ದೆ. ಈಗಿರುವ ₹65 ಲಕ್ಷದ ಬಿಎಂಡಬ್ಲ್ಯು 5 ಸಿರೀಸ್‌ ಕಾರು ಓಡಿಸುವಾಗಲೂ ಮೈಯೆಲ್ಲಾ ಕಣ್ಣಾಗಿರುತ್ತದೆ. ಸಣ್ಣ ತಪ್ಪಿಗೂ ಸಾವಿರಾರು ರೂಪಾಯಿ ವೆಚ್ಚ ಬರುತ್ತದಲ್ಲ, ಅದಕ್ಕೆ ಆ ಎಚ್ಚರಿಕೆ ಇದ್ದೇ ಇರುತ್ತದೆ.

ಒತ್ತಡದಲ್ಲಿ ಕಾರು ಓಡಿಸುವುದಿಲ್ಲ. ಡ್ರೈವರ್‌ ಕೈಗೆ ಕಾರು ಕೊಟ್ಟು ಹಿಂದಿನ ಸೀಟಿನಲ್ಲಿ ಹಾಯಾಗಿ ಕುಳಿತು, ನೆಚ್ಚಿನ ಹಾಡು ಕೇಳುತ್ತ, ಹೊರಗಿನ ನಿಸರ್ಗ ಸೌಂದರ್ಯವನ್ನು ಕಣ್ತುಂಬಿಕೊಳ್ಳುತ್ತ ಹೋಗುವುದರಲ್ಲಿಯೇ ಸುಖವಿದೆ. ಅಂಥ ಸುಖವನ್ನು ನಾನೆಂದೂ ಕಳೆದುಕೊಳ್ಳೋಕೆ ಬಯಸಲ್ಲ.

ಅದೇ ಹಾಡು ಫೆವರೇಟ್‌...
ಮಾತು ಮುರಿದೆ ಮಾತಾಡದೆ ಮೋಹಕ ಮೋಸವ ಮಾಡಿದೆ... ಈಗಲೂ ಈ ಹಾಡಂದ್ರೆ ಇಷ್ಟ. ದೂರದ ಊರುಗಳಿಗೆ ಪ್ರಯಾಣ ಹೋಗುವಾಗ ಈ ಹಾಡು ಕೇಳುವೆ. ಕಾರಿನ ವೇಗವೂ ಮೆಲೋಡಿ ಹಾಡಿನ ಹಾಗೆ ಇರಬೇಕು ಅಂತ ಬಯಸುತ್ತೇನೆ. ನನಗೆ ಅವಸರ, ಗಡಿಬಿಡಿ, ಅಬ್ಬರ ಅಂದ್ರೆ ಆಗಲ್ಲ. ಯೋಗಾಭ್ಯಾಸ ನನಗೆ ಶಾಂತಿ–ಸಮಾಧಾನ ಕಲಿಸಿಕೊಟ್ಟಿದೆ. ಕಾರು ಓಡಿಸುವ ಅಭ್ಯಾಸಕ್ಕೂ ಇದೇ ಅನ್ವಯವಾಗುತ್ತದೆ.

ರೇಂಜ್‌ ರೋವರ್‌ ಕನಸಿದೆ...
ಆದರೆ ಡ್ರೈವಿಂಗ್‌ ಮಾಡುವಾಗ ಮಾತ್ರ ನಾನು ತುಂಬಾ ಸಾವಧಾನಿ. ದೇವರ ದಯೆ, ಇಲ್ಲಿವರೆಗೂ ಅಪಘಾತ ಆಗಿಲ್ಲ. ಮೊದಲು ತಗೊಂಡಿದ್ನಲ್ಲಾ ಸಿಲ್ವರ್ ಬಣ್ಣದ ಝೆನ್ ಕಾರು ಅದನ್ನು ಈಗಲೂ ಇಟ್ಟಿದ್ದೇನೆ. ನಂತರ ಹೊಂಡಾ ಸಿವಿಕ್‌ ತಗೊಂಡೆ. ಅದಾದ ಮೇಲೆ ಆಡಿ ಬಂತು. ಈಗ ಬಿಎಂಡಬ್ಲ್ಯು. ಈ ಕಾರು ತಗೊಂಡಾಗ ಅಪ್ಪಾ ಕೇಳಿದರು, ‘ಇಷ್ಟೊಂದು ದುಡ್ಡು ಕೊಟ್ಟು ಒಂದು ಕಾರ್‌ ತಗೊಳ್ಳೊ ಅಗತ್ಯ ಇದೆಯಾ?’ ಅಂತ. ಆದರೆ ನನಗದು ಇಷ್ಟ ಆಗಿತ್ತು. ಅದನ್ನ ಕೊಳ್ಳುವಷ್ಟು ಸಾಮರ್ಥ್ಯವೂ ನನಗಿತ್ತು. ತಗೊಂಡೆ. ಸಾಲ ಶೋಕಿ ಮಾಡೋದು ನನಗಿಷ್ಟ ಆಗಲ್ಲ. ಅದೂ ಸಾಲ ಮಾಡಿ ಕಾರು ಖರೀದಿಸುವುದರಲ್ಲಿ ಯಾವ ಅರ್ಥವೂ ಇಲ್ಲ. ಹಾಸಿಗೆ ಇದ್ದಷ್ಟೇ ಕಾಲು ಚಾಚಬೇಕು.

‘ಸಾಲ ಮಾಡಿಯಾದ್ರೂ ತುಪ್ಪ ತಿನ್ನು’ ಅನ್ನುವುದು ದಾರಿ ತಪ್ಪಿಸುವ ಮಾತು. ಮುಂದೆ ರೇಂಜ್‌ ರೋವರ್‌ ಕಾರು ತಗೊಬೇಕು ಅಂತ ಆಸೆ ಇದೆ. ಲಕ್ಸುರಿ ಕಾರುಗಳ ಪೈಕಿ ಈಗ ಹೆಚ್ಚು ಜನಪ್ರಿಯವಾಗಿರುವ ಕಾರು ರೇಂಜ್ ರೋವರ್. ನೋಡೋಣ, ಅದರಲ್ಲಿ ಏನೇನೊ ಹೊಸ ಹೊಸ ಫೀಚರ್‌ಗಳನ್ನ ಕೊಟ್ಟಿದ್ದಾರೆ. ಸಮಯ ಕೂಡಿ ಬಂದಾಗ ಅದನ್ನೂ ಓಡಿಸಿ ಖುಷಿ ಪಡ್ತಿನಿ. ಆದ್ರೆ ಅದಕ್ಕೆ ಅವಸರವೇನೂ ಇಲ್ಲ…


–ಬಿಎಂಡಬ್ಲು ಕಾರ್ ಎದುರು ಸಂಜನಾ

ಬರಹ ಇಷ್ಟವಾಯಿತೆ?

  • 9

    Happy
  • 0

    Amused
  • 1

    Sad
  • 1

    Frustrated
  • 1

    Angry

Comments:

0 comments

Write the first review for this !